Matayo 10
10
Yesu etavalhoija vazasughawa ikado na vanu
Mariko 3:13-19; Luka 6:12-16
1Niho Yesu ekavalhoja vahina kuu ikado na vanu, ekavao umuruisho wa kuguguluti mapepo na kuuti kira urukhao na marukhao makhabuna. 2Malhe yaka vazasughawa ikado na vanu nee Simoni esewe Petro ne Andrea mbakhu kuu ne Yakobo muinyi wakwe Zebedayo ne Yohana mbakhu kuu, 3Filipo ne Batolomayo ne Tomaso ne Matayo eemzadara kodi ne Yakobo muinyi wakwe Alfayo ne Tadayo, 4Simoni eekumaania idi kuu ne Yuda Isikarioti emlhie Yesu.
Yesu etavasugha vahina ikado na vanu
Mariko 6:7-13; Luka 9:1-6
5Yesu eevasughae ka vahina ikado na vanu na kuvaba, “Msiso he vahe vesi Vayahudi, neri musibuu he miang'a ya Vasamaria. 6Mira soni he vahe va Isiraeli bi kwaite vetoe sa maalu yelahae. 7Mwaraaso birikirani to, ‘Udilao wa are ana he Kiumbi waahe sina.’ 8Utini varukhao, vakaani vahe kuli he kigame, utini velo lukoma, guni mapepo. Muoiwe bule, guni bule. 9Musidori mimaru ya zahabu, neri mihaku, neri magongolo ya shaba. 10Musidori ibena la barime, neri gomae hali neri makwadoe, neri ndate kwaite mnyamalo edumu kulhanuwa cho eboiie nyamalo.” 11“He muang'a munebuu hile kijiji, daani muhe eye kumudoria, nakune zokhoni ata sari muaze mkunehali. 12Mkubuu he minda vaholuni muvaba nhunguru ikhwa nakune. 13Kai vahe vaka ang'a veneidoria ka holume, ka nhunguru kaghu inekhwa navo. Mira chikukhwa tevemudoriie, niho nhunguru kaghu inemukiriia. 14Chikukhwa muhe temubae buuni hile kumulakhona, niho mkuneli heka minda hile heka muang'a humhunhani masonka he masame kaghu chikhwa ikanyo hevo. 15Kweri nimubaiya, he muaze wa kuzamariwa ka muang'a unezamariwa zamaro giru kutakho hu zamaro yeeguwe he miang'a ya Sodoma na Gomora.”
Kharo jinelita
Mariko 13:9-13; Luka 21:12-17
16“Wesiani, ani nitamusugha sa maalu hodi helo madie ya maeza. Kwato mukhwa mupitue sa bome, na vakulho sa sua. 17Mukhwa maila na vahe, kwaite venemudara na kumutii he mabaraza kini na kumuma heminda vesaheya Vayahudi, 18kwaite mwaanidarisha ani mnetiiwe he vagiru va idi na madilao kalo muvabaiye Mburi Kulho nahe vahe vesi Vayahudi. 19Mira vekunemutii he ibaraza, kune msibughenu ite mneyo kiakhoni hile chinekhwa kimomo, kwaite madamo yekunehe, mneowe cha kuyo. 20Kwaite sikune muneyo ka viome, mira ni vya Saa wakwe Kiumbi enekhwa eyo kutakhoiya kune.” 21Heka madamo, “Mbakhu enemkirii mbakhu kuu agaawe, naho aba enemkirii muinyi kuu, na vainyi navyo venevakirii aba ne lage kini na kuvaro vagaawe.” 22“Kira muwe enemusanuiya kune kwaite mwaanidaraisha ani. Mira enegumirija sari mkhito, niu eneutiwe. 23Vahe vekunemuboiia makusa he muang'a muwe, guguluni he muang'a mhali. Kweri namubaiya temkafiriti kudaha miang'a mikhabuna ya Iziraeli Muinyi wa Muhe esinahe.” 24“Mhina temtakho mhinya kuu, neri mhaye temtakho dilao kuu. 25Kwato chiye mhina alhamuiwe kukhwa sa mhinya kuu, na mhaye alhamuiwe kukhwa sa dilao kuu. Kai mgiru wa ang'a esewa Belizebuli, ho vahe va ang'a kuu venesewa malhe makusasha.”
Edumuwa kubughenuwe
Luka 12:2-7
26“Kwato musibughenu ka vahe, kwaite tehelo chikumatuike chisikaakhoike, naho tehelo mburi isikailike. 27Cho nimubaiya kune he kidughu, chiyoni he luatame na mburi yo mukoie ikuyowe ankau, ibirikireni lheme. 28Musivabughenu ka vemuru kugaa msa mira tevemuru kugaa swaho. Nikeba kumbughenu Kiumbi, ka emuru kuoni vikhabuna msa na swaho he mwalha usiga maaze makhabuna neri mkhito . 29Ho, nibaieni, vuzeewe vunu tevudiwe kwa sarafu we gitutu? Mira neri muwe teimuru kulhu di kai Aba kaghu esinadumu . 30Mira kwa bwa kaghu, sari alhu ja mia kaghu jitariwe khabuna. 31Kwato musibughenu, kwaite kune muvakulho kutakho vuzeewe vakumure.
Kuvabaiya vahe vahali mburi yakwe Kiristo
Luka 12:8-9
32“Kira mhe eyo he vahe ite u ni mgho, naani nineyo he Aba gho eaha are ana ite ni mgho. 33Mira muhe enenilhi he vahe, naani ninemlhi he Aba gho eaha ana.”
Sigerie nhunguru nigerie aku
Luka 12:51-53; 14:26-27
34Musitoti ite nilitie kugera nhunguru he idi. Silitie kugera nhunguru mira nigerie aku. 35Kwaite nilitie kugera aku he mburatu na igii kuu, he mualeta ne alhii kuu, he mkora na mkora kuu. 36Naho vankuru va muhe ni vahe va ang'a kuu. 37“Emdumuishe aba hile lage kuu kutakho cho enidumue ani teniye. Emdumuishe muinyi kuu wakiburatu hile wakialeta kutakho ani teye kukhwa mhina gho. 38Kahali muhe esidori msalaba kuu naho ekaniliaha, teye kukhwa mhina gho. 39Edumuishe mizokhoire kuu, eneilahati, mira elahati mizokhoire kuu kwa mburi gho, eneyaakho.
Kitumulilo
Mariko 9:41
40“Emudoria kune, enidoria ani, naho enidoria ani, emdoria hu enisughae. 41Kira muhe emdoria mroto wa Kiumbi kwaite aamuakho ka mhe ite ni mroto wa Kiumbi, enedoria kitumulilo cha mroto wa Kiumbi. Emdoria muhe mkulho kwaite amuakho ka mhe ite ni muhe mkulho, enedoria kitumulilo cha muhe mkulho. 42Kweri nimubaiya, muhe enemo kikonho cha mai muwe waya vagitutu kwaite ni mhina gho, tekabeni kudoria kitumulilo kuu.”
Currently Selected:
Matayo 10: NTMBL2025
Highlight
Share
ਕਾਪੀ।
Want to have your highlights saved across all your devices? Sign up or sign in
The New Testament in Mbugu @The Word for The World International and Mbugu Language translation, 2025. All rights reserved.