Matayi 3
3
Ndongolo yi Yoane Mbotiki
(Mlk 1.1-8; Luk 3.1-18; Yoa 1.19-28)
1Mu ntangu beyoyo, Yoane Mumbotiki wutotoka ku nsi yinkatu, mu kizunga ki Yuda, ku kedi longila. 2Wedi tanga ti: «Viluleeno madyela, kadi Kimfumu ki mazulu kyeka lukufi!» 3Ni Yoane mumbikudi Yesaya kateela ti:
«Ni ndinga yi muntu yina bokana ku nsi yinkatu:
Kubikeeno nzila yi Mfumu,
mpe sungikeeno nzila zandi!»
4Yoane wuba na kinkutu ki mika mi kibulu ki nkumbu samo, na wuba wulwata mu luketo lwandi, melika yi mukanda wu kibulu. Makonko na nyosi yi mpanda kedi kwe dyengi. 5Bantu ba mbanza yi Yelusalemi, bantu ba kizunga kimvimba ki Yuda na bantu ba bizunga bi bela-bela na nzadi yi Yolodani, bedi kwendanga ku yandi, 6bafungula masumu mawu ha meso ma bantu bamvimba, na Yoane wedi babotikanga mu nzadi yi Yolodani.
7Yoane bu kayena Bafalisi na Basaduki bayiza babingi ku yandi mu botoko, wubateela ti: «Kanda di zimpidi! Nani wululwengisi mu tina nganzi zi Nzambi zeka bela-bela e? 8Lonkeeno mimbutu mina lonka ti luviludi madyela, 9na lubanzandi muta kaka ko ti: “Abalahami, nkaka eto yidi!” Mu dyambu nina luteela ti mu matadi bemama Nzambi lendi duukisa baala ba Abalahami! 10Bwabu kiibi kikubamani mu zenga miti mu myanzi: ni hahoho myonso miti mikwe lembolo butanga mbutu zimbote mya kwangu mpe mya tubu ku tiya. 11Meno, nina lubotika mu mamba mwanki luvilula madyela, kansi yondowo wuna kwiza ku manima ani, wumvudidi lulendo: Niidi wulunga ko mu munyanguna misinga mi nsampatu zandi. Yandi waalubotika mu Mpeve Yilongo na mu tiya. 12Simbidi ha kooko kwandi muti we yengisila, wuna hambisa mbutu zibele na bititi mu yonzika zo mu kati di kilundulu#3.12 Kilundulu ki zimbutu, bonso nzo hoti tanda di bakwe lundilanga nguba hoti madezo, mpe wuna yoka bititi ku tiya tukwe lembolo zimanga.»
Mbotokolo yi Yesu
(Mlk 1.9-11; Luk 3.21-22)
13Yesu bu kafuma ku kizunga ki Ngalili, wuyiza ku Yoane ku nzadi yi Yolodani, mwanki ka mu botika. 14Kansi Yoane katya ko ti kamubotika, wumuteela ti: «Meno nketi kwiza ku ngeye mu botoko, kadi ngeye wizidi ku meno!»
15Yesu wumuvutudila ti: «Bika bwabu bubela bobo. Kadi bumbote mu lungisa bonso budi luzolo lu Nzambi.» Yoane ni katambula. 16Yesu bu katumbu botoko, wutomboka mu mamba. Mu ntangu beyoyo kwandi yulu dizibuka na wuyena Mpeve yi Nzambi yikulumuka ku yandi mu kifwani ki bembe. 17Mboki ndinga yiyuwakana tuuka ku yulu: «Yandi ewu ni mwana ani wu ntomini tya, kyese kyani kimvimba mu yandi kidi.»
Currently Selected:
Matayi 3: dde Ddo
Highlight
Share
ਕਾਪੀ।
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.