Matayi 2
2
Bandwenga bayiza tala Yesu
1Yesu wubutuka ku mbanza Betelemi, mu kizunga ki Yuda, buna Elode wu ntinu. Bandwenga bafuma ku esete#2.1 Tangeeno mu1 Sam 16.1, Betelemi yidi mbanza yi ntinu David. Bandwenga, bangudulu bantu baa na madyela. Lulendi tanga mpe mu kibuku: 7; 13; 16. bayiza ku mbanza yi Yelusalemi 2na bafuula ti: «Kadi ntinu yi Bayudayo yi butukudi kwedi yidi e? Yeto tuyeni lubwetete lwandi lutotokidi ku esete, ni twizidi mu mufukimina.» 3Ntinu Elode bu kayuwa musamu bewowo, mayindu mandi mayiza ba yeku-yeku, bumosi mpe na bantu bamvimba ba mbanza yi Yelusalemi. 4Ni katumisa zimfumu zinganga-Nzambi na milongisi mi Misiku, na wubafuula ti: kwedi Mesiya kaabutukila e? 5Bamuvutudila ti: «Ku Betelemi mu kizunga ki Yuda, mu dyambu ti wudi wusonama mu buuku di mimbikudi ti:
6“Ngeye Betelemi, mbanza yi kizunga ki Yuda,
Wuvudidi mfunu ha kati di zimbanza zi Yuda ko,
kansi ni mu ngeye mwaadukila Mfumu
ya twaadisa Isaeli, mukangu ani.”»
7Buna Elode wutumisa bandwenga mu kinsweki, na wubafuula mwanki katoma zaba bumbote nkye ntangu lubwetete luyenikini. 8Mboki wubatambika ku mbanza Betelemi, na wubateela ti: «Yendeeno lusosa mutoma zaba bumbote misamu mitadidi mwa mwana bewowo wunsombe. Bu lwaamuyena, yizeno lunteela, mwanki meno mpe nenda na mufukimina.» 9Bu bamana yuwa ntinu, ni bayenda. Lubwetete belolo lu bayena ku esete, lwedi kwe batekididi ku mutwala awu, natee bu lu yenda tula na lutelama ha kibuka kibela mwa mwana wunsombe. 10Bu bayena lubwetete, batoma yena kyese kikingi. 11Bu bakota mu kati di nzo, bayena mwa mwana wunsombe na ngudi andi Maliya. Bamufukimina na bamukembila, mboki banyanguna bifunda byawu na bamuhaana minkayulu emi: wola, maaka mamfuku yimbote na mile. 12Ku manima, Nzambi wubalwengisa mu ndozi balembolo hyokila dyaka ku ntinu Elode. Ni bavutuka ku nsi awu mu nzila yihiika.
Yosefi na Maliya batinisa na mwana ku Ngipiti
13Bandwenga bu bavutuka, mbazi yimosi yi Mfumu yiyiza yenikina Yosefi mu ndozi, na yi muteela ti: «Telama, bonga mwana na ngudi andi, na tinisa ku nsi yi Ngipiti, zakala kooko natee bu nakuteela ti vutuka. Mu dyambu ti, ntinu Elode wuna sosa mu hondisa mwana.» 14Yosefi wutelama, wubonga mwana na ngudi andi mu kati dimpimpa, ni batinisa ku nsi yi Ngipiti. 15Bayenda bazakala kooko natee ntinu Elode bu kafwa. Misamu mimvimba mihilama bonso Mfumu kateela myo mu munwa wu mumbikudi ti: «Ntumisi mwana ani mu totoka ku nsi yi Ngipiti.»
Ntinu Elode wuhondisa baala bafyoti ku mbanza yi Betelemi
16Elode bu kayena ti bandwenga bamuhunini, wubaka mankesi mavula kitezo. Na wuhaana lutumu mu honda mu mbanza Betelemi mpe mu kizunga kyandi kimvimba baala babakala baba na mvula zole natee kubanda, bonso ntangu yi bamuhaana ku bandwenga. 17Mwanki misamu mita mumbikudi Yelemiya myenda detila ti:
18«Miloko mina yuwakana ku mbanza yi Lama,
bidilu na manyongo mamingi.
Ni Lakeli wuna dila baala bandi,
Na katiidi ko ba mubomba, mu dyambu ti bafwidi.»
Yosefi, Maliya na mwana bavutuka ku Isaeli
19Ku manima ma lufwa lu ntinu Elode, mbazi yimosi yi Mfumu yi yenikina Yosefi mu ndozi ku nsi yi Ngipiti. 20Yimuteela ti: «Telama, bonga mwana na ngudi andi, vutuka ku nsi yi Isaeli, mu dyambu ti yobobo bedi sosa mu hondisa mwana bafwidi.» 21Yosefi wutelama, wubonga mwana na ngudi andi, ni kavutuka ku nsi yi Isaeli. 22Kansi, bu kayuwa ti Akelawuse wuna yaala nsi yi Yuda ha kibuka ki tata andi Elode, wuyena bunkuta mu kwenda kooko. Nzambi wumulwengisa mu ndozi, mboki wuyenda ku kizunga ki Ngalili. 23Wuyenda zakala ku mbanza Nazaleti, mwanki misamu mita mimbikudi myenda detila: «Baamutumisina mwisi-Nazaleti.»
Currently Selected:
Matayi 2: dde Ddo
Highlight
Share
ਕਾਪੀ।
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.