Matayi 23
23
Yesu wusemba milongisi mi Misiku na Bafalisi
(Mlk 12.38-39; Luk 11.43,46; 20.45-46)
1Yesu wuta ku kamba di bantu na ku milongoki myandi ti: 2«Milongisi mi Misiku na Bafalisi ba bahaana kiyeko mu bangula mina mi Mose. 3Lufweti batumimina na lufweti sadila mimvimba mi bakwe lulonganga, kansi lulandandi nkadulu awu ko, mu dyambu ti mi bakwe tanga, bakwe mye sadilanga ko. 4Yawu bakwe kanganga bifunda bi kizitu mpe bakwe twikanga byo ha mahembo ma bantu, kansi yawu bende bakwe nikunanga nakani mulembo wumosi ko mu simba byo. 5Misamu mimvimba bemyomyo bakwe mye hidikilanga, mwanki bantu ba bayena. Ni hahoho, bakwe yikanga bunene bu mimbamba misonama bibuku bi mambu ma Nzambi, mi bakwe kanganga ha mbunzu na mu moko mawu. Mpe bakwe yikanga nsongi zi biyunga byawu mwanki biba bibila. 6Bakwe tyanga mu zakala mu byandu bintete mu ntangu yi minkembo mi zindambisa na mu byandu bintete mu zinzo zi lusambulu zi Bayudayo, 7bakwe tyanga benda bahekingi mbote zi buzitu mu byanzala, na bantu benda batumisiningi ti: “Mulongisi”. 8Kansi yeno, lutambulandi ko ba lutumisina ti: “Mulongisi”, mu dyambu ti Mulongisi wumosi kwandi wuu neeno, yeno na yeno mpangi na mpangi ludi. 9Na lutumisinandi nakani muntu ko ha butoto ti: “tata”, mu dyambu ti “Tata” dimosi kwandi dii neeno, ni dyadyodyo di ku yulu. 10Lutambulandi ko ba lutumisina ti: “Ntwadisi”, mu dyambu ti “Ntwadisi” yimosi kwandi yii neeno, ni Klisto. 11Yondowo hyokidi mfunu ha kati dyeno fweti ba kisadi kyeno. 12Wonso waakizangula baamukulula na wonso waakikulula baamuzangula.»
Yesu wusemba milongisi mi Misiku na Bafalisi
(Mlk 12.40; Luk 11.39-52; 20.45-47)
13«Kyadi ku yeno milongisi mi Misiku na Bafalisi, yeno lu bantu ba diisu ku nsye lukaya! Yeno lukwe kanganga mwelo wu Kimfumu ki mazulu ku bantu, yeno bende lukwe kotanga mo ko, mpe lukwe kakidilanga yobobo batidi mu kota momo, bakota.»
14[«Kyadi ku yeno milongisi mi Misiku na Bafalisi, lu bantu ba diisu ku nsye lukaya! Lukwe zyonanga bima bimvimba bi mafoola, na lukwe sanga zinsambulu zizila mu kiyenikisa. Ni hahoho, lwaatambula mfundusu yi hyokidi kitezo.»]
15«Kyadi ku yeno milongisi mi Misiku na Bafalisi, lu bantu ba diisu ku nsye lukaya! Lukwe zyetanga mu bifulu bimvimba bii ha butoto na bi mubu mu baka nakani wumosi wu viludi madyela, na bu lumubeki, lumukitudi mwana waatubu ku tiya tu mbungulu, kuhyokidi bitezo byole na yeno.»
16«Kyadi ku yeno, mintwadisi mi zimpofo! Lukwe tanga ti: “Tala ti muntu didi ndefi mu nkumbu nzo-Nzambi, yi mfunu ko, kansi tala ti muntu didi ndefi mu wola di nzo-Nzambi, fweti vumina ndefi andi.” 17Yeno bizengi na zimpofo zi nani ludi! Nki bihyokidi mfunu, wola, hoti nzo-Nzambi yikwe sanga ti wola diba di longo e? 18Lukwe tanga dyaka ti: “Tala ti muntu didi ndefi ha ziku di bakwe yokilanga minkayulu, yi mfunu ko, kansi tala ti muntu didi ndefi mu minkayulu mi ha ziku bedyodyo, fweti vumina ndefi andi.” 19Yeno zimpofo zi nani ludi! Nki bihyokidi mfunu, munkayulu, hoti ziku di bakwe yokilanga minkayulu e? 20Wonso didi ndefi ha ziku di bakwe yokilanga minkayulu, didi yo mu nkumbu yi ziku di bakwe yokilanga minkayulu, na mu nkumbu yi bimvimba bi ha yulu ziku, 21wonso didi ndefi mu nkumbu yi nzo-Nzambi, yandi didi yo mu nkumbu yi nzo-Nzambi, mpe mu nkumbu yi yondowo kwe zinganga momo, 22wonso didi ndefi mu nkumbu yi mazulu, didi yo mu nkumbu yi kyandu ki kintinu ki Nzambi, mpe mu nkumbu yi yondowo wu wuzakala hoho.»
23«Kyadi ku yeno milongisi mi Misiku na Bafalisi, lu bantu ba diisu ku nsye lukaya! Lukwe haananga kibuku ki kumi-kumi ki bikola bi bonso manzulu, na mwa makaya ma mfuku yimbote mpe na mwa mbutu zi mumpila-mumpila, kansi lukwe zimbakananga mu sadila misamu mi lutidi mfunu mu Misiku bonso: lunungu, nkenda na kiminu. Misamu myamyomyo lufweti sadila, ka mu zimbakana minkaka ko. 24Yeno mintwadisi mifwa meso ludi! Lukwe kyenzanga malamu mu katula nzi, na lukwe minanga kibulu ki nkumbu samo.»
25«Kyadi ku yeno milongisi mi Misiku na Bafalisi, lu bantu ba diisu ku nsye lukaya! Lukwe toma sukulanga manima ma mbungu na ndonga zeno, kansi ku kati ku fuluka mu bima bibwivi na mpwila zimbi. 26Ngeye mufalisi wufwa meso wudi! Teka sukula ntete kati di mbungu, mboki manima mandi maavedila.»
27«Kyadi ku yeno milongisi mi Misiku na Bafalisi, lu bantu ba diisu ku nsye lukaya! Lufwanakani bonso zindyamu zii bakusidi mpemba, zikwe yenikanga zimbote ku mbazi, kansi ku kati zi zifuluka mu bihisi bi zimvumbi, na bima bi mumpila-mumpila bimana bola. 28Yeno mpe bumosi, lukwe yenikanga ku mbazi bonso bantu baludedomo, kansi ku kati ludi bafuluka mu diisu ku nsye lukaya, mpe mu misamu mimbi.»
29«Kyadi ku yeno milongisi mi Misiku na Bafalisi, lu bantu ba diisu ku nsye lukaya! Lukwe tungilanga mimbikudi zindyamu zintoko, mpe lukwe tomisanga zindyamu zi bantu ba lunungu, 30na lukwe tanga ti: “Tala ti tuzinga mu ntangu yi matata meto, nganunu tuba kintwadi nawu ko mu tengola menga ma ba mimbikudi.” 31Bwabu, lulonkidi yeno bende ti baala ba yobobo bahonda mimbikudi ludi. 32Ee! Tatamaneeno mu manisa kisalu kitona matata meno. 33Yeno zinyoka ludi, kanda di zimpidi! Bwedi lulendi tinina kitumbu ki tiya tu mbungulu e? 34Ni hahoho, meno nalutambikidi mimbikudi, bantu ba ndwenga na milongisi mi Misiku. Lwaahonda na lwaakoma ha kulunsi bahiika, mpe lwaazuba bikoti bahiika dyaka mu kati di zinzo zi lusambulu zi Bayudayo, na lwaabayenisa mpasi mu mbanza ka mbanza. 35Mwanki, kitumbu ki menga ma bantu ba lunungu ma matengolo ha butoto ki lubwila, tuuka menga ma Abeli, wuba muntu lunungu natee ku menga ma Zakaliya, mwana Balaki wu bahonda ha kati-kati di ziku di bakwe yokilanga minkayulu na kibuka kilongo. 36Kedika nina luteela: kitumbu ki misamu bemimi mimvimba kyaabwa ku mbandu beyiyi!»
Yesu wudila mu dyambu di mbanza yi Yelusalemi
(Luk 13.34-35)
37«Yelusalemi! Yelusalemi! Ngeye kwe hondanga mimbikudi mpe kwe hondanga mu matadi bantu bakwe ku tambikanga Nzambi! Ntangu zizingi natiidi mu kutikisa baala baku bonso nsusu bu kakwe kosilanga baala bandi ku nsye mahahi mandi, kansi lutiidi eno bo ko! 38Nkatika bwabu, nzo eno ya baabwongola. 39Ni hahoho, nina luteela ti: Lwaabwesa nyena ko natee kilumbu ki lwaata ti: “Bika Nzambi kasakumuna muntu wuna kwiza mu nkumbu yi Mfumu!”»
Currently Selected:
Matayi 23: dde Ddo
Highlight
Share
ਕਾਪੀ।
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.