oMatiyu 17
17
Oyesu yi iyinu sha
(oMak 9.2-13; oLuka 9.28-36)
1Itikpi ke eni ihiri Oyesu zo Obitrus kpo Oyakubu kpo Oyohana oyinanu kweyi byuwa gi iso ke efu jigiri awa fufuwa. 2Ebebeni Oyesu yi iyinu sha obutuwa, aheyi nu yu bye enoni, kweyi oshiye nu pya wo nehe purututu. 3Ebebeni Omusa kpi Iliya bose da awa kweyi ba kela kpo Oyesu. 4Obitrus ka do Oyesu mo, <<Adole, oshoshi ni aha bebeni. Owoni okyogwu, ahan gwa adaba eta ebeni, oye wa akakoho, oye wa ko Omusa, oye wa ki Iliya.>> 5Ni oyipu kela ya ka ni oyoyu ko okpowuso yuwagwu, kweyi oko kela bwo okpowuso ya kamo, <<Omani wo Oyi hin la, ni nyya yimu ni, kpa anu otu hin ya sha. Ala pwela nu!>> 6Ishini awogboso pwo mani ni oshi yuwa kwu, agbo kweyi yi iyi ka agye. 7Ebebeni Oyesu wa gawa abo mo, <<Ana yiso, ana ka yoshi lo.>> 8Ishini angi iyi iso ni, ama ashishi lo so Oyesu. 9Ishini aba sa bwi iso ke efu ni, Oyesu pyuwa akpaha mo, <<Ana ka ka da ashishe oza ni ama ni lo, so Oyi ka Asuse nyiso ipu ka amiri.>> 10Awogboso do oka mo, <<Ojiya ni awofono ba kamo inobane Iliya pini yawa ikyikyo la?>> 11Oyesu ka da awa mo, <<Ko tata, Iliya yawa kweyi wa kyoza kpiri atu. 12Nyya ka dala, Iliya kwobonu wawa, ake agyo lo, kweyi ayo oza ni aba yimu ni. Mamani Oyi ka Asuse yawa mowe abo wa.>> 13Ebebeni awogboso gye mo oya kela kpa awa ikweyi ko Oyohana ino Obatisma la.
Oyesu do oyi ni gbo omaku bibi ni ogege ki ikpiye
(oMak 9.14-29; oLuka 9.37-43a)
14Ishini awe ebe ke ewa ni, ongo oye we ebe ko Oyesu kweyi wa kwagye obutu nu kweyi kamo, 15<<Adole, miyinyinyi ko oyin, ogbo ose ki ikpikpi, oya mowe nwashika. Ishi nwashika oya gbo go ola kwe ipu ki inyo. 16Nbyo we ebe ka awogboso, agege ko dano ogege ki ikpiye lo.>> 17Oyesu ka da awa mo, <<Ala ase ki ishi mani, awine ko otuse gbayayi kpo oza bibi, gbi ishi wonya ni nyya yagye kpa ala? Gbi ishi wonya ni nyya gbotu kpa ala? Ala byo we ebeni.>> 18Ebebeni Oyesu gbo omaku bibi eha, kweyi obose shi ikpiye ko oyi oni. Bwi ishi oni opyo ogege ki ikpiye nu. 19Awogboso webe ko Oyesu ishini oyagye anu fufunu ni kweyi ado oka mo, <<Ojiya ni aha gege ko ngmo omaku bibi shi ikpiye ko oyi oni lo?>> 20Oyesu ka da awa mo, <<Koni otuse kala yo ti ni. Nyya ka dala okwokwoshi, owoni ala gbo otuse ti byi ikpo ko omusta, ni yo ti ipu ki ikpo ki izire ni, ala ba gege aka de efu mani mo, na ja ga anoni kweyi oya ja ga. Ojije ya sha ala oshu lo.>> 21Edo ko omaku bibi mani ba bose kin lo, tinarigwu kpo okunu kwokwu.
Oyesu kela ikweyi ki ikwu nu
(oMak 9.30-32; oLuka 9.43b-45)
22Ishini awogboso wa gbayi Ogalili ni, Oyesu ka da awa mo, <<Aba yo Oyi ka Asuse ya ra da awobonya nu, 23aba yo ngmo, kweyi eno ko me eta Owuso ya shiyi bwi ipu ka amiri.>>
Ebeni awogboso byo otu ko tata.
Egba zoze ole ko Owuso.
24Ishini Oyesu kpa awogboso wo Okapanahu ni, awo zegba epa kole ko Owuso wa to Obitrus kweyi do oka mo. <<Adole kala ya zegba kole ko Owuso lo la?>> 25Oka da awa mo, <<Oya sore.>>
Ishini Obitrus wo ole ni, Oyesu wa kikyikyo ni kela kpa anu ni mo, <<Oji ni oma ipu ko oka doda mani Osaminu? Bwe ebe ka anoho ni awose kese mani ba zegba, bwe ebe ka ayiwa kwe ebe ko ogboga?>> 26Obitrus ka danu mo, <<Bwe ebe ko ogboga.>>
Oyesu kamo, <<Ayi wa ba ze lo oma.>> 27<<Ni olemani, ahan ka yotu wa na bya kpa aha lo, ala gi ishu ga she eya. Ala gwo okwunu ke ebinyi ni ala kwu kikyikyo, ikwiri ni opye, ga zegba ka aha kpa anu.>>
Currently Selected:
oMatiyu 17: ALA
Highlight
Share
ਕਾਪੀ।
Want to have your highlights saved across all your devices? Sign up or sign in
THE WORD FOR THE WORLD INTERNATIONAL, THE WORD FOR THE WORLD NIGERIA