ရှင်လုကာ 13
13
အခန်း (၁၃)
ဖုလော်လာမ်းမာလ်မောင်ငေါလ်
1အင်မ်ချိန်ငေါလ် ခေါင်တချို့ ကိုယ်တော်စငေါလ် လူးထေ့နား မယ်ဟိလ့်တိနှိုပ်လှီ့အောလ် အုပ်ချုပ်တိအလန်းဆုံးပိလတ်နား ဖုလော်ရှင် ပူဇော်ခေါမ်စိုင်းတိလှီ့ ဂါလိလဲဆော်လှီ့အချို့ စစ်ဆော်လှီ့တိထေ့နား အဓူးဝေဆောက်ခေါမ်အကြောင်း အာမ်ဆိုက်ယေ။ 2အင်မ်ဟိုဝေါလ် ကိုယ်တော်ယေရှုနား “အင်မ်ဂါလိလဲဆော်လှီ့နား ဂါလိလဲရိုးမယ်တိ အစွာခေါင်လှီ့ထောက်ကာလ် ပိုဝေနား အပြစ်ဒုစရိုက်လန်ခန်းနောလ် နီဘော်အာမ်ခမ်းလောဒ့် တိရို နာမ်ခိန်နာ။ 3အင်မ်ဘော်ဆီးယော်။ နာင်မီးရိုး ကေးနား ဟောင်ဟိုင်ဝိုက်။ နာင်မီးခါ နာမ်ပြစ်လှီ့ နောင်တသံဝေဂ နာမ်လောဒ့်ဘွာလ်ယနားစေး အင်မ်လှီ့ဘော် နာမ်ပျက်စီးလောဒ့်အိုက်#13:3 ပျက်စီးလောဒ့်အိုက်နောက်ခေါမ် ခေါင်ဆောက်င်ခါ လုန်ဝိညာဉ်ခါ ဘာလ့်လောဒ့်အိုက်တိရို အဓိပ္ပာယ်လောဒ့်။။ 4ဂါလိလဲလုပြင်ငေါလ်မယ်တိ ရှိလောင်မျှော်စင် အပြိုဟိုဝေါလ် ခေါင်ကုလာဆာတ့် အကပ်နောက်ခန်းနောလ် အာမ်ဘာလ့်ဟိလ့်လောဒ့်။ အင်မ်ခေါင်လှီ့ ဂျေရုဆလင်လုအောလ်မယ်တိအစွာခေါင်လှီ့ ထောက်ကာလ် ပိုဝေနား အာမ်ပြစ်လန်တိလှီ့ တိရို နာမ်ခိလ်နာ။ 5အင်မ်ဘော်လုံးဝ ဆီးယော်။ အင်မ်ဘော်နားခါ နာင်မီးရိုး ကေဟောင်ဝိုက်။ နာင်မီးခါ နာမ်ပြစ်တောလ်ကိနောင်တသံဝေဂ နာမ်လောဒ့်ဘွာလ်ယနားစေး အင်မ်လှီ့ဘော် နာမ်ပျက်စီးလောဒ့်အိုက်” တိရို အမိန့်။
အဌေ့ဌေးယတိဆပိထိင်း ပုံဥပမာ
6အင်မ်ပါလ်နောလ် ကိုယ်တော်နား အတပည့်လှီ့အောလ် ပုံဥပမာဝေါလ် အမိန့်ခေါမ်စေး “ခေါင်ပွလ်ဟှတ်နား အပုန်းဟို့စပျစ်ခြံငေါလ် ဆပိထိင်း ထိင်းဟှတ် အလိမ်း။ နှိုပ်ဟှတ်တောလ်စေး အင်မ်ခေါင်နား ဆပိဌေ့ဌေးခေါမ်အချိန်ငေါလ် ဓေါ့်ဟိုင်အဈာတ်ဟိုဝေါလ် အီဘောင်အဌေ့ခါ မှူးယော်။ 7အင်မ်ခန်းနောလ် အင်မ်နား ဥယျာဉ်မှူး ပါနယ်ထေ့နား ‘ဓေါ့်ဝြား။ ကေးနား ကုမ်ထုမ်တိတိ နီဆပိထိင်းငေါလ် အဌေ့ဆူလူးနားခါ မှူးဟီ။ နီထိင်းခူးဝြား။ ဟိဘော်ဟိုင်ရိုးနောက်ဟိုဝေါလ်စေး နီထိင်းနား သပ့်အကျိုးမယ်ကော် အဓိလ်အကာယေ’ တိရို အဟောင်။
8အင်မ်ဘော်နားခါ ဥယျာဉ်မှူးနား ‘သခင်ငါး၊ နီအထိင်း အထာကုမ်ဟှတ် တောမိုဝြား။ ကေးနား နီအထိင်း ကီးကာဝေါလ်ကိ သပ့်တူးဆွထေ့နား မြေဩဇာ ကေတောဒ့်မိုဝိုက်။ 9အင်မ်ဘော်စိုင်းနားစေး အထာကုမ်ဟှတ်တောလ် အဌေ့ဌေးဘွာလ်ခွတ်ဟာမ်း။ အပုံငေါလ် အဌေ့ဌေးတီးယနားစေး ခူးခွတ်’ တိရို အဟောင်” တိရို အမိန့်။
ဥပုသ်နှိုပ်ပါလ် မုတောပွလ်ဟှတ် ဓူပက်ခေါမ်
10ဥပုသ်နှိုပ်နှိုပ်ဟှတ်တောလ် ကိုယ်တော်ယေရှုနား ဓမ္မာရုံရုံဟှတ်တောလ် ဖုလော်ရှင်နှုတ်ကပတ်တော်လှီ့ အဆောင်ပက်။ 11အင်မ်ဓိလ်နောလ် ကုမ်ကုလာဆာတ့်ဓီဟနောလ် နောတ်ဆီး ပူးကပ်ခံလောဒ့်ခန်းနောလ် စိုင်းယအောလ်ထောလ်ထေ့နား ရုန်ကုပ်ထေ့နား ရုန်တုလ်ခွတ်ယတိ မုတောဟွလ်ဟှတ်အမယ်။ 12ကိုယ်တော်ယေရှုနား အင်မ်မုတော အမှူးဟိုဝေါလ် အကာဝေါလ်ပါရ်နယ်ထေ့နား “မုတောဝြား၊ နာင် တုအောလ်ကထုစအယ်နား နာရောဂါခိလ်ဘွာလ်ပါလ်” တိရို အမိန့်။ 13အင်မ်ပါလ်နောလ် အကွတ်တောလ် အင်မ်မုတော အရုန်အလှမ်းဟိုဝေါလ် ချက်ချင်းကုံး အင်မ်မုတော အရုန်အဆန့်ဘွာလ်ခွတ်ခန်းနောလ် တုလ်ထေ့နား ဖုလော်ရှင် အချီးမွမ်းလှာလ်။
14အင်မ်ဘော်နားခါ ဓမ္မာရုံတာဝန်ခံ ပုတောနား ဥပုသ်နှိုပ်ပါလ် ကိုယ်တော်ယေရှုနား အင်မ်မုတော အဓူပက်ခန်းနောလ် အလုန်ဆဆု။ အင်မ်ဘော်ခန်းနောလ် အင်မ်နား ခေါင်လှီ့အောလ် “ပတ်ဟှတ်တောလ် နှိုပ်ဆောပ့် အလုပ်လုပ်ဟိုင်ပညတ်တော်နားခွင့်အပြု။ အင်မ်နှိုပ်လှီ့အောလ်ယောင် ဓူဝေထေ့နား ဥပုသ်နှိုပ်ပါလ် ဓူဝေကော့စူး” တိရို အဟောင်။
15ကိုယ်တော်နား “ခေါင်ပွန်ဟန်ဆောင်တိလှီ့အား။ ဥပုသ်နှိုပ်ပါလ် နာင်မီးစငေါလ်မယ်တိ ဆာလှီ့လား ဆာ့လှီ့ ဆာရုံငေါလ်ကိ ရွရ်ဆွီ့ထေ့နား သွီပို့ဟိုင်နာမ်ဈိဆီးယော်ဝြာ။ 16အင်မ်ဘော်နောက်ဟိုဝေါလ်စေး ကုမ်ကလာဆာတ့်လုံး နောတ်ဆီးပူးကပ်ခံဟိလ့်လောဒ့်တိ အာဗြဟံနား အစိုးဝေါလ်ထောလ်တိ နီမုတောခါ ဥပုသ်နှိုပ်ပါလ် လှိပက်သင့် ဆီးယော်ဝြာ” တိရို အမိန့်ဘွာလ်။
17အင်မ်ဘော် ကိုယ်တော်နားအမိန့်ဟိုဝေါလ် ကိုယ်တော်ဆန့်ကျင်တိလှီ့တွက် အာမ်ယှောက်ကယ်လောဒ့်နားခါ တစွာခေါင်လှီ့စေး ကိုယ်တော်နား အင်မ်ဘော်စိုင်းခေါမ် စါစ်နောက်ဟိုင်လှီ့အမှူးလောဒ့်ခန်းနောလ် တပြင်းအာမ်ပျော်။
မုန်ညင်းလား ဟန်း(င်)ပုံဥပမာ
(ရှင်မဿဲ ၁၃:၃၁-၃၂။ ရှင်မာကု ၄:၃၀-၃၂)
18ကိုယ်တော်နား “ဖုလော်သာသနာတော်ခေါမ် ဟအီဓေါလ် အတူဝေ။ ဟိအီဓေါလ် နှိုင်းယှဉ်လောဒ့်အိုက်နောက်ဟိုဝေါလ်စေး 19အင်မ်နောက်ခေါမ် မုန်ညင်းစီးဓေါလ်#13:19 ဂျူးခေါင်ယှီလှီ့ မယ်နောက်ကာလ် ဈာတ်တိမုန်ညင်းစီးနောက်ခေါမ် အစီးစေးဒိပ်ခိတ်ထေ့နား အထိင်းစေး ဟမီးလာမ်းမာလ်မယ်တိ ယီထိင်းဘော် အထိင်းလန်တိ။ အတူဝေ။ ခေါင်ပွလ်ဟှတ်နား မုန်ညင်းစီး ဥယျာဉ်ဒုလ့်ကာလ် အလိမ်း။ အင်မ် အစီးရိုးကထု ဈာတ်လူးထေ့နား အထိင်းလန်လူးဟိုဝေါလ် အပါ့လှီ့အောလ် ဟိုးလှီ့ အဘူးဆောက်ထေ့နား အာမ်မယ်ခွတ်” တိရို အမိန့်။
20အထာကွန်ဟှတ် ကိုယ်တော်နား “ဖုလော်ရှင်သာသနာတော် ဟအီဓေါလ် နှိုင်းယှဉ်လောဒ့်ဟာမ်းမိုက် နောက်ဟိုဝေါလ်စေး 21အင်မ်နောက်ခေါမ် ဟန်း(င်)ဓေါလ် အတူဝေ။ မုတောပွလ်ဟှတ်နား ဟန်း(င်)မက်စောလား ဂျုံမှုန့် ပုံထုမ်စာဘောင်ငေါလ် ဆာမ်းထေ့နား အနှောပ်ဟိုဝေါလ် မုန့်လှီ့ ပွလူးခေါမ်ဓေါလ် အတူဝေ” တိရို အမိန့်။
ဆောလ့်ပေါက်ဒိတ်ခိခ်တိ
(ရှင်မဿဲ ၇:၁၃-၁၄၊ ၂၁-၂၃)
22အင်မ်ပါလ်နောလ် ကိုယ်တော်ယေရှု ဈာတ်နောက်လာမ်းမာလ် လုလှီ့၊ နာမ်းလှီ့အောလ်ကိ ခေါင်ထုပရိတ်သတ်လှီ့အောလ် ဖုလော်ရှင်နှုတ်ကပတ်တော်လှီ့ ဆောင်ဗာန် ဂျေရုဆလင်လုအောလ် အကြွ။ 23အင်မ်ဟိုဝေါလ် ခေါင်ပွလ်ဟှတ်နား ကိုယ်တော်ဝေါလ် “ဆလော်ဝြား၊ ခေါင်မက်စောနားယောင် ကယ်တင်ခေါမ် အာမ်ခံလောဒ့်အိုက်ယာ”
တိရို အဟိ့။ 24ကိုယ်တော်နားခါ “ဖုလော်ရှင်သာသနာတော်နောက်ခေါမ် ဒိတ်ခိခ်တိဆောလ့်ပေါက်ဓေါလ် အတူဝေ။ နာင်မီးခါ ဒိတ်ခိခ်တိ ဆောလ့်ပေါက်ကာလ် ဝင်ငေါလ်လောဒ့်ဟနောလ် တပြင်းကြိုးစားဘွတ်စူး။ ဟိဘော်ဟိုင်ရိုးနောက်ဟိုဝေါလ်စေး ခေါင်လှီ့နား အင်မ်ဆောလ့်ပေါက်ကာလ် ဝင်ခွတ်ဟိုင်တပြင်းအာမ်ကြိုးစားနားခါ ဝင်ခွတ်ဟိုင်ဆီးယော်ဟ။ 25အိမ်းမို့ ထောလူးထေ့နား ဆောလ့်အပိတ်နားစေး နာင်မီးခေါမ် အပြင်ငေါလ် တုလ်ထေ့နား ‘အရှင်ငါး ဆောလ့်ဖွင့်ပက်မိုဝြား’ တိရို နာမ်ဟောင်လောဒ့်အိုက်။
အင်မ်ဘော်နားခါ အိမ်းမို့နား ‘နာင်မီး ကေစုတ်င်ယဘော် ဟိဘောင်ငေါလ်ကိ နာမ်လူးနောက်ခေါမ် စူးဟီ’ တိရို အဟာင်ဘွာလ်ဝိုက်။
26နာင်မီးနား ‘ကေးမီး အရှင်ဓေါလ်ဟှတောလ် ကာမ်အေဟိလ့်ဟဖူ။ အရှင်နားခါ ကေးမီး မယ့်နောက် လုလှီ့ နာမ်းလှီ့အောလ်ခါ တရားတော်လှီ့ နာဟောဟိလ့်ဖူ’ တိရို နာင်မီးနား ဟောင်နားခါ
27အင်မ်နား ‘နာင်မီး ကေစုတ်င်ယဘော် ဟိဘောင်ငေါလ်ကိ နာမ်လူးနောက်ခေါမ် စူးဟီ။ ကေးစငေါလ်ကိ ဈာတ်ဘွာလ်ဝေါလ်။ နာင်မီး ပွန်ယတိခေါင်လှီ့ယောင်’ တိရို အဟောင်ဘွာလ်ဝိုက်။
28ဖုလော်ရှင်သာသနာတော်ဝေါလ် #13:28 အာဗြဟံ၊ ဣဇက်၊ ယာကုပ်တိနောက်ခေါမ် ဂျူးခေါင်လှီ့နား အာမ်ဆွား။အာဗြဟံ၊ ဣဇက်၊ ယာကုပ်လား ပရောဖက်လှီ့ကိမ်ကိမ် မှူးလောဒ့်ဗာန် နာင်မီး အပြင်ငေါလ် ဆှုတ်ခေါမ် နာမ်ခံလောဒ့်ခန်းနောလ် အံကြိတ်ဗာန် နာမ်ကာပ်လောဒ့်အိုက်။ 29အင်မ်ပါလ်နောလ် ဓိလ်တိုင်ငေါလ်ကိ ဂျူးခေါင်ယှီဆီးယတိလှီ့ခါ ဖုလော်ရှင်သာသနာတော် ဒုလ့်ကာလ်မယ်တိလှီ့ဓေါလ် ဟှတ်တောလ် ငွာဟထေ့နား အေပွန်အောတ့်ပွန်လှီ့ အာမ်အေအူးလောလ့်အိုက်။ 30တုအောလ် အရေးပါယတိလှီ့နောက်ခေါမ် ဆာဝေါလ် အရေးပါတိလှီ့အောလ်ထောလ်ထေ့နား တုအောလ် အရေးပါတိလှီ့စေး ဆာဝေါလ် အရေးပါယတိလှီ့အောလ် အာမ်ထောလ်နိုက်” တိရို အမိန့်။
ကိုယ်တော်ယေရှုလား ဟေရုဒ်
(ရှင်မဿဲ ၂၃:၃၇-၃၉)
31အင်မ်ချိန်ငေါလ် ကိုယ်တော်ယေရှုစငေါလ် ဖာရိရှဲအချို့လှီ့ ခိုက်လူးထေ့နား “အုပ်ချုပ်တိ ဟေရုဒ်နား နာင် ဓုတ်ဟိုင်အလီခန်းနောလ် နီဓိလ်နောလ်ကိ အစွာဝေါလ် ဈာတ်တား” တိရို အာမ်လျှောက်။
32အင်မ်ဟိုဝေါလ် ကိုယ်တော်နား အင်မ်ခေါင်လှီ့အောလ် “ကောက်ကျစ်တိ ခီဝါဓေါလ်တူဝေတိ ဟေရုဒ်ကာလ် ဈာတ်ထေ့နား ဟောင်ဝေဘွတ်စူး။ ကေးနား တုနှိုပ် ငူတိအောလ် နောတ်ဆီးလှီ့ဆှုတ်ထေ့နား စာန်းယတိလှီ့ ရောဂါလှီ့ ကေဓူပက်မိုဝိုက်။ အထုမ်နှိုပ်ပါလ်စေး ကေးအမှုလှီ့ အဆုံးကေသတ်ရိုက်။ 33အင်မ်ဘော်နားခါ ကေးခေါမ် တုနှိုပ် ငူတိ အထာနှိုပ်လှီ့အောလ်စေး ဂျေရုဆလင်လုအောလ် ခရီးကေဈာတ်လောဒ့်ဟာမ်းမိုက်။ ဟိဘော်ဟိုင်ရိုးနောက်ဟိုဝေါလ်စေး ပရောဖက်လှီ့နောက်ခေါမ် ဂျေရုဆလင်လုအောလ်ကိ လွဲထေ့နား အစွာဓိလ်လှီ့အောလ် အာမ်ဘာလ့်လောဒ့်နောက်ခေါမ် မယ်ယော်” တိရို အမိန့်
ဂျေရုဆလင်လုတွက်ကာလ် ကိုယ်တော်အကာပ်ခေါမ်
34အင်မ်ပါလ်နောလ် ကိုယ်တော်နား “အို ဂျေရုဆလင်လုဆော်လှီ့၊ ဂျေရုဆလင်လုဆော်လှီ့ နာင်မီးနား ပရောဖက်လှီ့ ဓူးထေ့နား ဖုလော်ရှင်နား နာင်မီးစငေါလ် အတိလူးခေါမ် စေတမန်လှီ့ခါ လုံးငေါလ် နာမ်ခုန်ဟိလ့်။ အာနူးနား အစိုးလှီ့ အဖာကွားဝေါလ် အုပ်ကယ်နား အတောဒ့်ကယ်ဘော် ကေးနားခါ နာင်မီးစောင့်လျှောက်ဟိုင် ကေလီခန်းနောလ် အကြိမ်ကြိမ် ကေကြိုးစာဟိလ့်နားခါ နာင်မီးနား လီယော်စု။ 35ဓေါ့်ဝေါလ်။ နာင်မီး ဗိမာန်တော်ခါ စွန့်ပစ်ခေါမ် ခံလောဒ့်အိုက်။ နာင်မီးရိုး ဟောင်ဟိုင်ကေလီခေါမ်စေး ‘ဖုလော်ရှင်နာမတော်ဓေါလ် ကြွလူးတိ အရှင် ကာမ်ချီးမွမ်း’ တိရို နာမ်ဟောင်ယဝှေ့ ကေး နာင်မီးနား အထာကွလ်ဟှတ် မှူးလောဒ့်ဟိုင် ဆီးယော်စူး” တိရို အမိန့်။
Currently Selected:
ရှင်လုကာ 13: CSJ
Highlight
Share
ਕਾਪੀ।
Want to have your highlights saved across all your devices? Sign up or sign in
Chin Songlai (ဆောင်လိုင်) Bible by Beyond Translation is licensed under Creative Commons Attribution-ShareAlike 4.0 License.
