انجیل متی 23
23
وای بر شاما
1اَدمی عیسی مردمنه و اِشتن شاگردانش ایزِه باته: 2«توراته معلمین و فَریسی فرقه علما موسی پیغمبر یاگاک نِشتنده. 3هر چی شامانه واتَرنده، گوش آدیا و اَ کاره بِکَراه؛ امّا چوان کاران شوار مکرا! چون اِشتن هر چی که آموتَرنده، عمل نکرنده. 4سنگینه باران مردمه دوشَه سرک اَنییَرنده، امّا اِشتن حاضر نینده چوه لِوانسنه را حتی اِشتن انگوشته بزننده. 5هر کاری کرنده چِمه رایه که اِشتن مردمه آماننده: اَوه مقدسه نیویشته ان بسته بسته کردنده و اِشتن تَقال و اِشتن بازوک دوندنده و اِشتن خَلوعه دامنه زانسَکینه ایی دُراز دوجنده. 6خَشنده جشنه دله مجلسه سرین وَرک بنشنده و عبادتگاهانک چاک ترین یاگاک بدارنده، 7و مردم کوچه و بازارانک چوان را سلام بکرنده و اَوان نه ”استاد“ باجنده. 8امّا شاما مرزا شامانه ”استاد“ باجنده، چون که فقط ایگله استاد دارا، و شاما هندیگرنه براران. 9هیچ کسینه گله سرک ”په“ مواجا، چون فقط ایگله په دارا که آسمانکه. 10و مرزا شامانه ”معلم“ باجنده، چون فقط ایگله معلم دارا که مسیح اِسه. 11اَوی که شاما میانک همان پیله تره، گه شاما نوکر بیبی. 12هر کسی اِشتن کفا ببره، خوار بی و هر کسی اِشتن فروتن بکره، سر بلند بی.
13«وای بر شاما ای توراته معلمین و فَریسی فرقه علما، ای دو دیمان! شاما آسمانه پادشاهی بَره مردومه را دوسَرانه؛ نه اِشتن دله دیشییرا و نه هَشتَرا اَوانی که گشانه، دلَه دیشینده. 14[«وای بر شاما ای توراته معلمین و فریسیان، ای دو دیمان، شاما ای طرفنه ویوه زَلیان کییه غارت کردَرا و جِدا طرفنَه، اِشتن آمانسَنه را، طولانی دعا کرا. چِمه واسنه، شاما عذاب پر چتین بی.]
15«وای بر شاما ای توراته معلمین و فَریسیان، ای دو دیمان! شاما دریا و خشکی گردا تا ای نفره شاما مرید بکرا امّا وقتی اَوران شاما مرید بکه، اَوه دو برابر شاما اِشتنک بدتر، جهنمه آتش لایق کرا.
16«وای بر شاما ای کورَه راهنمایان، که واجا: ”اگم کسی معبده سر قسم بخره اشکال نداره، امّا اگم معبده قزله سر قسم بخره، گه اَ قسمه عمل بکره.“ 17ای کوره نادانان! کامین مهم تره؟ قزل یا معبد، که قزله مقدس کره؟ 18و واجا که: ”اگم کسی قربانگاه سر قسم بخره، اشکال نداره، امّا اگم اَ قربانی سر که چه قربانگاه سرک نییَه بی قسم بخره، گه اَ قسمه عمل بکره.“ 19ای کوران! کامین مهم تره؟ قربانی یا قربانگاه، که قربانی مقدس کره؟ 20پس، کسی که قربانگاه سر قسم خره، ایزه که قربانگاه و هر چی که قربانگاه سَرکه قسمش خَرده. 21هر کسی که معبده سر قسم خره، ایزه که معبد سر و خدا که معبد دلکه سر قسمش خَرده. 22هر کسی آسمانه سَر قسم خره، ایزه که خدا پادشاهی تخته سر و خدا که تخته سَرک نِشته سر قسمش خرده.
23«وای بر شاما ای توراته معلمین و فریسی فرقه علما، ای دو دیمان! شاما حکم ده یک آدینه حتی نعنوع و شِوید و زیره را انجام دیا، امّا شریعته مهمه احکامه که عدالت و رحمت و وفا داری اِسه، اهمیت ندیا، اِمه چیانی اِسنده که شاما گه انجام بدیا بی اِم که اَدرینانک غِفلت بِکرا. 24ای کوره راهنمایان! شاما پینَشه صافیک اِوِرنا، امّا دَوَعه دُرُسته اَربَرا!
25«وای بر شاما ای توراته معلمین و فریسیان، ای دو دیمان! شاما قدره و دویری بَره تمیز کَرا، امّا چه دله ظلم و طمع نه فته! 26ای کوره فَریسی، اول قدره و دویری دله پاک آکه، که بَرِش نی پاک آبی.
27«وای بر شاما ای توراته معلمین و فَریسیان، ای دودیمان! شاما قبرانی شوارِران که سیبیه آلاوشان کرده که بَرِنه قشنگ دیار آبینده، امّا چوان دِله مَرده هان اَسعه نه و همه مدل نجاساتنه فِتِه! 28ایزه نی، شاما اِشتن مردمه صالح آمانا، امّا دِلَنه دودیمی و بدی نه فِتِران.
29«وای بر شاما ای توراته معلمین و فَریسیان، ای دو دیمان! شاما پیغَمبران را مقبره رچ آکرا و صالحه آدمان قبران چاک چاکینه تزیین کَراه 30و واجا: ”اگم چاما اجداده زمانک بِمان، هرگز پیغمبران کوشتن را اَوانه شریک نِبِسمان.“ 31ایزه، شاما اِشتن ضد شهادت دیا که پیغمبران قاتلان خوردَنِران. 32اِسا که ایزه یه، اَ کاری که شاما اجداده شروع کَرده، شاما تمان آکَرا. 33ای ماران! ای افعی‌زادیان! چنجوره جهنمه مجازاتِک دِوَزا؟ 34چون که از پیغمبران و حکیمه آدمان و معلمان شاما وَر خِرسانِم، شاما بَعضی کوشا و صلیبه سَر کَشا، و بعضی نی اِشتن عبادتگاهانک شلاق زَنا و شهر به شهر اَوان اذیت و آزار کَرا. 35پس، همه‌ی صالحه آدمان خون که اَرَبیه شاما گردن دگنه، صالحه هابیله خونک کَته تا زکریا، بَرخیا زا خون، که چَوه خون معبد مِحرابه و قربانگاه میانک اَربیه ببه. 36حقیقتا، شاما نه واجم، تمان اِم کاران گناه، اِم نَسله گردن دگنه.
37«ای اورشلیم، ای اورشلیم، ای شهری که پیغمبران کوشی و اَ کسی ای که اِشته وَر خيرسانسه بینده سِگ ددار کری! چند را آخاشتمه که ایگله کَرگی شوار که اِشتن کیجه ان اِشتن پر و بال جیرک بیدا آگیرییَه اِشته خُردیان چِمن دویرک بیدا آگیرِم، امّا تِه آنِخاشته! 38اِسا، شاما کییه شاما را خرابه شوار مانه. 39چون شاما نه واجم دَ هنی من نیوینا تا اَ روجی که باجا: ”مبارک اِسه اَ کسی که خداونده نامه نه آیه.“»
Currently Selected:
انجیل متی 23: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company