انجیل متی 16
16
آسمانیه نشانه آخاشتن
1فریسی فرقه عالمه و صَدّوقی فرقه عالمه بامنده عیسی وَر تا اَوه امتحان بکرنده. چِمه واسِنه اَوکشان آخاشته ایگله آسمانیه نشانه‌ای اَوان آمانه. 2عیسی چَوان جَوابِک باتِه: «نمِسیر، که بی واجا ”هوا چاک بی، چون آسمان سوهِیره،“ 3تولیصِبی واجا ”اُوری هوا طوفانی بی چون آسمان سوهیره و گیرسه.“ شاما چاک زانا چونجوره آسمانه دیشتننه چوه وضعیته تعبیر بِکرا، امّا نتانا زمانان نشانه هان تعبیر بکرا! 4اِم نسل شرور و زناکار، ایگله نشانه‌ای گه! امّا هیچ نشانه ای اَوان آدییه نیبی، مگم یونس پیغمبره نشانه.» پس عیسی اَگاردنه بِشه.
فَریسیان و صَدّوقیان خمیر مایه
5وختی بِشنده دریاچه اَ طرفه را، چه شاگرده بزانسشانه ویرشان برکرده اِشتن نه نان اَگیرنده. 6عیسی اَوان نه باته: «ویراجین ببا و فَریسیان و صَدّوقیان خمیره مایک دوری بِکرا .» 7شاگردان اِشتن وَر بحثشان بکرده و باتشانه: «چِمه واسنش ایزه بات که آما اِشتن نه نانمان آورده نی.» 8امّا عیسی اِمش بزانسه و اَوانش باته: «ای کم ایمانان، چیه را چِمه واسنه که نان ندارا همدیگرنه بحث کَردرا؟ 9آیا حلا نی درک نکرا؟ آیا اَ پنج گله نان و اَ پنج هزار نفر و چند گله سَبه که اَ غذا ماندَکران بیدا آکرده به ویرران نییه؟ 10یا اَ هفت گله نان و اَ چهار هزار نفر و چند گله سَبه که اَ غذا ماندَکران بیدا آکرده به ویرران نییه؟ 11پس چیه را درک نکردرا که از شامانه نان درباره لاوم نکه؟ فَریسیان و صَدّوقیان خمیره مایک دوری بِکَراه.» 12اَدمی شاگرده بزانسشانه که عیسی اَوانه نِواتر که اِشتن نانه خمیر مایک دور نیا بدارنده، بلکم اَوانه واتر که اِشتن فَریسیان و صَدّوقیان تعلیمک دور نیا بدارنده.
پِطرُس اعتراف کَره که عیسی، مسیح موعود اِسه
13وختی عیسی آرسس قیصریۀ فیلیپی ناحیه، اِشتن شاگردانکش آپرسس: «مردمه واتَه نه، انسانه زا کیه؟» 14اَوان جواو آدا: «بَعضی واترنده ته یحیای تعمید دهندیش. بعضی نی واترنده ته ایلیای پیغمبرش، و بعضی نی واترنده اِرمیا یا ایگله اَ پیغَمبرانک اِسش.» 15عیسی آپرسس: «شاما چِه واجا؟ شاما واترا از کی اِم؟» 16شَمعون پِطرُس جواو بدا: «تِه مسیح موعودش، خدای زنده زا!» 17عیسی باته: «خَسه ته ببا ای شَمعون، یونا زا! چون اِم حقیقته جسم و خون اِشته را آشکار کرده نییه، بلکه چِمن په که آسمانکه اِشته راش آشکار بکه. 18اَز نی تنه واترم که ته پِطرُسش یانی سِگ، اِم سِگه سَرک چِمن، کلیسا بنا کَرم و هرگیز مرگ قدرت نتانه کلیسا نابود بکره. 19آسمانه پادشاهی آچَران ته آدَیم. اَ چی ای که زمیک دِوَندی، آسمانک نی دِوسه آبی و اَ چی ای که زمیک آکری، آسمانک نی آبی.» 20اَدمی عیسی اِشتن شاگردش قدغن بکردنده که هیچکس نه مواجنده اَ هه مسیح موعود اِسه.
عیسی پیشگویی اِشتن مرگ و مَردانک زنده آبیین درباره
21چَوه پَش عیسی اِشتن شاگردان راش اِم حقیقتش آشکار بکه که گه بیشی اورشلیم شهر و شیخان و سران کاهنان و معلمین توراته دسنه پِره اذیت و آزار بیبی و اَوه بوکوشنده و سُومین روجک گه هنی زنده آبی. 22پِطرُس عیسیش ببه ایگله کناری و سرزانش بکه باتشه: «دور از اِشته جان، آقا! اِنجوره چی هرگز اِشته سر ماییه.» 23امّا عیسی آگردس پطرسه طرف و اَونه باتشه: «منک دور آبش، ای شیطان، ته چِمن راه پَرانه کَتَری تا متانم چِمن کاران بکرم، چون اِشته فکره انسانینده نه خدایی.»
24اَدمی عیسی اِشتن شاگردانه باتشه: «اگم کسی بِگَوشه چِمن پیرو بیبی، اِشتن جانک گه دس اَگیره، اِشتن عذاب و مرگه صلیبه اَگیره و چِمن پشدنه بایه. 25چون هر کی بِگَوه اِشتن جانه نجات آدَیه، اَوه از دست آدَیه؛ امّا هر کی چِمن واسنه اِشتن جانه فدا بکره، اِشتن جانه نیا داره. 26انسان را چه فایده داره که تمان دنیا بداره، امّا اِشتن جانه از دَست بِدَیه؟ یا انسان اِشتن جانه پس اَرکتنه را چه تانه کَردن؟
27«چون انسان زا اِشتن پییر جلالک، اِشتن فرشتاننه آیه و اَدمی هر کسی اعماله واسنه چَوه عوضه آدیه. 28حقیقتن، شامانه واجم، بعضی اِنگا وِندَرسنده که تا انسان زا مَویننده که اِشتن پادشاهیک آمییر، نِمَرنده.
Currently Selected:
انجیل متی 16: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company