انجیل یوحنا 20

عیسی زنده بین

1هفته اولین روجک یانی یکشنبه، تولیصیبی زو، اَدمی که هوا هلا تاریک به، مریم مَجْدَلیّه بامیا مقبره وَر و بیندشه که سِگه مقبره پرانک اَکَته بیا. 2پس ویرتن ویرتن بیشیا شَمعون پِطرُس ور و اَدیرن شاگرد که عیسی اَونه خَش به، و اَوان نه باتشه: «آقاشان مقبرک اَکته و نزانسرام کاشان نییه.» 3پس پِطرُس اَدرین شاگردنه بامه بر، بشنده مقبره طرفه را. 4و هر دو نفر هندیگرنه ویرتَردنده؛ امّا اَدرین شاگرد تندتر بشه، پِطرُس کش پران بیزی و اوّل آرسس مقبره. 5قاط آبه، دیشته و بیندشه که کفن پارچه‌ هان اَگارک اِسنده، امّا دِنشه مقبره دِله. 6شَمعون پِطرُس نی چَه پشدنه بامه و بشه مقبره دله، بیندشه که کفنه پارچه‌ هان اَگارک اِسنده، 7امّا دستمالی که عیسی سره دویره اَپیدشان به کفن پارچه هان ورک نبه، بلکم جدا دسته بییه و علوده یاگایی کی نییه بییه. 8پس اَدرین شاگرد نی که اول آرسَه به مقبره سر، دشه دله و بیندشه و ایمانش بوعرده. 9چون هلا شاگردان مقدس نیوشته هانشان نفهمسه به که عیسی گه مردنه پش زنده بیبی. 10چاوش اَ دوگله شاگرده آگردسنده اِشتن کییه.

عیسی دیار آبیین مریم مَجْدَلیّه را

11و امّا مریمه، بَرِک، مقبره نزدیکی وِندَرسه بییا و بِرمسَردیه. اَوه ایزه که زه برمسردیه قاط آبییا تا مقبره دله دیسیه. 12اَدمی دو گله فرشته بیندشه که سیبیه خلوعشان دکرده به و اَ یاگایی که عیسی شان نییه به، ایگله اَوانک چَوه سر یاگاک و اَدرین چَوه پاچه هان یاگاک نشته بنده. 13فرشته هان مریمنه باتشانه: «ای زلی، چیه را برمسری؟» مریمه جواو بدا: «چِمن آقا شان برده و از نزانسرم کاشان نییه.» 14وختی اِمش باته، آگردسا و بیندشه عیسی اَگا پا وندرسه، امّا اَوش آنزانس. 15عیسی مریمنه باتشه: «ای زلی، چیه را برمسری؟ چیکی پَشه گرسری؟» مریمه ایزه زانسرده که باغبان اِسته، باتشه: «آقا، اَگم ته اَوِر اَکته، منه باج اَوِر کا نییه تا بیشیم اَوه اَگیرم.» 16عیسی مریمش داد بکه: «مریم!» مریمه آگردسا چه طرف و عبرانیان زواننه باتشه: «رَبّونی!» (یانی استاد). 17عیسی مریمنه باتشه: «من دس آمسون، چون هلا پییر ور کفا شییه نییم. امّا چِمن براران وَر بِشه و اَواننه باج که چِمن پییر وَر و شاما پییر وَر و چِمن خدا وَر و شاما خدا وَر شییم کفا را.» 18مریم مَجْدَلیّه بیشیا و شاگردان را خبرش بدا که «از خداوندم وینده!» و اَ چی که عیسی اَونه واتش به، اَوان نه باتشه.

عیسی دیار آبیین شاگردان را

19هَ روج مغربه دم، که هفته اولین روج به، شاگرده هندیگرنه بیدو آبییه بنده و یهودیان ترسک بر قفل به، عیسی بامه و چوان وسطک پا بندرس و باتشه: «سلام بر شاما!» 20وختی اِمش باته، اِشتن دسانش و تَکش اَوان آمانسه. شاگرده خداونده ویندننه شاد آبنده. 21عیسی هنی اَواننه باتشه: «سلام بر شاما! اَجوره زَه که په منش بِخِرسانسم، اَز نی شاما خِرسانِم.» 22وختی اِمش باته، فیش دکه و باتشه: «خدا مقدس روحه اَرگیرا. 23اگم شاما کسی گناهان ببخشا، چَوان گناه بخشسه بی؛ و اگم کسی گناهان مبخشا، بخشسه نیبینده.»

عیسی و توما

24اَ زمانی که عیسی بامه، توما، ایگله اَز اَ دونزده نفر، که دو قلو نی واته بسِه، اَوان نه نِبه. 25پس عَلوده شاگرده اَونه باتشانه: «خداوند مان وینده!» امّا توما اَوان نه باتشه: «تا از اِشتن مِخه یاگا چَه دسانک موینم و چِمن اَنگوشته مِخه یاگان دله مزنم و چِمن دسه چَوه تکه خولَک منیم، باور نکرم.» 26هشت روجه پَش، عیسی شاگرده هنی کییک بِنده و توما اَوان نه بِه. ایزه که بَره قفل بنده، عیسی بامه و چوان وسطک بندرس و باتشه: «سلام بر شاما!» 27چاوش عیسی، توما نه باتشه: «اِشته اَنگوشته اِنگا بنه و چِمن دسان بین، و اِشته دسه بوعه پران و چِمن تکه خولک اَنه و بی ایمان مبش، بلکم ایمان بدار.» 28توما عیسی نه باتشه: «چِمن خداوند و چِمن خدا!» 29عیسی باتشه: «چون منر بیندم ایمانر بوعه؟ خَسه ببا اَ کسانی که نیوینده، ایمان آورنده.»

اِم کیتابه هدف

30عیسی پر علوده علامت و معجزانی شاگردان وَرک انجامش بدا که اِم کیتابک نیویشته بییه نییه. 31امّا اِمه نیویشته ببنده تا ایمان بوعرا که عیسی هَ مسیح موعود، خدا زا اِسه، و تا اِم ایمان نه، چَه نامک ابدی زندگی بدارا.

Currently Selected:

انجیل یوحنا 20: TIT

Highlight

ਕਾਪੀ।