انجیل یوحنا 18
18
عیسی دستگیر بیین
1وقتی عیسی اِم لاوانه پَش، اِشتن شاگردان نه بشه قِدرون دَرَه اَ دیم را. اَ گارک باغی به، و عیسی و چَه شاگرده دِشنده باغ دِله. 2امّا یهودا، کسی که عیسیش خیانت بکه، اَ یاگاش آزانسه، چون عیسی و چَه شاگرده هردَمه اَگا بیدو آبسنده. 3پس یهودا ای دَسته، سربازانک و مامورانکی که سران کاهنان و فَریسی فرقه عالمان طرفنه بنده، اَکتشنده، بامه باغه دله. اَوه فانوس و مشعل و سلاحاننه بشنده اَ گا. 4عیسی، با اِم که زانسِردشه چَه سر گه چِه بایه، بشه پران و اَوان نه باتشه: «چی کی پشه گرسرا؟» 5جواوشان بدا: «عیسای ناصری.» عیسی اَوانه باتشه: «از ه اِسم.» یهودا، اَیی که اَوش خیانت بکه نی اَگا وندرسه به. 6وختی عیسی اَواننه باتشه «از ه اِسِم» اَوه پش پشینه بشنده جیگیسنده گل سر. 7پس عیسی هنی اَوانک آپرسسشه: «چی کی پشه گرسرا؟» اَوان باته: «عیسای ناصری.» 8عیسی جواو بدا: «شاما نه باتِمه که از ه اِسم. پس اگم چِمن پشه گرسرا، بدارا اِمه بِیشینده.» 9اِمش باته تا اَ چیانی که پرانتر واتش به اتفاق دگننده که: «هیچ گله اَ کسانی کی که منر آدییه، ایگله نی از دست آدییَم نی.»
10اَدمی شَمعون پِطرُسه اَ شمشیری که داشتشه، برآوردشا و ایگله ضربه ای بیزیشه کاهن اعظم نوکره و چه راسه گوششه ببریا. اَ نوکر نام مالخوس بِه. 11عیسی پِطرُس نه باتشه: «اِشته شمشیره غلاف آکه! مگم اَ قدره که چِمن پییر من آدییشه، گه آمخرم؟»
12اَدمی سربازه، اِشتن فرمانده همراه و یهودیه ماموران نه عیسی شان دستگیر بکه. چوه دسشان دِوسنده 13اَوه اول عیسی شان ببه حَنّا ور. چون که حَنّا، قیافا زنپه به، که اَ سالک قیافا معبده پیله کاهن به. 14قیافا هَ کسی بِه که یهودیانش نصیحت بکه که چاکتره ای نفر قومه راک فدا بیبی.
پترس عیسی هاشاکره
15شَمعونِ پِطرُس و ایگله علوده شاگردی نی بشنده عیسی پشدنه. چون اَ شاگرد پیله کاهنه آشنایانک بِه. عیسی نه بشه پیله کاهن کییه حیاط دله. 16امّا پِطرُس بَره پشتک بِندَرس. پس اَدرین شاگرد که پیله کاهن آشنایانک به، بَر برشه و اَ زلی نه که دربان بییا نه، لاوش بکه و پطرسش ببه دله. 17اَدمی اَ کنیزی که دربان بییا پِطرُسکش آپرسس: «ته نی ایگله اَ مردکه شاگردانک نییش؟» پِطرُسه جواو بدا: «نییِم.»
18هوا سرد بِه. نوکره و ماموره زغال نه آتش شان آکته به و چه دوییره پا بندرسنده و اِشتنشان گرم آکردرده. پِطرُس نی اَواننه وِندَرسه بِه و اِشتنش گرم آکَردرده.
19اَ موقع پیله کاهن عیسیکش چه شاگردان و چه تعلیمان درباره آپرسسشه. 20عیسی جواو بدا: «از دنیا نه آشکارا لاوم کرده و همیشه عبادتگاه و معبدک که یهودیان بیدا آبیینه یاگایه، تعلیمم دیه و نوینکینه ای چی ای واتم نییه. 21چیه را منک آ‌پرسری؟ اَوانک آپرس که چِمن لاوَشان اَشنوسه! اَوه چاک زانسرنده که اَواننم چه واته.» 22وختی اِمش باته ایگله اَ نگهبانانک که اَگا وِندَرسه به عیسی دیمکش ایگله شپلاقی شی بیزی و باتشه: «پیله کاهنه جواوه ایزه دیری؟» 23عیسی جواو بدا: «اگم اشتبام باته، چِمن اشتباه ثابت بکه؛ امّا اگم راست باتِمه، چیه را من زیری؟» 24چاوش حَنّا اَوش دِوَسه دسانه بخرسانس پیله کاهن، قیافا ور.
25هَ موقع که شَمعون پِطرُس وِندَرسه بِه و اِشتنش گرم آکَردرده، بعضی پطرسک آپرسسشانه: «ته نی چه شاگردانک نییش؟» پطرس حاشاش بکه و باتشه: «نه! نییم.» 26پیله کاهنه ایگله نوکرانک که چَه قوم و خیش به و پِطرُس چَوه گوششه بریه بییا، باتشه: «مگم از اِشتن تم اَونه اَ باغک نیویندش؟» 27پِطرُسه هنی حاشاش بکه. ه لحظک سوکوله بخواندشه.
عیسی محاکمه پیلاتُس وَر
28چاوش اَوان عیسی شان ببه قیافا کیه فرماندار کاخ. اَوه اِشتن کاخ دله دنشنده تا نجس مبینده و بتاننده عید پِسَخه سوره بِخرنده. 29پس پیلاتُس بامه بر چوان وَر و آپرسسشه: «اِم مردکه چِه جرمی واسنه متهم کردرا؟» 30اَوان جواو بدا: «اگم اِم مردک شریرانه کارش کرده نبه، اَومان ناورده تِه تحویل بِدَیام.» 31پیلاتُسه اَوان نه باته: «شاما اِشتن اَوه ببرا و عین شاما شریعت اَوه محاکمه بِکَراه.» سران یهودی باتشانه: «آما اجازۀ ندارام کسی مَردنه محکوم بکرام.» 32اِنجوره عیسی اَ چی که اِشتن مردنه درباره واتش به و چَه منتظر به، اتفاق دِگس.
33پس پیلاتُس آگردس کاخ دله و عیسیش داد بکه، اَونه باتشه: «ته یهودیان پادشایش؟» 34عیسی جواو بدا: «اِمه ته اِشتنک واتری، یا اِم که خلکه چِمن درباره تنشان واته؟» 35پیلاتُسه جواو بدا: «مگم از یهودی‌ام؟ اِشته ملت و سران کاهنان، تِشان من تسلیم کردَه؛ چِر کرده؟» 36عیسی جواو بدا: «چِمن پادشاهی اِم دنیا کین نی. اگم چِمن پادشاهی اِم دنیا کین به، چِمن نوکره جَنگِسِنده تا یهودیان دس دِمَگنم. امّا چِمن پادشاهی اِم دنیا کین نی.» 37چاوش پیلاتُس عیسیکش آپرسس: «پس ته ایگله پادشایش؟» عیسی جواو بدا: «ته اِشتن واتری که از پادشایم. چون که از چِمه واسنه دنیا آمییم و چِمه واسنه آمییم اِم دنیا تا حقیقته را شهادتی بدیم. پس هر کسی که حقیقت کین بیبی، چِمن لاوان گوش آدیه.» 38پیلاتُسه اَوک آپرسسه: «حقیقت چیه؟»
وختی اِمش باته، هنی بشه بَر، یهودیان ور و اَوانه باتشه: «از هیچ تقصیری نیویندمه تا اَوه محکوم بکرم. 39امّا شاما رسمی دارا که پِسَخ عیدک ایگله زندانی ای شاما را آزاد بکرم؛ رایرانه یهودیان پادشاه شاما را آزاد بکرم؟» 40اَوان چه جواوک جرشان بکه: «اِم مردکه، نه بلکم بارْاباسه آزاد بکه!» بارْاباس ایلگه راهزن بِه.
Currently Selected:
انجیل یوحنا 18: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company