اعمال رسولان 1
1
عیسی صعود کردن به آسمان
1ای تِئوفیلوس، از چِمن اوّلین کتابه، همه‌ی چییانی درباره نیویشتَمه که عیسی شروعش بِکه چَوان انجام دییَن و تعلیم دییَن 2تا اَ روجی که خدا مقدسه روحه واسِطنه، اِشتن انتخاب کرده رسولانش، دستورانی آداشه و چاوَش بَرده بِبه آسمانه کَفا را. 3عیسی پِر رنج کشسنه پَش، اِشتنش رسولان را دیار بِکه و پِر کاراننه ثابتش بکرده که زنده آبییه. عیسی چهل روج چَوان را دیار آبییَرده و رسولاننه خدا پادشاهی درباره لاوَش کردرده. 4ای را که عیسی رسولان همراه بِه، دستورش بِدا که: «اورشلیم شهر نه مَشا، بَلکم اَ وعده منتظر بِبا که آسمانیه پِه وعدش دییَه به و باتشه: اَجوره زه که مَنک اَشنوسرانه، 5یحیی تعمید دَهنده اُونش غسل تعمید آدِسه، امّا چند روجَه پَش، شاما خدا مقدسه روحِنه تعمید گیرا.»
6وختی رسولان هَندیگرنه بیدا آبییَه بِنده، عیسیک آپرسسِشانه: «خداوندا، هَ موقع اِسه که رایره پادشاهی، آگاردانی خدا قومه؟»
7عیسی جواو بدا: «لازم نییِه که وقتان و زمانان بِزانا که آسمانیه په اِشتن قدرتنه اَوش تعیین کردنده؛ 8امّا وختی خدا مقدسه روح شاما را بایه، قدرت گیرا و اورشلیمه شهرک و تمام یهودیه منطقک و سامِره منطقه و دنیا دورترین یاگاهانک، چِمن شاهدان با.»
9عیسی اِم لاوان واتنَه پَش، ایزه که رسولان دیشَتردنده، آسمانه کفا را بَرده بِبه و چَوان چشمان پَرانک ایگله اَبری عیسی دویرش بکَتِه. 10اَدمی که عیسی شییَرده و شاگردان آسمانه دیَشتردنده، ایرادَن دو گِله مردکی که سیبییَه اَبا دِکردشان به چَوان وَرک بِندَرسنده 11و باتشانه: «ای جلیلیه مردکان، چیه را وِندَرسِران و آسمانه دییَشترا؟ هم عیسی که شاما دلَنه بَرده بِبه آسمان کفا را، ایزه که زَه بیندرانه بِشه آسمان را، هنی آگرده»
یهودا عوض، مَتیاس شان انتخاب بِکه
12چاووَش رسولان زیتونه کوه نه آگردِسنده اورشلیمه شهره را. اَ کوه، ایگله مقدسه شنبه روجه اندازه قَدَر، یعنی حدود ای کیلو متر اورشلیمنه فاصلَش داشته که مقدسه شنبه روجک فقط اییَنده اجازشان داشته بیشینده. 13وختی آرَسسنده اورشلیم، بِشنده ایگله بالاخانه‌ای را که چَوان اقامتگاه به. کسانی که اَگا بنده اِمه بنده: پِطرس و یوحنا، یعقوب و آندریاس، فیلیپُس و توما، بَرتولْما و مَتّی، یعقوب حَلْفای زا و شَمعون وطن پرست و یهودا، یعقوبه زا. 14اَوه همبلنه، زَلیان همراه و مریم نی عیسی ما و عیسی براران نه، ای دل، تمام اِشتن وقتشان دعا کردرده.
15ایگله اَ روجانک، پِطرُس براران میانک که همبلنه حدود صد و بیست نفر بنده، بِندَرس 16و باتشه: «ای براران، مقدسه نوشته هان پیشگویی گسه اتفاق دِگسَه به. اَ نیویشته‌هانی که خدا مقدس روح خیلی پرانتر داوود پادشاه زواننه یهودا درباره پیشگویش کرده به، اَ کسی درباره که عیسی دستگیر کراران راهنما بِه. 17چون اَ ایگله آماک حساب بِسِه و اِم خِدمَتکش سهمی داشته.»
18یهودا اِشتن شرارته مُزدنه زمین تیکه ای بخریشه و اَ زمین سرک دیمِنه گِل بگس و بِترکس و وَسطنه دو پاره آبه و چَوه دل و روعَه همه اَربه بَر. 19تمام کسانی که اورشلیمک بِنده، اِم اتفاقک خبر دار بِبنده و اِشتن زواننه اَ محله نامشان اَنا ’حَقِلْ‌دَما‘، یانی خونَه زمین.
20چون که «کتاب مزامیرک نویشته بییَه:
«”چَه کییه خرابه بیبی
و کسی چَوه دلک زندگی مَکره،“
و هنی نیویشته بییَه:
«”چَوه مقام و منصبه علوده نفری اَرگیره.“
21پس گه ای نفر اَ مردکانی که، تمام اَ وقتی که عیسای خداوند چاما دلَک آمِسشه و شِسه، همیشه چاما جمعه دلک بیبی. 22یعنی یحیی تعمید موقع نه تا اَ روجی که عیسی چاما وَرنه برده بِبه آسمانه کفا را، ای نفر اَ آدمانک، آمانه عیسی زنده آبیینه شاهد بیبی.»
23پس اَوان دو نفرشان پیشنهاد بِکَرده: ایگله یوسف که اَونه بَرسابا واتشانه و اَوه یوستوس نام نه نی آزانسشانه. و اَدرین نی مَتیاس. 24اَدمی ایزه دعا شان بِکَرده و باتشانه: «ای خداوند، ته همه‌ی آدمان دِلِک خبر داری. ته اِشتن آما آمان که اِم دو نفرک، کامین گِلَر انتخاب کرده 25تا اِم خدمت و رسول بینه بیگیره، خدمتی که یهودا پَسِش بیزی و بشه یاگایی که اَگار کین به.» 26چاوش قرعه درندشانه و مَتیاس نام دِگِس. اِیزه مَتیاس، اَ یازده گله رسولان گروه اضافه بِبه.
Currently Selected:
اعمال رسولان 1: TIT
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company
