اِنجیلِ مَتّی 17
17
عیسایی دیم دِگَرگون بَوِه
1شِش روز بعد، عیسی، پِطرُس و یَعقوب و وی بِرار یوحَنا رِه بَیتِه و وِشونِه یَتِه بِلَنِ کوهی سَر بَوِردِه تا اوجِه تَنیا ووئِن. 2اوجِه، وِشونی وَر، عیسایی دیم دِگَرگون بَوِه. وی دیم خِرشیدی تَرا نورانی و وی جِمِه نوری تَرا اِسبی بَوِه. 3هَمون موقِه، شاگِردِن موسی و ایلیای پِیغَمبرِ بَئینِه گه عیسایی هَمرا گَب زووِنِه. 4پِطرُس عیسی رِه بُتِه: «اِی آقا، چَنّی خِبِ اَما ایجِه دَرِمی. اگه بَخوای مِن سِه تا سایِوون ساجِمِه، یَتِه تِنِه، یَتِه موسی و یَتِه هَم ایلیایی سِه.» 5پِطرُسی گَب حَلا تُوم نَوِه وِه، یَتِه پِر نورِ اَبر وِشونی سَری وَر سایه دیم بَدا و یَتِه چِمِر اَبری جا بِشنُس بَوِه گِتِه: «هَین می عَزیزِ ریکائِه گه ویجا راضیمِه، وی گَبِ گوش هاکِنین!» 6وختی شاگِردِن هَین چِمِرِ بِشنُسِنِه، دیمی هَمرا بِنِه ای سَر دَکِتِنِه و بَتِرسینِه. 7عیسی بیمو وِشونی سَر دَس بِشتِه و بُتِه: «پِرِسین و نَتِرسین!» 8وختی شاگِردِن شی چِشِ وا هاکِردِنِه، بِجز عیسی کَس دییَرِ نَئینِه.
9اون موقِه گه كوهی جا جِر ایمونِه، عیسی وِشونِه دَستور هادا: «اونچی گه بَئینی رِه هیچکَسی وَر نُئین، تا اون روز گه اِنسونی ریکا مِردِگونی جا پِرِسِه.» 10شاگِردِن عیسایی جا بَپُرسینِه: «پَس چه توراتی مَلِّمِن گِنِنِه اوَّل وِنِه ایلیای پِیغَمبَر بیِه؟» 11عیسی جِواب هادا: «ایلیا اِنِه و هَمه چیرِه دِرِس کِنِّه. 12ولی مِن شِمارِ گِمِه ایلیا بیمو و وِشون وِرِه نِشناسینِه و هر چی خوایسِنِه وی هَمرا هاکِردِنِه. اِنسونی ریکا هَم وِنِه هَینجور وِشونی دَسی جا زَجر بَوینِه.» 13اَزما شاگِردِن بِفَهمِسِنِه گه عیسایی مَنظور یحیای تَعمید دَهندِه هَسِّه.
عیسی یَتِه دِوبَزِه ریکارِه شَفا دِنِه
14وختی عیسی و وی شاگِردن مَردِنی وَر دَگِرِسِنِه، یَتِه مَردی عیسایی وَر بیمو و وی پِش زِنی بَزو بُتِه: 15«اِی آقا، می ریکارِه رَحم هاکِن. وی غَشگری دارنِه و بَدجور عَذاب کَشِنِه. اونجور گه چَن کَش شِرِه اُو و تَشی دِلِه دیم بَدا. 16وِرِه تی شاگِردِنی وَر بیاردِمِه، ولی نَتِنِسِنِه وِرِه شَفا هادِن.» 17عیسی بُتِه: «اِی مِنحَرِف و بی ایمونِ قوم، تا كِی وِنِه شِمِه هَمرا دَووئم و تا کِی شِمارِ تَحَمِل هاکِنَم؟ ریکارِه می وَر بیارین.» 18عیسی دِوِ تَشَر بَزو، دِو ریکائی جا دیرگا بوردِه و وی هَمون دَم شَفا بَیتِه. 19اَزما شاگِردِن عیسایی وَر بیمونِه و خَلوتی دِلِه ویجا بَپُرسینِه: «چه اَما نَتِنِسِمی هون دِوِ دیرگا هاکِنیم؟» 20عیسی بُتِه: «چون شِمِه ایمون کَمِ. حَیقَتاً شِمارِ گِمِه، اگه یَتِه خَردَلی تیمی اَنّا ایمون دارین، بَتِّنِنی هَین كوهِ بُئین گه ”از ایجِه به اوجِه جابِجا بَوون“ و جابِجا وونِه و هیچ کاری شِمِنِه مَحال نیئه.[ 21ولی هَین جور دِو بِجِز دِعا و روزِه دیرگا نَشونِه.]»
عیسایی دوِّمین پِشگویی شی بَمِردَن و زینِّه بَووئَنی خَوَری
22هون موقِه گه جَلیلی مَنطَقِه ای دِلِه دَوِنِه، عیسی وِشونِه بُتِه: «اِنسونی ریکا مَردِنی دَس تَسلیم وونِه. 23وِشون وِرِه کِشِنِنِه و وی سِوّمین روز زینِّه وونِه.» شاگِردِن خِیلی پَریشون بَوِنِه.
یَهودیِنی مَعبَدی مالیات
24وختی عیسی و وی شاگِردِن كَفرناحومی شَهری سِه بَرِسینِه، اونانیگه یَهودیِنی مَعبَدی مالیاتِ جَم کِردِنِه، پِطرُسی وَر بیمونِه و بُتِنِه: «شِمِه اِسّا مَعبَدی مالیاتِ نَخواینِه هادِه؟ مَعبَدی مالیات ”دِ دِرهَم“ وِه گه دِ روز کارگَری دَسمِزی اَنّا وِه.» 25پِطرُس بُتِه: «اَلبَته گه دِنِه!» وختی پِطرُس خِنِه بوردِه، حَلا هیچی نُت وِه گه عیسی وِرِه بُتِه: «اِی شَمعون چی فِکر کِنّی، هَین دِنیایی پادشاهِن کِنی جا باج و خَراج گیرِنِه؟ شی وَچیلِه ای جا یا غَریبِه ای جا؟» 26پِطرُس بُتِه: «غَریبِه ای جا.» عیسی وِرِه بُتِه: «پس وَچیلِه مِعافِنِه! 27ولی هَینسِه گه وِشونِه نَرِنجانیم، دَریالُو بور و قَرماق دیم بَدِه. اَوَّلین مائی رِه گه بَیتی، وی دِهِنِ وا هاکِن. یَتِه سِکِّه چار دِرهَمی اَنگیرنی. هون سِکِّه رِه بَئیر و می مالیات و شی مالیتی جا وِشونِه هادِه.»
Currently Selected:
اِنجیلِ مَتّی 17: WMB
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company