اِنجیلِ مَتّی 15
15
دِلی پاکی
1اَزما عِلَمای فِرقِه فَریسی و توراتی مَلِّمِن اورشلیمی جا عیسایی وَر بیمونِه و بُتِنِه: 2«چه تی شاگِردِن اَمِه مَشایِخی رَسم و رُسومِ نَدید گیرِنِه؟ وِشون پِش از هَینگه غَذا بَخارِن شی دَسِ نَشورِنِه!» 3عیسی وِشونِه جِواب هادا: «چه شِما شِه، هَینی خاطری گه شی رَسم و رُسومِ حِفظ هاکِنین خِدایی حِکمِ نَدید گیرِنی؟ 4چون خِدا دَستور هادا: ”شی پیر و مارِ اِحتِرام بِل،“ و ”هر کی شی پیر و مارِ ناسِزا بُئِه، حتماََ وِنِه وِرِه بَکوشتَن.“ 5ولی شِما گِنِنی اگه کَسی شی پیر و مارِ بُئِه: ”کِمَکی گه وِسِه شِمارِ هاکِنِم، خِدایی کاری سِه وَقف هاکِردِمِه،“ 6در هَین صورَت، دِ وِرِه واجِب نیِه شی پیرِ کِمَک هاکِنِه. هَینجوری شِما خِدایی کَلامِ شی رَسم و رُسومی سِه نَدید بَیتِنی. 7اِی دُروئِن! اِشعیای پِیغمبر چَنّی خِب شِمِه خَوَری پِشگویی هاکِردِه، اون موقِه گه بُتِه:
8«”هَین قوم شی زِوونی هَمرا مِنِه حِرمَت اِلِنِه،
ولی وِشونی دِل میجا دورِ.
9وِشون بیخِدی مِنِه پَرَسِش کِنِنِه
و وِشونی تَعلیم فقط آدَمی ای حِکمِ.“»
چی آدَمی رِه نَجِس کِنِّه
10اَزما عیسی مَردِنِ شی حضور بَخونِسِه و بُتِه: «می گَبِ گوش هادین و بِفَهمین. 11اونچی آدَمی دِهِنی جا جِر شونِه وِرِه نَجِس نَکِنِّه، بَلگی اونچی آدَمی دِهِنی جا دیرگا اِنِه، هونِه گه آدَمی رِه نَجِس کِنِّه.» 12اَزما شاگِردِن عیسایی وَر بیمونِه و بُتِنِه: «دِنّی عِلَمای فَریسی وختی تی هَین گَبِ بِشنُسِنِه نارحَت بَوِنِه؟» 13عیسی جِواب هادا: «هر نَهالی گه می آسِمونی پیر نَکاشت وو، بِنِه ای جا بَکِّنی وونِه. 14وِشونِه کار نارین. وِشون راه بَلَدایی هَسِّنِه گه شِه کورِنِه. و اگه یَتِه کور یَت دییَر کوری عَصاکَش بَوو، هر دِتا چاهی دِلِه دیم خارِنِه.» 15پِطرُس وِرِه بُتِه: «هَین مَثَلِ اَمِسِه توضی هادِه.» 16عیسی جِواب هادا: «شِما هَم حَلا دَرک نَکِنِنی؟ 17مَگِه نَئونِنی هر چی آدَمی دِهِنی جا جِر بورِه وی اِشکَمی دِلِه شونِه و دَفع وونِه؟ 18ولی اونچی گه دِهِنی جا دیرگا اِنِه، دِلی جا سَرچِشمِه گیرنِه و هَین اون چیِه گه آدَمی رِه نَجِس کِنِّه. 19چون پلیدِ خیال، قَتل، زِنا، فاسِقی، دِزّی، دِردِرو شَهادت و تِهمَت، دِلی جا سَرچِشمِه گیرنِه. 20هَینِن آدَمی رِه نَجِس کِنِنِه، ولی نَشوردِه دَسی هَمرا غَذا بَخاردَن هیچکی رِه نَجِس نَکِنِّه!»
یَتِه کَنعانی زَنایی ایمون
21عیسی اوجِه رِه تَرک هاکِردِه و صور و صیدونی مَنطَقِه ای دِلِه بوردِه. 22یَتِه کَنعانی زَنا گه هون مَنطَقِه ای دِلِه زندگی کِردِه، عیسایی وَر بیمو و دادی هَمرا بُتِه: «اِی آقا، اِی داوودی ریکا، مِنِه رَحم هاکِن! می کیجا بَدجور دِوبَزِه بَوِه.» 23ولی عیسی هیچ جِوابی نَدا، تا هَینگه شاگِردِن پِش بیمونِه و عیسایی جا خواهِش هاکِردِنِه، بُتِنِه: «وِرِه مِرخَص هاکِن بورِه، چون دِ داد و هَواری هَمرا اَمِه دِمال سَر اِنِه.» 24عیسی بُتِه: «مِن فَقَط اِسرائیلی قومی گِم بَوِه گِسَنِشونی سِه بَرِسانی بَوِمِه.» 25ولی هون زَنا پِش بیمو و عیسایی لینگی وَر زِنی بَزو و بُتِه: «اِی آقا، مِنِه کِمَک هاکِن!» 26عیسی جِواب هادا: «دِرِس نیِه نونِ وَچیلِه ای دَس بَیریم و سَگیشونی پِش دیم بَدیم.» 27ولی هون زَنا بُتِه: «دِرِسِ آقا، ولی حتّی سَگیشون هَم نون تیکِه ای گه شی اَربابی سِفرِه ای جا کَلِنِه رِه، خارِنِه!» 28اَزما عیسی بُتِه: «اِی زَن، تی ایمون خِیلی زیادِه! تی خواسِّه بَراوَردِه بَوِه!» هَمون دَم وی کیجا شَفا بَیتِه.
عیسی خِیلیارِه شَفا دِنِه
29عیسی اوجِه ای جا راه دَکِتِه و جَلیلی دَریایی وَر بیمو. اوجِه یَتِه کِتی ای سَر بوردِه و هِنیشتِه. 30یَتِخِیلی اِزدِحام عیسایی وَر بیمونِه و شی هَمرا شَلِن، کورِن، چِلِّخِن و لالیشون و خِیلی دییَر مَریضِنِ هَم بیاردِنِه عیسایی لینگی پِش بِشتِنِه و وی وِشونِه شَفا هادا. 31مَردِن وختی بَئینِه لالِن گَب زَنِنِه، چِلِّخِن خار بَوِنِه، شَلِن راه شونِنِه و کورِن وینِنِه، بِهت هاکِردِنِه و اِسرائیلی خِدارِه حَمد بُتِنِه.
عیسی چار هِزار تَنِ غذا دِنِه
32عیسی شاگِردِنِه شی حِضور بَخونِسِه و بُتِه: «می دِل هَین مَردِنی سِه سوجِنِه. اَلَن سِه روزِ می هَمرا دَرِنِه و دِ هیچی بَخاردَنی سِه نارِنِه. مِن نَخوایمِه وِشونِه وَشنی راهی هاکِنَم، چون اِمکان دارنِه راه دِلِه ضَعف هاکِنِن.» 33شاگِردِن بُتِنِه: «کِجِه دَری بَتِّمی صَحرایی دِلِه هَین گَتِه اِزدِحامی سِه نون تَیِّه هاکِنیم؟» 34عیسی بُتِه: «چَن تا نون دارِنی؟» جِواب هادانِه: «هفت تا نون و چَن تا کِچیکِ مائی.» 35عیسی مَردِنِ بُتِه بِنِه ای سَر هِنیشِن. 36اَزما هَفت تا نون و چَن تا مائی رِه بَیتِه و بعد از شِکر هاکِردَن اونِنِه گِلی هاکِردِه و شی شاگِردِنِه هادا و شاگِردِن اونِنِه اِزدِحامِ هادانِه. 37هَمه بَخاردِنِه و سِئر بَوِنِه، وی شاگِردِن هَفتا زَمبیل پِر نون تیکِه جَم هاکِردِنِه. 38اونانیگه اوجِه غَذا بَخاردِنِه، بِجِز زناکِنِن و وَچیلِه، چار هِزار تا مَرد وِنِه. 39بعد از هونگه عیسی مَردِنِ مِرخَص هاکِردِه، لوتکا سِوار بَوِه و مَجَدانی مَنطَقِه ای سِه بوردِه.
Currently Selected:
اِنجیلِ مَتّی 15: WMB
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company