اِنجیلِ مَتّی 14
14
یحیی یه تَعمید دَهندِه بَکوشتَن
1وَختی عیسی یِه آوازِه هیرودیسِ پادشاهِ گوش بَرِسییَه، 2اون خودشه پاکارانِ باَگوته: «این مَردَای همون یحیی یِه تَعمید دَهَندِه هیسه که مُردِگانِ جی وَرِسَه و اینِه وَسین تانِه این مُعجِزاتِ هَکونه.»
3چون هیرودیس، هیرودیا یِه خاطِری که قبلاً اونه اَداش فیلیپُس زِنا با، یحیی رِه بِیته و اونه دَس و لِنگِ دَبِسِّه و اونه زِندانِ دِلِه تُووادَه. 4چون یحیی هیرودیسِ باگوته با: «حَلال نیِه این زِنایِ هَمرَه دَبی.» 5هیرودیس خَسِّه یَحیی رِه بَکوشِه، وَلی مَردُم جی تَرسِنِه با، چون مَردُم یَحیی رِه پِیغَمبَر دَانِسَّن.
6وَلی وَختی هیرودیسِ زاد روز بَرِسییَه، هیرودیا یِه کیجا مِهمانان پیش بَرِقصییَه و هیرودیس آنقَدَر اونه رَقص جی خوشحال هَبا 7که قَسَم بُخاردِه هَر چی کیجا بِخواد اونه هَدِه. 8مآر کیجا رِه آنتِریک هَکُردِه که باگو: «یحیی یه تَعمید دَهَندِه یه سَر رِه ایتا مَجمِه یه دِلِه مَرِه هَدِه.» 9پادِشاه ناراحَت هَبا، ولی خودشه قَسَمِ خاطِری وخودشه مِهمانان اِحتِرام خاطِری دَستور هَدَه که اونه خواسِّه بَرآوَردِه هَبو. 10پس آدَم روانه هَکورده زِندانِ دِلِه یَحییِ یِه سَر رِه اونه تَن جی سیفا هَکُردَن 11و یَحیی یه سَر رِه ایتا مَجمِه یه دِلِه بیاردَن کیجا رِه هَدَن و اون هَم اونِه خودشه مآره وَرجه بَبِرده. 12یحیی یه شاگِردان بومَن اونه جَسد بَبِردَن و دَفن هَکُردَن، ایما بَشَن عیسی رِه خَبِر هَدَن.
عیسی پنج هِزار نَفَرِ غَذا دَنه
13وَختی عیسی این خَبَرِ بِشنَوِسِّه، خودش تَنهایی لوتکا رِه سَوار هَبا و ایتا خَلوَتِ جا بَشَه. وَلی وَختی مَردُم خَبَردار هَبان، خودِشانِه شَهرانِ جی پیادِه اونه دُمّالسَر رادَکِتَن. 14هَمینکه عیسی لوتکایِ جی جیر بوما اِزدِحام زیادی رِه بَدییَه، اونه دِل اوشانه رِه بَسوتِه و اوشانه میَنِ مَریضان رِه شَفا هَدَه.
15وَختِ مِهال، شاگِردان عیسی یِه وَرجه بومَن باگوتَن: «ایجه دور دَکِته جائِه، و دیر وقت هم هیسِه. پَس اِزدِحامِ روانه هَکون بوشون دِهاتِ دِلِه تا خودِشانِه وَسین غذا بَهینَن.» 16وَلی عیسی اوشانه باَگوته: «لازِم نییِه مَردم بوشون شما خودِتان اوشانِ غذا هَدین.» 17شاگِردان باگوتَن: «اَما فقط پَنج تا نان و دُتا ماهی داریم.» 18عیسی باَگوته: «اوشانِ ایجه می وَر بیارین.» 19ایما مَردُمِ باَگوته واشَ سَر بِنیشَن. ایما پَنج تا نان و دُتا ماهی رِه بِیته آسِمانِ بِیشییِه و خُدارِه شُکر هَکُردِه. ایما نانِشان رِه تیکّه هَکُردِه و شاگِردانِ هَدَه. شاگِردان هم اوشانه مَردُمِ هَدَن. 20هَمِه بُخاردَن و سیر هَبان، وَختی نان تیکِه شانِ جَم هَکُردَن دَوازدَه تا زَمّیل پُر هَبا. 21بِجُز زِناکان و وچه هان پنج هِزار تا مَرد اوجِه غَذا بُخاردِن.
عیسی اُو یه سَر راه شونِه
22عیسی دَرجا خودشه شاگِردانِ باَگوته لوتکا رِه سَوار هَبون تا اونه جی جلوتر دَریایِ اُتَکِه بوشون. وَلی خودش هَموجِه بُمانسِّه تا مَردُمِ راهی هَکونه. 23عیسی بَعدِ اینکه مَردُمِ روانه هَکوردِه، خودش کوهِ سَر بَشَه تا تَنهایی دُعا هَکونه. شُو بَرِسییَه و اون اوجِه تَنها با. 24اون موقع، لوتکا دَریا کِنارِ جی خِیلی دور هَبا با و کولاک دِلِه گیر دَکِته با، چون برعکسِ وا زَنه با. 25حدوداً ساعَتِ چهارِ صُب، عیسی همونجور که اُویه سَر راه شونه با اوشانه نَزیک هَبا. 26وَختی شاگِردان عیسی رِه بَدییَن اُویه سَر راه شونِه، بَتِرسیَن، باگوتَن: «این شَبَحِ»، وَ تَرسِ جی داد بَزَن. 27عیسی دَرجا اوشانه باَگوته: «شیمی دِل قُرص هَبو. مَنَم، نَتِرسین!»
28پِطرُس باَگوته: «آقا، اَگه تویی مَرِه باگو تا اُویه سَر تی وَر بییَم.» 29عیسی باَگوته: «بیِه!» ایما پِطرُس لوتکایِ جی جیر بوما و اُویه سَر عیسی یِه سَمت رادَکِته. 30وَلی وَختی کولاکِ بَدییِه، بَتِرسیِه و همونجور که اُویِه دِلِه جیر شونه با داد بَزَه: «آقا، مَرِه نِجات هَدِه!» 31عیسی دَرجا خودشه دَسِ دِراز هَکُردِه و اونه بِیته و باَگوته: «اِی کَمِ ایمان، چِرا شَک هَکُردی؟» 32وَختی لوتکا رِه سَوار هَبان، وا بییَسهَ. 33وَ اوشانیکه لوتکایِ دِلِه دَبان عیسی یِه لِنگ بَکِتَن باگوتَن: «راس راسی تو خُدایِ ریکائی!»
عیسی ایتا مریضِ شَفا دَنه
34اوشان دَریایِ جی بُگذشتِن و جِنیسارِتِ مِلکِ دِلِه بَرِسیِیَن. 35اوجِه یه مَردُم عیسی رِه بِشناختَن و کَسانی رِه به تمام اون مَنطَقِه روانه هَکوردِن تا مَریضانِ عیسی یِه وَرجه بیارِن. 36اوشان اونه جی خواهِش هَکُردَن فقط اِجازِه هَدِه تا اونه قَوایِ لَمپَرِ دَست بَزَنِن، وَ هر کی اونِه لَمس کانِبا، شَفا گیرنه با.
Currently Selected:
اِنجیلِ مَتّی 14: GMB
Highlight
Share
ਕਾਪੀ।
Want to have your highlights saved across all your devices? Sign up or sign in
@ 2024 Korpu Company