Amatayo 6
6
Ngani ja kwajangatilanga bhangi
1Ayesu akapunda kulongela, “Ntamange maha, nkotokutendanga hikubho yinu yammbone kupala bhandu bhannolange. Kwakubhee handa mpakutendanga henela jaakwa ngwahupa kubhoka kwa Atati bhinu jwabhii kunani kwa Annoongo.”
2“Bahi, pamwajangatila chilebhe ahocho, nkotokulobhola kwa bhandu. Nkotokutenda handa andendemundu chibhatendanga mu Nyuumba ja konganilana Bhayuhudi na nndela ligongo lya bhandu bhalumbalilwe. Ndendakunnobholelanga kweli bhenabho bhatekupatanga ngwahupa jabhenji. 3Nambo mwenga pampakwaapekea chilebhe ahocho, ntende henela hata aganja bhinu jwammandikile akotokuhimanya chintenda. 4Henela ngani hejo jipakubhee jakuchiiya kwaachinu, na Atati jwinu jwaalola gantendite kwa kuchiiya, bhapakumpekea ngwahupa.”
Majigano nnani ja kujopa
Aluka 11:2-4
5“Mwangota pantendanga kujopa, nkotokutenda handa andendemundu. Bhena angota bhapala kujema na kujopa Mu Nyuumba ja konganilana Bhayuhudi kuntundu ja ndela ligongo lya bhandu bhabhalolange. Ndendakunnobholelanga kweli, bhenaangota bhatekupatanga ngwahupa jabhenji. 6Nambo mwenga pannyopa Annoongo, nnyingile mu chuumba chinu nchitabhile nnyango, ngapena mwajope Atati bhinu jwangabhonekana. Na jono agabhona gagatekuchiia apakunpekea ngwahupa.”
7“Na mwangota pantenda kujopanga, nkotokulobhola kwa malobhe gajingi handa bhandu bhangaamanya Annoongo. Bhena angota bhaganikia yakubhee Annoongo bhapakwaajohanikia ligongo lya malobhe gajingi. 8Nkotokubhee handa bhenabho, kwa kubhee Atati bhinu agamanya mumugapala hata tangu mwangaajopa. 9Bahi, henela nga chiipalikwa kujopa,
‘Atati bhitu jwammile kunani kwa Annoongo,
lihina linu lya kuhalala lilumbalilwe.
10Umwenye gwinu guike.
Upalyo gwinu gutendeke pamba pachilambo handa kunani kwa Annoongo. 11Ntupekee leleni chakulya chitu cha machobha goa.
12Ntulekelele kulemwa kwitu,
handa na twenga chitutenda kwaalekelela bhabhatekutulemwa. 13Nkotokutujingia mu malengelo,
nambo ntulolekee kubhoka kwa jonijola abohu. Kwa kubhee Umwenye nga gwinu, na machili na ng'anyimo hata machobha goa. Elo.’”
14“Ligongo handa mpakwaalekeleanga bhandu kulemwa kwabhenji chibhantendile, na atati jwinu jwa kunani kwa Annoongo nga chibhapakunlekelela na mwangota. 15Nambo handa mwangaalekelela bhandu kulemwa kwabhenji, na jono Atati bhinu bha kunani kwa Annoongo apakunnekelengaopo kulemwa kwinu.”
Majigano kwa ngani ja kutabha
16Ayesu akapunda kulobhola, “Pampakutabha nkotokuhumalika handa akaandendemundu. Bhenaangota bhatenda kubheka lukenja pamiho jabhe ligongo bhabhonekane na bhandu kubhee bhatabhite. Nannobholelanga kweli, bhena angota bhatekupatanga ngwahupa jabhenji. 17Nambo mwenga pamtenda kutabha, nkue pamiho jinu na mpakale mahuta mu mutwe gwinu na mkwemule majunju ginu, 18kubhee mundu joajola akoto kuhimanya yakubhee ntabhite, nambo amanyike tu kwa Atati bhabhe jwangabhonekana. Na jonojwe Atati bhinu jwabhona gachiite apakunpekea ngwahupa.”
Tuchibhekele ngokwe kunani kwa Annoongo
Aluka 12:33-34
19Ayesu akapunda kwaalobholelanga, “Nkoto kuchibhekela hilebhe pambani pachilambo hikoko ya bhakuhalabiana na kuutu bhatenda kombola kujingila na kuhalabiana na akaabwihi kujingila na kujibha. 20Nchibhekele hilebhe kunani kwa Annoongo kwa kubhee hikoko na kuutu ngakombola kuhalibiana wala akaabwihi ngakombola kujiingila na kujibha. 21Maana penipala pajibhile ngokwe jinu, ngapena kabhele pagupakubhee ntima gwinu.”
Lumuli lwa mmele
Aluka 11:34-36
22“Lio nga lumuli lwa mmele. Handa lio linu nga likoto, mmele gwinu goa gupakubhehe pa nhana. 23Nambo handa lio linu nga libohu, mmele gwinu goa gupakubhee mu lubhendu. Bahi, handa nhana gugubhile nkati jinu nga lubhendu, bahi gonogwe nga lubhendu lwa kujogoa!”
Annoongo na hilebhe
Aluka 16:13; 12:22-31
24“Ayesu akaalobholela jwakwa mundu jwakombola kwaatumikila akaakolo bhabhele. Kwa kubhee apakwaachimwa jumo na kwaapala jonojwe jwa bhele, au apakubhee na jumo na kwaabhelua jonojwe jongi. Ngakombolanga kwaatumikila Annoongo pamo na hilebhe.”
25“Nga kwa maana nannobholelanga, nkoto kubhee na lipamba kwa ngani ja chakulya chichimpakulyee na ching'welo chichimpakung'wee, wala ngani ja ngobho yakuwala mu mimele jinunji. Bholi, umomi nga chakulya jikajabhe au kupunda echocho? Na mmele, bholi nga kupunda ngobho? 26Muilolange hijuni. Ngapandanga na kuuna, wala bhangakola ngokwe joha jela. Hata henela Atati bhinu bha kunani kwa Annoongo bhapakunpekea yakulyee. Bholi, mwangota ngabha bhammbone kupunda hijuni? 27Nga aganiki nkati jinunji kwa kuchilagia akombola kuchijonjokea kutandamala kwabhe hata lichaa limo lya kutama kwabhe?”
28“Ngani ja ngobho, ya niki kubhee na lipamba? Mugalolange malobha ga kumanyahi chigapunda kuhalala. Gateendahopo lihengo wala kuchihalakia ngobho. 29Nambo ndendakunnobholelanga, hata Asolomoni mweene na kukola kwabhe hilebhe koha Annoongo angaaweka maha handa lilobha limo lyabhe lya gangani. 30Bahi, ikabhee Annoongo akagawekela mahamba ga kunng'onda, yakubhee leleni gabhile, malabhi gatenda kujoma na kulekelwa pamooto, bholi, ngabha apakuntendelanga maha muno? Bholi, mwangota mwangahobhalelanga!”
31“Bahi, nkotokubhee na lipamba, ‘Tupakulyee niki?’ Au kabhele, ‘Tupakung'wee niki?’ Au ‘Tupakuwala niki!’ 32Kwa kubhee genago goa gatenda kulolekewa na bhandu bhangaamanya Annoongo. Atati bhitu abhile kunani kwa Anoongo atenda kuhimanya hilebhe yoha tuhipala. 33Henela, nnyemekange kugulolekea Umwenye gwa Annoongo kupeta yoha na gaagapala Annoongo, na Annoongo apakumpekeanga genago goa na kunnyonjokeanga. 34Bahi, nkotokubhee na lipamba kwa ngani ja malabhi, kwa kubhee malabhi jitekubhee na hilebhe yabhe. Kila lichobha litekubhee na hilebhe ya lichobha elyo.”
Currently Selected:
Amatayo 6: NTNHBL
Highlight
Share
ਕਾਪੀ।
Want to have your highlights saved across all your devices? Sign up or sign in
The New Testament in Ndondehamba Language ©The Word for the World International and Ndondehamba Language Translation, All rights reserved.