Miqueas 6

Israel unikamax an kakësama okin ꞌai Diosmi ꞌucha ñuikë bana

1Mitsun kamina bërí uisokin kara Diosan mitsu kaia kixun kuati ꞌain:

¡Usa ꞌain kamina nirutankëx bashikama ꞌimainun matá me kaman min bana kuanun mixribi kiti ꞌain!

2Bashikama ꞌimainun an me tuinkë

akaman ka kuati ꞌikën:

Nukën ꞌIbu ka aín unikama ꞌatima oti sinania,

usa ꞌaish ka Israel unikamami nishia.

3Ësai ka Nukën ꞌIbu kia:

Israel unikama mitsun kamina ꞌë kati ꞌain.

¿Uisa onan karana añu ꞌaxunkin mi ubion?

4ꞌËn kana mitsun chaitiokëma Egipto menuxun tëmërakin ñu mëëiabi chikiankën;

usokin ꞌanan kana Moisés këñun,

Aarón ꞌimainun María, an atu ꞌakinun xuakën.

5ꞌËn unikama bërí kamina sinánkanti ꞌain

uisakin kara Balac Moabnu ꞌikë ꞌapu an sinánkëxa kixun,

ꞌimainun kara Balaam Beornën bakë bëchikë an uisakin ribi a kamiakëxa kixun.

ꞌImainun kamina Sitimnuax, Guilgalnu kuania kara Diosan mitsun ꞌunánun uisokëxa kixun aribi sinánkanti ꞌain.

Nukën ꞌIbun aín unikaman kara uisakin ñu ꞌaxunia kixun kainkë ñuikë bana

6¿Uisa ñu uani kuanxun karanuna,

Nukën ꞌIbu Dios manámi ꞌikë a rabiti ꞌain?

¿ꞌIanan karana vaca bakë achúshi baritiañukama

ꞌaímai këñutanu xaroxunti ꞌain?

7¿ꞌËn mil carnero ꞌinánanbi, xëxá ꞌumpax iskësaira

xëniribi ꞌinánkëx kara Nukën ꞌIbu kuëënti ꞌit?

¿ꞌIanan karana ꞌën ꞌatima ñu ꞌai ꞌuchakë kupín ꞌë a tërënxunun ꞌën bakë bëchikë apan ꞌinánuxun ñukati ꞌain?

8Ënë ñukama ꞌaxunti ka Dios kuëënima,

an ka nukama kaxa uisa ñux kara upí ꞌikën,

ꞌimainun uisa ñu nun ꞌaxunti kara ax kuëënia: ax ka ësa ꞌikën,

bëtsi unikamabë upí ꞌiti, uisa ñu ꞌakatsi karanuna kia usakinbi ꞌati,

ꞌimainun an kakësabiokin ꞌanan ax kikësabiokin ñu ꞌati.

Currently Selected:

Miqueas 6: cbrPB

Highlight

ਕਾਪੀ।

Want to have your highlights saved across all your devices? Sign up or sign in

Learn More About Kashibo-Kakataibo Biblia