Jonás 2
2
Jonásnën Dios ñuká ñuikë bana
1Usa ꞌain ka Jonásnën aín ꞌIbu Dios bainanmë ꞌëo chaiira aín puku ꞌukëmëuxunbi ñukákin, 2ësokin kakëxa:
ꞌitsaira tëmërakin kana mix ꞌën Dios ꞌikë ꞌakinun mi ñukan,
ñukákëxun kamina anuax bamatisa anuabi ꞌën bana kuakin ꞌë ꞌakian.
3Min kamina an manë nunti nikinkë unikaman parúmpapa nëbëtsi aín nëminra anu ꞌë ninun ꞌamian,
ꞌamikëxun nikë ka parúmpapa xobukë an ꞌë biaxa.
Bitsia ka aín bëchunkë chaiirabu an ꞌë nanë́nkin mapuaxa.
4Usakin ꞌakëxun kana mi ꞌura ꞌinunmi ꞌë ënkësa tankin;
uínsaranbi kana anuxun mi rabiti xubunu atsíntëkëntima ꞌai kixun sinan.
5Parúmpapa ꞌumpaxan ka chikítisama okin ꞌë nanë́nkin bëarakë ꞌiaxa;
ꞌianan kana parúmpapa nëmin ꞌukëmëu ꞌikë ñu koókëkaman ꞌën maxká këñunbi ꞌë ranëarukësa tan.
6Usai ꞌi kana me kini ꞌukëmëuira nipakëkësa ꞌixun;
¡ënuax kana uínsaranbi chikítima ꞌai kixun sinan!
ꞌaínbi kamina mix ꞌën ꞌIbu Dios ꞌixun, bamatisa ꞌikëbi ꞌë ië́mian.
7Usa ꞌain kana kushiñumasa tani kana bamati ꞌai kixun sinani,
mimi sinan;
sinánkin ñukákëxun kamina mix Dios ꞌixun anuxun, mi rabiti xubu upíira anuxun ꞌakësokin naínuxunbi ꞌën mi ñukákëxun kuan.
8Uin kara unínbia a rabinuxun bëtsi ñukama ꞌakë a rabikin,
Dios axa ië́mianankë a ëanxa;
9ꞌaínbi kana ꞌën mi asábi ka kai kuëënkin rabiti ꞌain rabikin,
kana ñuina ꞌatankëxun xaroxunti ꞌain;
usakin ꞌakin kana uisokin ꞌaxunuxun karana mi ka usabi okin ꞌati ꞌain:
¡Mixëshi kamina axa ië́mianankë Dios a ꞌain!
10Usa ꞌain ka Diosan bakanu ꞌikë bainanmë ꞌëo chaiira axa parúmpapa kuëbí me ꞌurama anu Jonás ëni anákin chikinun ꞌimiakëxa.
Currently Selected:
Jonás 2: cbrPB
Highlight
Share
ਕਾਪੀ।
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.