Oseas 14
14
Oseasnën Israel unikama Diosmi sinanatëkënun kixun ka ñuikë bana
1Israel unikama Nukën ꞌIbu Diosmi kamina sinanatëkënti ꞌain,
mitsúxmi ꞌuchakë a kupí kamina ꞌaisama kan.
2Usa ꞌain kamina Diosmi sinanatëkënkin ësokin mitsun a ñukáti ꞌain:
“Nukaman ꞌuchakama kamina nu mëníoxunti ꞌain,
mëníoxunkin kamina mix upí ixun nun
mi rabikëxun upíokin kuati ꞌain.
3Asiria unikamax ka nu ië́misama ꞌikën,
usa aín caballokama anbi nu abáti kuania ꞌabákintisama ꞌikën.
Usa ꞌain kananuna mix kamina nun Dios ꞌai kixun nunbi uniokë ñukama anëtëkëntima ꞌain,
axa ꞌibuñumakë unikaman ka ꞌain,
Dios ꞌixun min nuibakëxun ꞌunania.”
Diosan Israel unikama amiribishi upiti tsotia ꞌakinuxun ꞌaia kia ñuikë bana
4Ësai ka Dios kia:
ꞌËn kana Israel unikama ñunshinakëkia atun ꞌakë ñukama mëníoxunti ꞌain;
usokin ꞌakin kana ꞌën nuibaisa ꞌikëmabi atu nuibati ꞌain,
ꞌëx atumi nishtankëxunbi kana atu nuibatëkëan.
5ꞌËx kana Israel kama nibitan ꞌibúkin chabókë usaribi ꞌiti ꞌain,
usa ꞌain ka atux ro ꞌapákëxa uábukësa usaribi ꞌiti ꞌikën.
Usai ꞌika aín tapunkama Líbano menu ꞌikë i aín tapun menu takáshkikë usaribi ꞌiti ꞌikën;
6usai ꞌika aín pëñankama ax pëñanakëti
olivos pëñan upíirabu usaribi ꞌiti ꞌikën,
ꞌianan ka aín sanu ax Líbano menu ꞌikë kunxankama ꞌain sanusaribi ꞌiti ꞌikën.
7Usai ꞌika Israel kama amiribishi ꞌën bërúankëx upitax bukui trigo ꞌapákëxa ꞌupitax kanikë usai ꞌianan,
uvas ꞌapákëxa kanitankëx uábukësa ꞌianan Líbano menu ꞌapáxun uvas baka bikësa usaribi ꞌiti ꞌikën.
8Usa ꞌain ka Israel unikama kiti ꞌikën: ¿Uisati karana a rabinuxun ꞌakë ñukama ꞌën kuëënti ꞌain?
¡ꞌËx kana an ꞌën unikama ꞌakianan bërúankë ꞌain!
ꞌËx kana pino kakë ꞌi paxaira ꞌain pëchi usaribi ꞌain,
usa ꞌain ka atux ꞌën ꞌakinkëx upiti tsóti ꞌikën, kiax ka Dios kiakëxa.
Diosan anuishi sënë́nkin Oseas ká ñuikë bana
9An ñu ꞌunánkë unikama ꞌimainun sinánñu unikama,
akaman ka ënë bana kuati ꞌikën:
Kamabi ñu Diosan ꞌá ax ka upíokin ꞌá ꞌikën,
usa ꞌain ka an ñu ꞌupíshi akë unikaman ax kikësabiokin ꞌaia;
usa ꞌaínbi ka ꞌatima sinánñu unikama usakin ñu ꞌaiama Diosan ꞌatima oia.
Currently Selected:
Oseas 14: cbrPB
Highlight
Share
ਕਾਪੀ।
Want to have your highlights saved across all your devices? Sign up or sign in
© 1978, 1995, 2008, 2022 Wycliffe Bible Translators, Inc. All rights reserved.