Zakarya 11
11
1Ṉunguṉ’agugi mo, Liban, ko ôgôṉi nye ikum̃e yo! 2Zim̃iṉa, erere z’ôgana, konde ôkum̃e w’apôswi, mongi w’apendy’ikuṽi yaô w’ajilizyô! zim̃iṉaṉi, rere yi Basan, konde ig’ivôlô ny’apôswi! 3Ivenjavenji yi bôgiṉa pôlômè, konde ivendi nyaô ny’abundakaṉi; awaṉa w’iliyoni wi kungula, konde ekale zi Yoridan z’abundakaṉô.
4Yeṉo kambe Yeôva, Anyambyè yam̃, inè; nyez’adombe mi ke bazô! 5Waô wi kôla mô wi jôṉa mô; ayè yi kôla mô e bulya inè: Ôzaviṉô gôre Yeôva, konde my’apagi! n’ivenjavenji yaô yi pa pôgiṉa waô. 6Konde my’azele n’ekèṽa gôr’alwaṉi wi ntye, bulye Yeôva; na vôna, mi p’aṉaga ôm’edu gw’ago m’ôrangaṉô wè na gw’ago m’ôgi wè; wi be bôle ntye, na mi pa tômba waô avila gw’ago maô.
7Vovo my’anyez’adombè m’avegagi gô ke bazô, mô m’avegag’ambe avila g’ôlemba. N’awongi myè nkogu mbaṉi: mori my’aweyi yô inè, nkèngo, ni mori inè, igôrô. N’anyezi myè adombè. 8My’ayôṉ’ivenjavenj’irarô g’ôgwèli ôm̃ori; wi re jasiza pa myè, na myè kè my’are jeṉiza pa waô mbe. 9N’awulyi myè inè: Mi pa tô nyeza ṉwè! Nyiṉo nyi ke juwa, nyi ga yuwe; nyiṉo nyi ke pera, nyi ga vere; na miṉo mi tigaṉa, im̃ori nyi ga ny’ôzôṉe w’im̃ori. 10N’awongi myè nkogu yam̃ inè: nkèngo, n’ayôṉi myè yô gô jôṉe njeka y’ayekyô myè n’aṉongo môdu. 11N’ayôṉô yô ntyugu mèyoṉo; n’adombè ambe m’avônagi myè m’amyeṉi nè, nyiṉo ne igamba nyi Yeôva. 12N’awulinyi myè waô inè: J’aṉw’atonda, vaṉi myè ipi sam̃; aza ṉoṉo ko tigaṉi. N’avisi waô agôm̃i mi sikèl ararô mi sika ya pupu gw’ipi sam̃. 13N’awulinyô myè ne Yeôva inè: Vunga sô gôr’ôma wi pange vagô y’ambôṉô: igôlw’iṽya mènyoṉo ny’avenyô myè gô sô! N’awongi myè agôm̃i mi sikèl ararô mi sika ya pupu, avunga sô gôr’ôma wi pange vagô y’ambôṉô gô nagô yi Yeôva. 14Avila vovo my’ateṉi nkogu yam̃ yi mbaṉi inè, igôrô, gô bangwaṉe ngwèmô ntyo Yuda ntyo Israèl.
15N’awulinyô myè ne Yeôva inè: Wonga kè gôre wè imyanga y’ôvenjavenji wi r’edosu! 16Konde vôna, mi be nonguny’ôvenjavenji gô ntye, wi re wi pa bandam̃iṉ’adombè mi pera, ge but’idomb’inyangô, ge jinga miṉo mi re bonjaṉa pa, ge nyeza miṉo mi re mbyambye; ndô e be ny’ôzôṉe wa miṉo mi re poma pa, ko yè jaruṉ’ifèra sa mô gw’agôlô. 17Azile gôr’ôvenjavenji w’isolo fo, wi tig’adombè mè! Ôkwara w’iwora wi ga ṽye g’ôgo wè, na gw’intyo nyè iṉôm̃yè! Ôgo wè wi ga yôme, ko intyo nyè iṉôm̃yè ṉimô vya!
Currently Selected:
Zakarya 11: MYE
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.