Matay 15
15
1Vovo aṽyeṉi gôre Yesu irèndisi n’ifarisi avila gô Yerusalèm, awulya inè: 2Ntiṉa nde yi pav’iṉèngi yo inènja s’aṉèro? Konde wi pa jôvuṉ’ago maô gô nya waô inya. 3N’awiṉizô waô ne Yesu inè: Ntiṉa nde yi pava ṉwè kè ôzômbyô w’Anyambyè n’inènji saṉi? 4Konde Anyambyè awulyi nè: Lube reri yo ni ngi yo; n’ayè yi toṽe rerè ge ngwè, e ga yuwe njuwaga. 5Ndô aṉwè bulya inè: Ôm’edu e bulinye rerè ge ngwè inè: Ezom̃a z’arô nunguṉi myè na wè, z’atweṉi ôrunda gôr’ Anyambyè, gambèṉè alube reri yè ge ngi yè nyèṉè. 6Yeṉo aṉwè pang’igamba ny’Anyambyè ôsam̃u wa nyawènyawè n’inènji saṉi. 7Imbyagwaṉa, Yezaya avogi mbyambye g’ômwanji waṉi nè: 8Aṉaga wiṉo wi duba myè n’iṉumbu yaô, ndô irèm̃i yaô yi re bô avila gôre myè. 9Ndô wi duba myè gô nyawènyawè, nènjag’isômbya s’aṉaga.
10N’aweyi yè anaga, awulinya waô inè: Vôganyôṉi, ko kôtizaṉi. 11Arang’ezom̃a zi jingiṉa g’ôgwaṉa zô fweviz’ôma, ndô ezom̃a zi kogwa avila g’ôgwaṉa, zô mèzoṉo zô fweviz’ôma.
12Vovo aṽyeṉ’iṉèngi yè, awulinyè inè: W’avôrô inè, ifarisi s’aṽendi gw’ayogyô waô agamba mèmoṉo? 13Ndô awiṉizi nè: Ôwongw’edu wi re wi pa bèṉô ne Reri yam̃, wi be tôduṉô. 14Riga waô dyè; waô ne apoku mi kèndy’apoku; na j’ipoku ny’akèndy’ipoku, gambèṉè waô aṽaṉi wi be pôswa gw’iṽemba.
15N’awiṉizi Pyère awulya inè: Ṽènguṉa zwè nkôgô yiṉo, 16N’awulyi Yesu inè: Aṉwè p’are kè ikôtiza fo? 17Aṉwè pa kôtiza inè, ezom̃’edu zi jingiṉa g’ôgwaṉa zi pyagaṉa gw’iwum̃u, avila vovo zi falô gô nagô y’ôgombo? 18Ndô isam̃u yi kogwa avila g’ôgwaṉa yi pila g’ôrèm̃a; yiṉo yô fweviz’ôma. 19Konde avila g’ôrèm̃a kogw’ipikily’ibe, ijôṉa s’aṉaga, idèwa na wi ngaṉi, ôṽelaṉô, ijufa, ibèrinya, n’ipèdy’Anyambyè. 20Yom̃a yiṉo yô fweviz’ôma; ndô gô nya ago m’ayôvuṉô, yi pa fweviz’ôma.
21Alubwi Yesu avila vovo agènda gw’inkôṽa si Tir na si Sidôn. 22Na vôna, ômwantô wi Kanaan aṽyeṉi avila gw’inkôṽa mè, alagiṉè inè: Vôgiṉa myè, Rera, Ômwaṉa wi David! Ômwaṉi wam̃ ômwantô are sokolyô pa pôlô n’iṉiṉiṽe. 23Ndô e re fwiṉize yè igamba; n’aṽyeṉ’iṉèngi yè agwenè inkolo, awulya inè: Wiṉizè, konde e tônga gô nyum̃i yazô. 24Ndô awiṉizi awulya inè: My’are tôm̃ô pa kaô gw’ adombè mi re pera pa mi nagô y’Israèl. 25Ndô ômwantô aṽyeṉi alôṽiṉè akotolo, awulya inè: Rera, ṉunguṉa myè! 26N’awiṉizi yè inè: E zele mbya gô bong’inya s’awaṉa, avungiṉa sô imbwa. 27N’awulyi ômwantô inè: Èñ, Rera, ndô vangane imbwa si nye nkizi yi pôswa avila gô tavulu y’ireri saô. 28N’awulinyô yè ne Yesu inè: Ômwantô, ibekelyi so si r’ipôlô; ga lwaṉe gôre wè ga nte belo. N’arôlizyô ômwaṉi wè ômwantô gw’igwèra mè.
29Alubwi Yesu avila vovo aṽya pyèrè n’eliṽa zi Galile. N’avandi yè gô nômba, alwaṉa baru vovo. 30N’aṽyeṉi aṉag’awenge gôre yè, n’aṽagi waô bôke, apoku, n’am̃am̃u, ni ṉèm̃a, n’awèṉè awenge, alimbiṉa waô gw’agôlô mè, n’ayingi yè waô; 31yeṉo am̃ami aṉaga waôdu, gw’ayeṉi waô am̃am̃u mi kamba, ni ṉèm̃a tôlizô pa, ni bôke yi kènda, n’apoku mi jeṉa; n’azum̃inyi waô Anyambyè y’Israèl.
32Aweyi Yesu iṉèngi yè, awulya inè: Mi jeṉ’ aṉaga wiṉo ekèṽa, konde w’adwaṉi na myè ntyugu ntyarô, ndô wi zele n’ezom̃a zi nyô waô. Mi pa bela gô fwiṉiza waô ni njaṉa, wi vende kènde ntyèla gô mpoṉo. 33N’awulinyô yè n’iṉèngi yè inè: Azwè be dèng’inya kwèkwè gô jôriz’aṉag’awenge wiṉo g’ôrôve na gweṉi? 34N’aṽambyô waô ne Yesu inè: Aṉw’are n’amunga mi mpèmba amya? Awiṉizi waô inè: ôrwageṉô n’intyuè sa kwè. 35N’alwaṉizi yè aṉaga baru gô ntye. 36N’awongi yè amunga mi mpèmba ôrwageṉô n’intyuè, n’ayè pa p’akeṽa, am̃oguṉi yô, ava yô iṉèngi, n’agerizi waô yô gôr’aṉaga. 37N’anyeṉi waôdu ayôra, n’agum̃inyi waô nkizi y’arigaṉi itôndô ôrwageṉô ralye. 38Na waô w’anyeṉi w’avegagi ntozèny s’aṉôm̃e nay, tômbare p’antô n’awaṉa.
39Na gw’awiṉizi yè aṉaga, agweṉi gw’elende, aṽya gô ntye yi Magadan.
Currently Selected:
Matay 15: MYE
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.