Matay 13
13
1Gô ntyugu mèmô agogwi Yesu avila gô nagô, alwaṉa baru g’ôzamba w’eliṽa. 2N’alataṉi aṉag’awenge gôre yè, yeṉo agweṉi yè gw’elende, alwaṉa baru. N’agum̃aṉi aṉaga waôdu g’ôzègè. 3N’agambiṉi yè waô isam̃u imyenge n’inkôgô, awulya inè:
4Vônaṉi ônyènyisi agèndi gô nyènya. Na gw’anyènyagi yè, ilônd’imyèwo y’avôswi gô mpoṉo, n’aṽyeṉ’ inyoṉi anya yô. 5N’imyèwo y’avôswi gw’imbôra s’adô si re si re pegege ni ntyèngè nyenge, n’azunge fwelyi yô, konde yi re pegege ni ntyèngè nyenge; 6ndô gw’ arongwi nkômbe y’avezyô ayôm̃a, konde yi re pegege n’iramba. 7N’imyèwo y’avôswi gw’arèndè: n’avôm̃i arèndè, araga yô. 8N’imyèwo kè y’avôswi gô ntyèngè mbya: n’ayaṉi yô ilônda, intyw’ im̃ori nkam̃a, n’intyw’ im̃ori agôm̃i ôrôṽa, n’intyw’ im̃ori agôm̃i ararô. 9Ayè yi re n’arôy gô jogo e ga yogo.
10Aṽyeṉ’iṉèngi yè awulinyè inè: Ntiṉa nde yi kambo na waô n’inkôgô? 11Awiṉizô waô ne Yesu iṉè: Konde aṉw’ are pô pa gô my’ayumbuṉô m’iṉongo ny’ôrôṽa, ndô gôre waô e zele pô pa. 12Konde ayè yi re dènga pa e be pô, ko yè bunyô, ndô ayè yi re e zele, vangaṉ’ezom̃a zi re na yè zi be bongiṉô yè. 13Gô ntiṉa yiṉo mi kôviṉa waô inkôgô, konde gô jeṉa waô wi pa jeṉa, na gô jogo waô wi pa jogo ge kôtiza. 14Na gôre waô ipoga si Yezaya si twa rèti si bulya inè: Gw’ijogo aṉwè be jogo, ko ṉw’agôtiza; na gw’ipôna aṉwè be pôna, ko ṉw’ayeṉa. 15Konde irèm̃a y’aṉaga wiṉo y’apom̃i; wi re joliza p’arôy maô, wi re nunja p’antyo maô, wi vende jena n’antyo maô, ayogo n’arôy maô, agôtiza n’irèm̃i yaô, agalwa, ko mi tôliza waô. 16Ndô ôzaviṉô gw’antyo maṉi, konde mi jeṉa, na gw’arôy maṉi, konde mi jogo. 17Giligili mi bulinya ṉwè inè, ivogis’imyenge n’aṉag’aṽya w’aṽelagi gô jeṉ’isam̃u yi jeṉô ṉwè, ko w’ayeṉa yô, na gô jogw’isam̃u yi jogo ṉwè, ko w’ayogo yô.
18Sambô, yogoṉi nt’ar’ibènguṉa si nkôgô y’ônyènyisi. 19Gô jog’ôm’edu igamba ny’iṉongo, ko agôtiza nyô, vovo by’ Iṉiṉ’iṽe azwa igamba nyi re nyènyô pa g’ôrèm̃i wè: wiṉo ne yè anyènyô gô mpoṉo. 20N’ayè y’anyènyô gw’imbôra s’adô, ne yè yi jogw’igamba, ko yè sunge bonga nyô ni mbya; 21ndô e zele n’ôramba g’ôkuṽi wèmè, ndô are vo mw’ôlingô, na gô bye njuke ge ikombizô g’ômwanja w’igamba, e pôswa nèganèga. 22N’ayè y’anyènyô gw’arèndè, ne yè yi jogw’igamba, ko inaka si ntye yiṉo, n’ikombiza s’aṉiva tag’igamba, ko nyô twe nkele. 23N’ayè y’anyènyô gô ntyèngè mbya, ne yè yi jogw’igam a, agôtiza nyô; e jaṉ’ilônda, intyw’im̃ori nkam̃a, n’intyw’ im̃ori agôm̃i ôrôṽa, n’ intyw’ im̃ori agôm̃i ararô.
24Agôviṉi yè waô nkôgô nyèṉè, awulya inè: Iṉongo ny’ôrôṽa nyi r’egolaṉi g’ôma w’anyèny’ ilônd’imbya gô ntyagi yè. 25Ndô gw’alèwagi aṉagi wè, aṽyeṉi ôlôvalôvi wè, anyèny’ ilônd’imbe gô gare y’imbya, agèndaga. 26Ndô gw’awely’ijavi, ayaṉ’ilônda, vovo ayeṉaṉ’ilônd’imbe kè. 27N’aṽyeṉ’inyôngô s’ôma w’aṉivi ntyaga awulinyè inè: Rera, ô pa nyèny’ilônd’imbya gô ntyagi yo? Ndô y’adèng’ilônd’imbe na gweṉi? 28N’awiṉizi yè waô inè: Ôlôvalôvi ayè are denda pe ndaga yiṉo. N’awulinyô yè n’inyôngô mè inè: Ô bela nè azwè ga ge tôduṉe yô? 29N’awulinyi yè waô inè: Nyawè; gô tôduṉa ṉwè ilônd’imbe, aṉwè vende tôduṉ’ilônd’imbya kè na yô. 30Rigaṉi yô imbaṉi pôm̃a ta kwanga gw’egômbe z’idula; gw’egômbe z’idula, gambèṉè mi be bulinye mongi wi dula inè: Lônge duleṉ’ilônd’imbe, ko kôraṉi yô n’ata gô peza yô, ndô ṽagaṉ’ilônd’imbya gô nagô yam̃.
31Agôviṉi yè waô nkôgô nyèṉè inè: Iṉongo ny’ôrôṽa nyi r’egolaṉi g’intyo nyi mutardi ny’awongyô n’ ôma, aṽèṉa nyô gô ntyagi yè. 32Nyi re rèti inyangômè vyagaṉô n’ilônda yôdu; ndô ja ny’apôm̃a, nyi r’ivôlô vyagaṉô n’ôwongw’edu, agalw’erere, ko inyoṉi s’igôṉô bya gô dwaṉa gw’ampari ma zô.
33Agôviṉi yè waô nkôgô nyèṉè inè: Iṉongo ny’ôrôṽa nyi r’egolaṉi ga levèn y’awongyô n’ômwantô, awela yô gô gèṉizô yi farinya rarô, gô pange mpèmba yôdu gô panda.
34Yesu agambiṉ’aṉaga isam̃u yiṉo yôdu n’inkôgô, e pa kamba na waô nkôgô fo, 35ko igamba ny’agambyô n’ôvogisi twa rèti inè: Mi be nunguṉ’ôgwaṉi wam̃ n’inkôgô, mi be takily’isam̃u y’ayumbuṉô avila gw’ipangô si ntye.
36Vovo Yesu awiz’aṉaga, n’ ayingiṉi yè gô nagô. N’aṽyeṉ’iṉèngi yè gôre yè, awulya inè: Vènguṉa zwè nkôgô y’ilônd’imbe yi ntyaga. 37Awiṉizi yè inè: Ayè y’anyèny’ilônd’imbya ne Ômwaṉa w’ôma. 38Ntyaga ne ntye yiṉo; ilônd’imbya ne awaṉa w’iṉongo; ilônd’imbe ne awaṉa w’ôm’ombe; 39ôlôvalôvi anyènyi yô ne Satan; egômbe z’idula ne ntyay yi ntye; mongi wi dula ne iyenjèl. 40Sambô ga nte dulô ilônd’imbe ko yô pezô g’ôgôṉi, yeṉo be dwaṉa kè gô ntyay yi ntye. 41Ômwaṉa w’ôma e be tôm̃’iyenjèl sè ko sô tômba avila gw’iṉongo nyè abaku môdu, na waô wi janj’ibe, 42awala waô gw’elôngô z’ôgôṉi; gôgô be dwaṉ’edingô ni nkègèrè y’anô. 43Vovo aṉag’aṽya wi be bamba ga nkômbe gw’ iṉongo nya Reri yaô. Ayè yi re n’arôy gô jogo e ga yogo.
44Iṉongo ny’ôrôṽa kè nyi r’egolaṉi g’igumba nyi re jumbuṉô pa gô ntyaga. Nyi re gô dèngô nyô n’ôma e jumbuṉa nyô; ndô vo mbya ya nyô, e kènda, agôle yom̃a yôdu yi re na yè, ko yè kôle ntyaga mè.
45Iṉongo ny’ôrôṽa kè nyi r’egolaṉi g’ôma wi kôla, e but’adô ambya. 46Are gô dèngè idw’im̃ori nyi njôni mpôlô, e kènda agôle yom̃a yôdu yi re na yè, ko yè kôla nyô.
47Iṉongo ny’ôrôṽa kè nyi r’egolaṉi g’elôṽa pungô pa gô mbeṉe, ko zô datiz’ôṉongw’edu w’intyuè. 48Zi re gô jônya zô, wi dura zô gô ntye, ko waô dwaṉa baru agenj’intyuè imbya gw’ilômbô, ndô imbe wi fala sô. 49Yeṉo be dwaṉa kè gô ntyay yi ntye. Iyenjèl si be bya, aṽanguny’aṉag’aṽe avila gôr’aṉag’ aṽya, 50awala waô gw’elôngô z’ôgôṉi; gôgô be dwaṉ’edingô ni nkègèrè y’anô.
51Yesu awulinyi waô inè: Aṉw’akôtiz’isam̃u yiṉo yôdu? Ayiviri waô inè: Èñ, Rera.
52N’awulinyi yè waô inè: Ôrèndisy’edu, sambô, ar nènga p’isam̃u y’iṉongo ny’ôrôṽa, ar’egolaṉi g’ôm’aṉivi nagô, e koguny’avila gw’ igumbi nyè yom̃a yoṉa ni yom̃a lungu.
53Arweṉi gw’am̃azi Yesu inkôgô siṉo, alubwi avila vovo. 54N’aṽyeṉi yè gô ntye yèmè, aṉènja waô gô nagô yaô yi soṉo, n’am̃ami waô w’ayogyô yè, awulya inè: Imya siṉo ni lemba yiṉo yi re n’ôma wiṉo yi pila na gweṉi? 55Wiṉo arang’ômwaṉa w’ôkèngèkèngè? Ngi yè e pa fweyô inè, Marya? N’awôngi yè aṉôm̃e aranga wa Yakobu, wa Yôsèf, wa Simôn, wa Yudi? 56Ni yombi yè yôdu yi zele gôre zwè? Sambô isam̃u yôdu yi re n’ôma wiṉo yi pila na gweṉi? 57N’aṽendyô waô g’ômwanji wè.
Ndô Yesu awulinyi waô inè: Ôvogisi e pèdyô kaô gô ntye yèmè na gô nagô yèmè. 58Yeṉo e pa dende lemba yenge gô mbôra mè g’ômwanja w’itwaṽekelyi saô.
Currently Selected:
Matay 13: MYE
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.