Matay 11
11
1Arweṉi gw’am̃azi Yesu gô nèj’igôm̃i nyè ny’iṉèngi n’iṉèngi yè mbaṉi, alubwi avila vovo gô nènja na gô kambiṉa gw’inkali saô.
2Na gw’ayogyô Yôan gô ntyôgô g’ômwanja w’ijanja si Krist, arôm̃’iṉèngi yè, 3awulinyè inè: Awè ne yè yi bya, mbè azwè ga vengiṉ’ômwèṉè. 4Awiṉizyô waô ne Yesu inè: Gèndaṉi ko takilyaṉi Yôan isam̃u yi jogo ṉwè ni jeṉa: 5apoku mi jeṉa, bôke yi kènda, inkaṉi sa gelô si maṉa, impôge si jogo, bende yi tôngunyô, n’ikuge yi kambiṉô ntyangô. 6N’ôzaviṉô gôre yè yi re aṽendyô g’ômwanji wam̃!
7Gw’agèndi mongi siṉo, Yesu avakilyi gô buliny’aṉaga g’ômwanja wi Yôan inè: Ande z’age jeṉô ṉwè gw’itôve? Nkuṉe y’azugyazugyôgô ne ômpunga? 8Ndô ande z’age jeṉô ṉwè? Ôma bora p’ingoy si njôni? Vônaṉi, waô wi bor’ingoy si njôni wi re gw’inagô s’aga. 9Ndô ande z’age jeṉô ṉwè? Ôvogisi? Èñ, mi bulinya ṉwè, na vyagaṉô n’ôvogisi. 10Konde wiṉo ne yè arèndyô inè: Vôna, mi tôm̃’ igende nyam̃ gô bôsô yo, gô kekize mpoṉo yo gô bôsô yo. 11Giligili mi bulinya ṉwè inè: Gôre waô wi re jaṉô pa n’antô, pa bôm̃uny’ôm’ômpôlô vyagaṉô ni Yôan‐Batist. Ndô ayè yi r’ômwangômè gw’ iṉongo ny’ôrôṽa ar’ômpôlô vyagaṉô na yè. 12Avila gw’egômbe zi Yôan‐Batist aṽya gw’egômbe ziṉo, iṉongo ny’ôrôṽa nyi bongô ni ngulu, ni vèmba yi swa nyô ni ngulu. 13Konde ivogisi yôdu n’ivanga y’avogagi kwanga gw’egômbe zi Yôan; 14na j’aṉw’ajivira gô bong’igamba, wiṉo ne Eliya avegagi gô bya. 15Ayè yi re n’ôrôy gô jogo, e ga yogo.
16Ndô mi be kolaṉ’ivôm̃a nyiṉo n’ezom̃a nde? Nyi re g’awaṉa wi re barugebaru gw’igôliṉô, na wi kamba n’indegô saô, awulya inè: 17Azwè abôliṉi ṉwè abeka, ndô aṉwè pa jiṉa; azwè adeṉi edingô, ndô aṉwè pa deṉa. 18Konde Yôan aṽyeṉi, e pa nya ge jonga, n’awulyi waô inè: Are n’iṉiṉ’iṽe. 19Ndô Ômwaṉa w’ôma aṽyeṉi nyagaga ni njongaga, n’awulyi waô inè: Vônaṉi, nyeṉi ni nyongi, ndegô y’ipublikan n’aṉag’aṽe. Ndô imya si re dwaṉizô p’ôgôre vo awaṉi wè.
20Vovo avakilyi yè gô sèmb’inkala s’alendyô yè lembi yè vyagaṉô, konde si pa nige nkôndi. 21Azile gôre wè, Kôrazin! Azile gôre wè, Bètsayda! Konde arwe nè lemba yi re dendô pa gôre ṉwè y’aliwô y’adendyô gô Tir na gô Sidôn, gavoṉo s’adingi nige nkôndi, ni pinde n’ômbu. 22Yeṉo mi bulinya ṉwè inè: Gô ntyugu y’ijèkèlya, Tir ni Sidôn si be dwaṉa n’azingô ma kwè vyagaṉô na ṉwè. 23N’awè, Kapèrnaum, yi re pandyô pa kwanga g’ôrôṽa, ô be sônyô gw’ilômbô; konde arwe nè lemba yi re dendô pa gôre wè y’aliwô y’adendyô gô Sôdoma, gavoṉo y’arô dwaṉi kwanga na ṉèṉo. 24Yeṉo mi bulinya ṉwè inè: Gô ntyugu y’ijèkèlya, ntye yi Sôdoma yi be dwaṉa n’azingô ma kwè vyagaṉô na wè.
25Gw’egômbe mèzoṉo, ayiviri Yesu awulya inè: Akeṽa, Rera, Ôvangiṉi w’ôrôṽa ni ntye, konde w’ayumbuṉ’isam̃u yiṉo avila gôr’aṉaga w’imya na w’ikeli, ko wè tum̃inya yô gôre kèykèy. 26Èñ, Rera, mi sum̃inyo konde yeṉo arweṉi mbya gw’antyo mo. 27Yom̃a yôdu yi re pô pa myè ne Reri yam̃; e zel’ ôma e my’ Ômwaṉa, kaô ni Rerè; e zel’ôma kè e mye Rerè, kaô n’Ômwaṉa, n’ôm’edu e jivirô n’Ômwaṉa gô tum̃inyè yè.
28Yôgôṉi gôre myè, aṉwèdu y’ajasi, aliriṉô n’arwaṉô, ko mi jowiza ṉwè. 29Wongaṉi mpangi yam̃ gw’ikuṽi yaṉi, ko nèngaṉi gôre myè, konde my’are ni nkèngo n’ôkendekende g’ôrèm̃a, ko ṉwè dèng’ijowa gw’aṉiṉi maṉi. 30Konde mpangi yam̃ yi re dèla, n’irwaṉô nyam̃ nyi re javura.
Currently Selected:
Matay 11: MYE
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.