ၸႃႇၶရီႉ 13
13
1ၼႂ်းမိုဝ်ႉဝၼ်းၼၼ်ႉ ၼမ်ႉမေႃႇ ဢွၵ်ႇႁူး တၵ်းမီးတၢင်းဢၼ် ၽုၺ်ႇပိုတ်ႇဝႆႉ တီႈမဵဝ်းတႃႇဝိတ်ႈ ဢိၵ်ႇတင်း ၵူၼ်းဝဵင်း ယေႇရူႉသလႅမ်ႇၸိူဝ်းၼၼ်ႉ ပုၼ်ႈတူႉၸရိူၵ်ႈဢပႅတ်ႈ ဢိၵ်ႇတင်း တၢင်းဢၼ်ၵူဝ်ႈၵိူၵ်ႇ၊ ဝူၺ်ႇႁင်ႈၼၼ်ႉဢေႃႈ။- 2ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ ၼႂ်းမိုဝ်ႉဝၼ်းၼၼ်ႉ ၵဝ်တၵ်းပႄႇၽဵဝ်ႈ ၼႃႇမႃႉၸိုဝ်ႈသဵင်ရုၵ်ႈထူႉ တင်းလၢႆ ပႅတ်ႈသေၵႃႈၼႂ်းမိူင်းၸဝ်ႈ ႁႂ်ႈထၼ်ႈပေႃး ၽူႈလႂ်ဢမ်ႇမၢတ်ႈဢမ်ႇတွင်း ၼႂ်းၶိင်ႇမိူဝ်ႈၵမ်းလိုၼ်း ၼၼ်ႉဢေႃႈ။ ၵဝ်တၵ်း ႁေႃႈၶဝ်ၸိူဝ်းဢၼ် ႁဵတ်းပရေႃးၽႅတ်ႈ ဢိၵ်ႇတင်း ဝီႉၺိၺ်ႇဢၼ်ၵူဝ်ႈၵိူၵ်ႇၼၼ်ႉ ဢွၵ်ႇသေၵႃႈၼႂ်းမိူင်းၸဝ်ႈဢေႃႈ။- 3မိူဝ်ႈၼၼ်ႉ ပေႃးၵူၼ်း သေၵေႃႉသေၵူၼ်းယင်း ႁဵတ်းပရေႃးၽႅတ်ႈ ယူႇၸိုင်၊ ပေႃႈမႄႈ ဢၼ်ၵိူတ်ႇလဵင်ႉမၼ်းမႃးၼၼ်ႉ တၵ်းလၢတ်ႈတီႈမၼ်းလႄႈဝႃႈ၊ မႂ်းၼႆႉတၵ်းလႆႈၶၢမ်ႇတၢႆ ၵွပ်ႈပိူဝ်ႈဢၼ် မႂ်းဢိင်ၼႃႇမႃႉၸိုဝ်ႈသဵင် ထႃႇဝရႃႉၽြႃးသေလႄႈ ႁေႃးလၢတ်ႈၵႂၢမ်းမူႉသႃႇ ၼၼ်ႉဢေႃႈ၊ ဝႃႈၼင်ႇၼႆသေလႄႈ ပေႃႈမႄႈမၼ်း ဢၼ်ၵိူတ်ႇလဵင်ႉမၼ်းမႃးၼၼ်ႉ တၵ်းဢွၼ်ၵၼ် တႅင်းမၼ်းပွင်ႇပဵဝ်ၵႂႃႇ ၼႂ်းမိူဝ်ႈဢၼ်မၼ်းယင်းတိုၵ်ႉ ႁဵတ်းပရေႃးၽႅတ်ႈယူႇ ၼၼ်ႉဢေႃႈ။- 4ၼႂ်းမိုဝ်ႉဝၼ်းၼၼ်ႉ ပရေႃးၽႅတ်ႈတင်းလၢႆ တၵ်းဢွၼ်ၵၼ် ဢူၵ်းဢၢႆ ၵွပ်ႈပိူဝ်ႈ ရူႇပႃႇရူင်ႇဢၼ်ၶဝ်ႁၼ်ၼၼ်ႉ ၼႂ်းမိူဝ်ႈဢၼ်ၶဝ် ႁေႃးလၢတ်ႈယူႇၼၼ်ႉ ႁင်းၽႂ်ႁင်းမၼ်းလႄႈ၊ ၶဝ်တၵ်းဢမ်ႇၼုင်ႈဢမ်ႇမႆ ၶူဝ်းၼုင်ႈ ဢၼ်ၶူၼ်ႁူဝ်ယၢဝ်းၼႃႇၼၼ်ႉ ႁႂ်ႈလႆႈပႅတ်ႉလႅၼ်ပိူၼ်ႈ။- 5မၼ်းတၵ်းလၢတ်ႈလႄႈဝႃႈ၊ ၵဝ်ၶႃႈၼႆႉ ဢမ်ႇၸႂ်ႈ ပရေႃးၽႅတ်ႈၶႃႈၵူၺ်ႉ။ ပဵၼ်ၵေႃႉဢၼ် ႁဵတ်းႁႆႊႁဵတ်းၼႃးဢေႃႈ။ ၵဝ်ၶႃႈပဵၼ်ၵေႃႉဢၼ် လႆႈၶၢမ်ႇႁဵတ်းၶႃႈတီႈပိူၼ်ႈ ၸႃႉၸဵမ်မိူဝ်ႈဢၼ် ယင်းလဵၵ်ႉယင်းဢွၼ်ႇၼၼ်ႉၶႃႈယဝ်ႉ၊ ဝႃႈၼင်ႇၼႆဢေႃႈ။- 6ပိူၼ်ႈတၵ်းထၢမ် တီႈမၼ်းလႄႈဝႃႈ၊ ႁွႆးတၢမ်ႇ ဢၼ်ပေႃႇဢွၵ်ႇမႃး ၵႃႈၼႂ်းမိုဝ်းမႂ်းၸိူဝ်းၼၼ်ႉၸမ်ႉ၊ ပဵၼ်ၵႃႈသင်၊ ဝႃႈၼင်ႇၼႆသေယဝ်ႉ၊ မၼ်းတၵ်း ၶိုၼ်းလၢတ်ႈလႄႈဝႃႈ၊ ႁွႆးတၢမ်ႇၼႆႉၸမ်ႉ၊ ပဵၼ်ႁွႆးတၢမ်ႇ ဢၼ်ၵဝ်ၶႃႈ လႆႈၶၢမ်ႇ ၵႃႈၼႂ်းႁိူၼ်းၵေႃႉသေႈၵဝ်ၶႃႈ ၸိူဝ်းၼၼ်ႉၶႃႈဢေႃႈ၊ ဝႃႈၼင်ႇၼႆဢေႃႈ။
ဢမိင်ႉတၢင်းဢၼ်ဢဝ်တၢႆၵေႃႉဢၼ်လဵင်ႉသူဝ်းၽြႃးပဵၼ်ၸဝ်ႈ
7ၸဝ်ႈပူဝ်ႇပႃႇၵၢင်ႁၢဝ် ထႃႇဝရႃႉၽြႃး မီးဢမိင်ႉၸမ်ႉ၊ လၢပ်ႇလႅဝ်းဢိူၺ်း၊ တိုၼ်ႇမႃး ယူႇၽၢႆႇၼိုင်ႈ တင်းၵေႃႉဢၼ် လဵင်ႉသူဝ်းထိင်းသူဝ်းၵဝ်၊ ၵေႃႉဢၼ်ပဵၼ်ဢၼ်ႁူမ်ႈဢၼ်ပွင်း လူၺ်ႈၵၼ်တင်းၵဝ်ၼၼ်ႉတႃႉ။ ပေႃႉယႅၼ်ႉၵေႃႉဢၼ် လဵင်ႉသူဝ်းထိင်းသူဝ်းၼၼ်ႉ တၢႆတႃႉ။ ပေႃးႁဵတ်းၸိူဝ်ႉၼင်ႇၼၼ်ၸိုင် သူဝ်းတင်းလၢႆၼၼ်ႉ တၵ်းလႆႈၽၢတ်ႇၽႄၵၼ် မၢၵ်ႇမိူဝ်ၵႂႃႇဢေႃႈ။ ၵႃႈၼိူဝ်သူဝ်းဢွၼ်ႇ တင်းလၢႆၵေႃႈ ၵဝ်တၵ်းဢဝ်မိုဝ်းၵဝ် တၢင်ႇသႂ်ႇလူးၵွၼ်ႇဢေႃႈ။- 8ထႃႇဝရႃႉၽြႃး မီးဢမိင်ႉၸမ်ႉ၊ ၵႃႈၼႂ်းမိူင်းၸဝ်ႈ တင်းမိူင်းၼၼ်ႉ၊ သွင်ပုၼ်ႈ တၵ်းလႆႈ ၶၢမ်ႇတၢင်းဢၼ် ပႄႇတႅပ်းပႅတ်ႈသေလႄႈ ဢဝ်တၢႆပႅတ်ႈလႄႈ ပုၼ်ႈၼိုင်ႈၵူၺ်း တၵ်းလႆႈ ၵိုတ်းၵျၢၼ်ႇဝႆႉဢေႃႈ။- 9ၵဝ်တၵ်းႁႂ်ႈပုၼ်ႈ တႃႉတီႉယႃႉၼၼ်ႉ ပႆလတ်းၵႂႃႇ ၵႃႈၼႂ်းၵၢင်ၽႆးဢေႃႈ။ ၵဝ်တၵ်းၶႃႇၶဝ် မိူၼ်ၸိူဝ်ႉၼင်ႇဢၼ် ၶႃႇငိုၼ်းၼၼ်ႉလႄႈ ၸၢမ်းတူၺ်းၶဝ် မိူၼ်ၸိူဝ်ႉၼင်ႇဢၼ်ၸၢမ်းတူၺ်းၶမ်း ၼၼ်ႉဢေႃႈ။ ၶဝ်ၼၼ်ႉ တၵ်းႁဵတ်းပထၼႃႇ တီႈၼႃႇမႃႉၸိုဝ်ႈသဵင်ၵဝ်လႄႈ ၵဝ်တၵ်းထွမ်ႇဢဝ်ၵႂၢမ်းၶဝ်ဢေႃႈ။ ၵဝ်တၵ်းႁွင်ႉႁဵၵ်ႈၶဝ် မဵဝ်းၵူၼ်းၵဝ်လႄႈ ၶဝ်ၵေႃႈ တၵ်းဢွၼ်ၵၼ်ႁပ်ႉတုင်းဢဝ်လႄႈဝႃႈ၊ ထႃႇဝရႃႉၽြႃးၼၼ်ႉ ပဵၼ်ၽြႃးပဵၼ်ၸဝ်ႈႁဝ်း ဢေႃႈ၊ ဝႃႈၼင်ႇၼႆဢေႃႈ။
Currently Selected:
ၸႃႇၶရီႉ 13: CBMS
Highlight
Share
ਕਾਪੀ।
Want to have your highlights saved across all your devices? Sign up or sign in
Copyright © 2021 by OMF International, Shan Baptist Churches Fellowship