Makaabon 9
9
ABIMALIK MALIK YEKKE
1Gidqoón-Abimalik, Seekem deqsitta magaalay kay abiino elle tanihiyya fan gexe. 2Too marak iyyemii, «Seekem-marak intaanamahaa: ‹Gidqoon xaylok malcina-taban inkih, abbobti siinik yakkeenim siinih taysem kee, wonna hinna'mmay, kay xaylok inki num siinik abba yakkem siinih taysem doorita› keenik inxica» iyye. Qagissa heeh keenik iyyeemih, «Macaa, yi tiyah tu gactek, akah taaxigen innah, anu sin qabalaay sin nabsi kinniyo» iyye.
3Kay inah tooboko, «Kok naabbeh nan» 'yaanam kaal gacseeniih; sarrak Seekem marah usuk iyyem warsen. Too mari too yab yoobbe waqdi, Abimalik abbah haysitaanam dooriten. «Abimalik ni ramadaay abbah kaa haysinna» iyyen. 4Sarrak Bica-edde-aben-Baqal elle yaqbuden qarik, garaasak malcina-taban beyya heenih kaah yeceen. Usuk ta lakqot qamallittey sinam inkim akak intehiyya xaamma heeh is lih ken hee. 5Tokkek Qofra akak iyyan magaalal tan abbah-xaylo fan gexeeh, too magaalal yen xaahih amol malcina-taban tooboko inkih yusguude. Takkay immay barah inkih keenik qunxuk yen toobokoytay migaaqah Yootam deqsitahiyya yombooqoreh raaqe. 6Sarrî-saaku Seekem kee Beet-Millo deqsitta magaalah mari titta geyya heeh, Seekemil qamiddi garil tan garsah gubal Abimalik reediseeniih, malik kaa aben.#Yoosuwa 24:26
YOOTAM WARSE CEELALLO
7Yootam tah yoobbe waqdi, Geriidim deqsitta qaleh amol bukka 'yeeh, deero abe. Iyyeemih, «Seekem maraw! Yalli sin yab yaabbuk yoo oobbeyay. 8Dumah yan saaku caxa akak inxicca 'yaanam titta geyya hayteeh, ‹Malik doorinnay› iyyen. Malikih haysitaanam faxeenim *daytuun-caxak teneeh; too caxak, ‹Daytuun caxay, atu ni malik tik› iyyen. 9Too caxa tohuk keenil gacissemii, ‹Mango yallitte kee ummat yaynabe nabam meqe saliid akak bicsen xalay cabba heeh, malik akkem yoh mabicta› 'yaanam inte iyyan.
10Too caxa toh keenil gacisse waqdi, *sublal yemeeteeniih, ‹Malik neh tik› teetik iyyen. 11Subla kaadu keenil gacissemii, ‹Abah an xalayay tamu meqehiyya cabba heeh, malik akkem yoh mabicta› 'yaanam inte.
12Subla toh keenil gacisse waqdi, qinab xalta caxal yemeeteeniih, ‹Malik neh tik› teetik iyyen. 13Too caxa kaadu keenik inteemih, ‹Malik akke'gidih, qinabak bicsen maqabay mango yallitte kee ummat ruffa haahiyya cabba heeh siinil reedam mabicsa› keenik inte iyyan.
14Sarrak ellecabol tikka 'yaanamaak waaqexxol yemeeteeniih, ‹Atu malik neh tikeey» teetik iyyen. 15Too waaqexxo keenil gacisseemih, ‹Isin baguuk isinni malikih yoo doorteenik, tonnal amaay a yi silaaloh gubal gaca. Tah cinten sin tekkek, yi ludway keenan lehiyyak habug inta gira awqeleeh, too gira Lubnaan rasul tan sariida cararisele› keenik inte iyyan.
16«Hay, taway siinik axcemii: Abimalikit abten dooro gitak taniimiy baguuk abteenihiyya kinnii? Gidqoon siinih xiqem kassa haak, kay buxah marah usuk abeemil galto gacisseenii? 17Yi abba sin aftoh Miidiyan marat qeebi abem kassa maay haytan? Miidiyan marak sin cata'gidih, isi roocih maca yot akkele axce'kal, sin taagah qeebi abak sugek; toh taaxigeenii? 18A saaku kay qaduwwik maacisseenih; siinih abe maqaaneh galtoh kay xayloh malcina-taban inki xaahih amol qiddeenih; Abimalik sin xiinisu waa malikih reedissen. Toh akah abteenim, Abimalikiy y'abba kaddaamah tan barrat xalehiyya sin absumak sugeemih abten. 19Ta saaku Gidqoon kee kay buxah marak abteenim gitah taniimiy baguuk abteenihiyya tekkek, Abimalik siinih meqe num yakkay; isin kaadu meqe mara kaah tika. 20Toh akke waytek, Seekem kee Beet-Millol yan maraw, Abimalik tewqe giray habug inta sin cararissay. Siinik tewqe gira kaadu kaa cararissay» iyye. 21Toh inxicca 'yeeh isi abbah baxak meysiteemih sabbatah, Yootam kudeeh Beer deqsitta magaala fan yoowweh elle daffee.
22Abimalik sidiica sanat Israayil marak abbah suge. 23Tohuk lakal Yalli, Abimalik kee Seekem marih fanat tittin way ruubeeh; tohuk gexxaamah kaat makoyteenih. 24Ah akah tekkemii: Abimalik kee Seekem maray kay toobokoh malcina-tabanih qidiyyal kaa agiirisehiyyak, Yalli wohih cane gacsa'gidi. 25Seekem mari, Abimalik biyaakisaana'gidih, sinam qaleelah amol raarisak akah sugan innah ruubeeniih; too mari gitah tokkek gaceh gexinnaan marak duyye radak sugen. Abimalikih toh warsen.
26Too dabaanal, Qebéd-Gaqal akak iyyan num isi tooboko is lih hayya heeh, elle suge baaxook Seekem magaala yemeete. Seekem magaalah mari kaa gee waqdi, kaxxam tu neh xiqele 'yaanamah niya kaal heen. 27Qinab xala cooxih adda gexeeniih, qinab ifiillaay qinab kamri akak bicissa heenik lakal, isinnih elle yaaminen yallah lon duyyeh qibaada elle abaana'gidih bicsen qari gexeeniih, tokkel yokmeeniih, yooqoben. Abimalik baaheemil kaa abaarak kaat yaaben. 28Gaqal iyyeemih, «Nanu Seekem magaalal yan marak, mannah yan marak nanih nan, labhay! Abimalik gubat akah gacnam macaay? Usuk iyyaay, nanu iyya? Gidqoon baxih gubat akah gacnam mannu. Dabul kaa oggolayik, nanu macah kaa oggola? Labhay Abimalik hinnak, isin akak radden sin kaxxa abbah Camor madqa kataata» iyye. 29Qagissa heeh, «Woyyow, a marak foocat tanim yoo akkinnay! Kamba Abimalik bayisak en. ‹Yoo takkeemil eweqay, qaskarak litom baahay, tilliilek qeebih am› kaak axcuk en» iyye.
30A yab yoobbe waqdi, Seekem magaalah abbah yen Dabul kaxxam yinqibeeh, 31sarrak Abimalikiy Aruuma deqsitta'kkel yanihiyyah farmo ruube. Kaak iyyeemih, «Qebéd-Gaqal kee kay tooboko Seekem magaalal taniih; ta mari magaala koo culi haam mafaxa'mmay, 32is kee isi marah barat kuulla inxicay buqreh addat ombooqoray xin. 33Saaku ayro bililiq itta waqdi, ugutta inxicay magaala garciik warar. Gaqal kee kay mara qeebi siinit abta'gidih tamaatu wayta waqdi, nagay tan utkah ken utuk» 'yaanam farmoh kaah ruube.
34Usuk kaak elle inxicca 'ye innal, Abimalik kee kay mara barat kuulla 'yeeniih, Seekem magaalak iroh tani'kkel affara aracal kurrumma 'yeeniih reebu le ikket xiinen. 35Saaku Gaqal kee kay mara magaalah afal soolah yublen waqdi, uqrat edde sugen aracak yewqeenih. 36Too waqdi Gaqal ken yubleeh, Dabuluy magaalah abbah yanihiyyak, iyyeemih, «Dabulow tablee! Qaleh amok sinam obta bas!» iyye.
Dabul kaak iyyemii, «Aleey! Woh sinam hinna; qaleh amoh silaala ikkal» kaak iyye.
37Gaqalaay, «Kee baleey, tamah sinaamak sugele wagitey. Sinaamak garab qalek fan gaca gitak adda-adda yamaatem matablaa! Marak garab kaadu, faal elle qidan garsah xaquk gaceenih yamaateenim matablaa?» kaak iyye.
38Sarrak Dabul kaak iyyeemih, «Hay, taway, kaxxa tirtiray abak sugte manke kok gexxe? ‹Kay gubat akah gacnam macaay› akak axcuk sugtem, tama numu. ‹Tu'mara hinna› akak axcuk sugtem, tama marak; taway gexay koosit» kaak iyye. 39Too waqdi Gaqal Seekem magaalah mara qeebih magaalah addak yeyyeeqeeh; Abimalik marat qeebi abe. 40Gaqal qeebil gaceeh, Abimalik lakak kaa yeyredde. Gaqal marak tu takkem naharsi qeebit muddumteeh; mangom kaadu Seekem magaala edde culan afa fan lakak ken elle yayraddeenimil muddumte. 41Tohuk wadir Abimalik, Aruuma deqsita arac yuduure. Dabul, Gaqal kee kay tooboko wadiriik akah gace waan xiiriyoh Seekem magaalak ken xiiriye.
42Nammeyhaytoh ayro Abimalik, «Seekem mari buqre abaana'gidih gexan» 'yaanam yoobbe. 43Too waqdi isi mara sidiica aracal kurra heeh, buqreh addat ken sasise. Sinaamay magaalak tawqe yuble waqdi, edde sasak sugen aracak qeebih yewqen. 44Abimalik kee kay mara magaalah afa tabbixe'gidih terde waqdi, aki namma'kkel suge mari buqreh addal suge mara selli heeniih; num keenik macabinnon. 45Qeebi inkih tan ayro gexak ase. Sarrak Abimalik magaala yibbixeeh teetil suge mara qideh. Magaala bututtukka heeh sarrak qasboh tan bullaaqe gacissa elle hee.
46Seekem magaalah kaxxa maritteeta a xaagu geen waqdi, Baqalay-Bica-edde-abeenihiyya elle yaqbuden qarih addat reebu le qari amô-qellah culen. 47-48Abimalik a xaagu keenik gee waqdi, Xalmon deqsitta qale fanah isi maray gabat godma lehiyya luk gexe. Tokkel caxak luud yirgiqeeh, too luud sunkul isik hee. Isi marak, «Isissikay tama anu abem aba» keenik iyye. 49Toh keenik iyye waqdi kulli num luud keenik irgiqqa heeh, Abimalik katayen. Too duyyey sunkul baaheenihiyya taaxige mari amô-qellah edde culen aracal tittak bagul heen. Sarrak gira edde ruuben. Tokkeh addat alfi akkuk sugte labha kee agabu inkih edde cararte.
50Tokkek Abimalik Teebex deqsitta magaala fan gexe. Too magaala marot hayya heeh yibbixe. 51Takkay immay too magaalah addal amo-xer-qariy kaxxa reebu lehiyya yen. Labhayti yenek barra tenek baaxoh abbobti tenek amo edde qellisaana'gidih too qari fan kuden. Qari addak isinnit aliffa heeniih, amol bukka 'yen. 52Abimalik woo qariy amo xeerihiyya yabbixe'gidih yemeeteeh; qarik afa gira edde ruuba'gidih xayyoowe waqdi, 53amol sugte barra eceyya dagaak kaal qidde. Too eceyya moyya lafa kaluwwa kaak hayte. 54Too waqdi kay silac abbaxuk suge furraynuh sissikuk secca 'yeeh, «Barra kaa qidde 'yaanamih migaq innit macabak, ama tabbixe seefit yoo qid» kaak iyye. Taaxige furraynii, xagarat kaak seef heeh kaa qide. 55Israayil mari Abimalik rabem yismiten waqdi, yakkeenimiik isinni buxaaxi fanah yuduuren.
56Yalli Abimalik abe umaane tama'nnal kaak gacse. Isi abbah xaylok malcina-taban qideeh; toh Yalli kaak gacseh. 57Seekem marih umaane kaadu keenit macabinnaay; Gidqóon-Yootan, «Amah siinit maraqta» axcuk edde yaabe abaaro keenit maraaqinna.
Currently Selected:
Makaabon 9: NKM
Highlight
Share
ਕਾਪੀ।
Want to have your highlights saved across all your devices? Sign up or sign in