Makaabon 4
4
DEBOORA KEE BARAK
1Eehud deqsita makaabanti rabek wadir, Israayil mari qagteeh YALLIH garil dambi lem baahe. 2Tohuk gexxaamah YALLI, Yaabin deqsita malikiy Kanqaanah yoobokehiyyay Caxor magaala xiinisak yenehiyyak carbil ken gacsiiseeh kay gabat ken yiysibixe. A malikih qaskarih abba, Sisra deqsita numuy Carooset-Goyim deqsitta magaalal guubuh yenehiyyak ten. 3Yaabin sagla-boolih gaariy biriitak bicseenihiyya luk yeneeh; Israayil mara labaatanni sanat racmatta sinni uma xintot abbaxuk yen. Sarrak Israayil-mari YALLAL weeqak catoh kaa kallacen.
4Too saaku Deboora deqsitta barray Laffidot deqsita num abbaxuk yenehiyya nabih teneeh; Israayil marak kaadu makaabantok ten. 5Ta barra qaleela-le-Efrayim-baaxok Raama kee Beetal deqsita aracak fanal ten nakliitâ-caxak gubal daffa 'tah cokmaabak ten. Tonnal too nakliita, Deboorâ-nakliita iyyen. Israayil mari cakki goranah tet fan gexak yen. 6Ayrok teena Abinqám-Barak deqsita numuy Naftaali deqsitta baaxol tan Kedes deqsitta magaalal guubuh yenehiyyah farmo rubte. Farmoh kaak inteemih, «YALLAY Israayil doore Dagelta kinnihiyya amri kol oobiseh kok iyyeemih, ‹Naftaali kee Dablonuk tabna alfi yakke mara baahay Taabor qale fan ken bey. 7Too waqdi Yaabin qaskarih abbah yan Sisra baaheyyooh; usukuuy Kisyon deqsita weeqaytih garil qeebi kot abele. Usuk isi gaariira kee qaskar luk amaatele'mmay, qeebil atu kaak aysetto› 'yaanam YALLI kok iyye» kaak inte.
8Barak ahal teetil gacsemii, «Atu yo'lih gexxek gexeyyooh, atu yo'lih gexe waytek magexa» 'yaanam teetik iyye.
9Too waqdi is kaak inteemih, «Meqeh hay, ko'lih gexeyyo'mmay, anu sin lih gexek, qeebil geynu wayna iisa barrah migaaqah orbele ikkah, ku migaaqah orbe waytam taaxigeemi. YALLI Sisra barrâ-gabat heele» kaak inte. Toh inxicca 'teeh Deboora Kedes fan Barak lih gexxe. 10Barak, Dablon kee Naftaalih yooboke marah Kedes fan seeco abeeh; too waqdi tabna alfih num kaa kataye. Deboora kaadu kaa'lih gexxe.
11Toh tekke saaku, Ceebar deqsita numuy Keena deqsitta kedoh yoobokehiyya, Kedes deqsitta magaalah xaqul yan aracay Xaqnannim deqsitahiyyal toobokeh ten garsah garil isi siraq bahha heeh sooliseh yen. Too num Cobab deqsita numuy Muusak balluh yenehiyyak radde Keena deqsitta kedoh aabakuk yeneeh; takkay immay keenik baxsimma 'yeeh, isi siraq dibuk tani'kkel heeh yen.
12Sisra, Barak Taabor-qale yewqem yoobbe waqdi, 13isi sagla boolih gaariy biriitak bicseeniy faariisat giitak beyaana kee isi marah inkih seece. Carooset-Goyim deqsita aracaak Kisyon-weeqaytu fan ken bee.
14Too waqdi Deboora Barakak inteemih, «YALLI koo miraacisah yanik gex. A saaku YALLI Sisrak qeebil koo aysiisele» kaak inte. Too waqdi Barak, Taabor-qalek tabna alfi takke qaskar luk oobe. 15Barak isi qaskar luk ken yabbixuh yemeete waqdi, YALLI, Sisra kee kay gaariiray biriitak bicseenihiyya kee kay marat badit qide. Too waqdi Sisra isi gaarih amok oobeh ibay ibah yoowwe. 16Barak, gaariira kee qaskar Carooset-Goyim fan ayradduk ken bee. Sisrâ-qaskar takkeemiik tembexeeh; inki num kinni way keenik maraaqinna.
17Sisra, Yaqel deqsitta barray Ceebar deqsita num abbaxuk yenehiyyah siraq fan kude. Ceebar Keena deqsitta kedoh yooboke numuk ten. Woo num woh akah abem, Malik-Yaabin Ceebar-buxah-mara lih meqe qalla luk yeneemih sabbata. 18Yaqel afal kaah matarteeh kaak inteemih, «Yi qammow, amaay yi siraqih addal mameysitinay culey» kaak inte. Too waqdi usuk woo siraqih adda culeeh; isiiy woo siraaqak golik addat kaa tooqore. 19Tohuk lakal, «Ku maganah bakaaritah anik, maqab lee yoh acuy» teetik iyye. Is too waqdi canti-koxxak af fakka hayteeh can kaah tecee. Sarrakaay edde suge aracat kaa gacisse. 20Tohuk lakal usuk teetik iyyeemih, «Siraaqak afal soolaay; ‹Akke num maay yemeete?› kok iyyeenik, ‹Mamattinna› inxic» teetik iyye.
21Sarrak kaxxam cawaleh yeneeh kaxxa xiinit yan waqdi, Yaqel maataka kee siraq edde daabisan birta gabat hayya hayteh, caatih kaa fan amma 'teh, siraq edde daabisan birta moyyak tattabat kaak muddeh; too birti baaxo guffu haam fan dagaak maatakat aatakuk kaa qidde. 22Barak, Sisrâ-goranah yemeete waqdi, Yaqel afah bukku 'teh kaah garayteeh kaak inteemih, «Atu gorrissa num koo aybulleeyyok, annah am» kaak inte. Too waqdi usuk tet lih woo siraq adda culeeh; tokkeh addal Sisray rabeeh baaxol radey moyyat akak siraq edde daabisan birti culah akak yanihiyya kaah suge.
23Too saaku Yalli Israayil-mara Kanqaan-malikih yen Yaabinik yiysiiseh. 24Bisoh kaa gutuqak gutuqak, ellecabol kaa bayseenih.
Currently Selected:
Makaabon 4: NKM
Highlight
Share
ਕਾਪੀ।
Want to have your highlights saved across all your devices? Sign up or sign in