Makaabon 11
11
YEFTAC DEQSITA MAKAABANTU
1-2Yeftacay Gilqad rasul yoobokehiyya, agiruk yan qaskartuk yeneeh; kaak inaay xiiqareh xiinak ten. Kay abbay Gilqad deqsitehiyya isi barrat xale lab-xaylo luk yen. Oson yemben saakuu, Yeftac buxak caylah xiiriyen.
Kaak iyyeenimih, «Atu gersi barrah baxa kinnitoomih sabbatah, ni abbah nagra maculta» kaak iyyen. 3Too waqdi Yeftac isi toobokok kudeeh; dabqih Toob deqsita aracal gace. Tokkel qamallitte kaa tossokooteeh, kay mara yekken.
4Waqlaak wadiril Qammon-mari, Israayil-marat qeebi aba'gidih gexe. 5Tah tekke waqdi, Gilqad baaxol yan makaabon Toob-rakaakayak Yeftac baahaana'gidih gexen. 6Kaak iyyeenimii, «Amay Qammon marat qeebi abna'gidih, atu foocat nek gac» kaak iyyen.
7Yeftac annah keenik iyye: «Kaxxam yoo tinqibeeniih yi abbah buxak dirkih yoo teyyeeqen way, away gadaama sin tibbixeemih yol temeeteenii?» keenik iyye.
8Oson Yeftacak annah iyyen: «Nanu away kol naduureeh; toh akah abnam, ne'lih gexxeh Qammon marat qeebi abna waqdi Gilqad marak inkih nee miraacissam kok fanxaamih sabbata» kaak iyyen.
9Yeftac keenik iyyeemih, «Away qeebih yi baaxo yoo gacisseeniih YALLI a marak nee yiysiise kaa tekkek, anu sin abba akkeyyo» keenik iyye.
10Oson too waqdi ahal kaal gacseenimih, «YALLI ni sumaq yakkay; tahak cinnam mannu» iyyen. 11Tohuk lakal Yeftac Gilqad-makaabon lih gexeeh; too waqdi Gilqad-mari isinni amoyta kee qaskar-abba kaa aben. Yeftac Mixfa deqsita aracal YALLIH garil ama qangara nammeyhaak qagse.
12Tohuk lakal Yeftac Qammon-malik fan farmo ruubeeh iyyeemih, «Ne'lih koo taysammem macaay? Baaxo nek akah buubtam faxxam macaa?» kaak iyye.
13Qammon malik kaal gacseemih, «Israayil-mari Masrik yewqe saaku, Arnon weeqaytuk xabba haanamaay Yabbok weeqaytuh amma 'yaanam kee Ordon weeqaytuh amma 'yaanam takke baaxo yok beeniih; awayah tu gactekiiy, woo baaxo qeebi edde akke'kkalah yoh gacsaanama» iyye.
14Yeftac woo Qammon-malikih yaabal qagseh, gacse yab farmô-marat heeh ruubeeh iyyeemih, 15«Israayil-mari, Mooyab kee Qammon deqsitta baaxok tu mabenna. Tu elle tekkem anna. 16Israayil-mari Masrik gexe saaku, bacarih tan baaxook gacca 'yeenih Agba deqsitta Qasa badih caraatak Kaadis fan yemeeten. 17Tohuk lakal wokkek gaceenih gexoonuh ruksat keenih yecee'gid Edom malikil farmô-mara ruuben. Edom malikiiy ruksat keenil cineh. Qagteenih kaadu Mooyab malikil ruksat esseren. Takkay immay keenik num ruksat keenil cineh. Tonna-leemiik Israayil-mari Kaadis deqsita aracal elle yeede. 18Sarrak woo bacarih tan baaxook gacca 'yeenih, Edom kee Mooyab baaxok deraafit makitak, Mooyabak ayrô-mawqa le kabut raaqa rakaakay gufen. Woo arac Arnon weeqaytuk gersi qaxat raaqa araca. Tokkel elle yinfiddigeeni'kkal, Arnoonuk bisoh matatrinnon. Woh akah abeenim, wohuk biso Mooyab marih cuduuduk ten. 19Tohuk lakal Israayil mari, Sicon deqsita Amoorâ-malikiy Cesbon magaalal yeneh farmo ruubeeniih kaak iyyeenimih, ‹Ku baaxok gacca inneh ninni baaxo genxam fanxak, ruksat neh maay tecee?› kaak iyyen. 20Takkay immay Sicon gexe ken kaleh. Qaskarak elli haam inkih gaabossa heeh, Yahax deqsita aracal gacca 'yeh, tokkeek qeebi keenit abe. 21YALLAY Israayil doore Dagelta kinnihiyya Israayil mara Sicon kee Sicon qaskarak qeebil yiysiiseh. Too waqdi Israayil mari, Amoorâ-maray wokkel sugehiyyak baaxo inkih bukkuseenih. 22Oson Amoorâ-mari luk suge baaxok, Arnon weeqaytuk xabba haanamaay Yabbok weeqaytuh amma 'yaanam kee, tonnah kaadu, woo bacarih tan baaxok xabba haanamaay Ordon weeqaytuh amma 'yaanam takke baaxo keenik yibbixen. 23Tonnal YALLAY Israayil doore Dagelta kinnihiyya isi mara catak, Amoorâ-mara wokkek yeyyeeqeh, ken baaxo isi marih im abe. Hay, ta baaxo gacissaanam faxxaana'nnaa? 24Isin yallah liton Kamos siinih yeceemil elle isbira. Nanu kaadu YALLAY ni Dagelta kinnihiyya neh yecee baaxol dabaaqah sugenno. 25Mooyab malikih yen Baalakay abba akak Xiffor deqsitak yenehiyyak taysem isik maay takkale? Too malik way Israayil marih qeebih gexe saaku luk masuginna. 26Israayil mari sidiica boolih sanatah Cesbon kee Qarooqer deqsitta magaalooli kee, woo aroocah dariifal tan mandarwa yibbixeenih sugeeniih; kalah kaadu Arnon weeqaytih dariifal sugga 'te magaalooli yibbixeenih yeneenik, hay, a gideey a gideh woo baaxooxa macah gacse wayten? 27Anu qellat lem siinil mabaahinniyo'mmay, isin taway qeebi yot abtaanaah qellat lem yol bahtaanam faxxan. YALLI qadli le Dageltaay; a saaku Israayil-mara kee Qammon-marak gitat ane waa mara aybulleele» 'yaanam farmoh kaah ruube. 28Takkay immay Qammon-malik Yeftac ruube farmot maqal mahaysitinna.
29Tohuk lakal YALLIH *Roocaaniyya Yeftacal obteeh; too waqdi usuk Gilqad kee Manassê rasu fan gexam gexeeh, sarrak Mixfa deqsitta magaalay Gilqad rasul geytintahiyyah uduurra 'yeh Qammon-marih baaxo fan bisoh gexe. 30-31Woo waqdi Yeftac YALLAH nadri culeh iyyemii, «Qammon-marak qeebil yoo tiysiisek, iisa luk inni buxah aduuru waa saaku, yi buxal yot matra'gidih qarik naharat awqinnaan im ku migaaqal sadgatah qideyyo» iyye.
32Yeftac Qammon-marat qeebi aba'gidih gexeeh; YALLI woo qeebil iisa kaah yecee. 33Qarooqerik xabba haanamaay Aabil-Karaamimih amma 'yaanam fan, Minnit deqsita rakaakayih dariifal enna 'ta baaxooxa kee, wohiital tan labaatanni magaala fan, aagaruk ken baahe. Tokkel Israayil-mari bakka ken heeh keenik yeyse.
YEFTAC-BAXÁ
34Yeftac, Mixfal ten isi buxah yuduure saaku, kay baxá karambo aagarukuuy argaduk kaah garayte. Is usuk dibuk le baxák ten. Teetik sa xaylo maxalinna. 35Usuk tet yuble waqdi baguuk teetih qaadeeh sara isik qanxiseh iyyeemih, «Yi baxáy, afqado yok dananisseeh niya yok tiggilek ah macaa? YALLAH cule nadri liyooh too nadri mamaka» iyye.
36Too waqdi is annah kaak inte. «YALLAH nadri akah culteemiy teetik abeyyo intehiyya tellekii, yok ab ikkal mabagbaggoowin; YALLI Qammon-maray naqboytiitih kok yanik, cane koh gacsehik» kaak inte. 37Kaadu qagisseh kaak inteemih, «Yoh abtaamahaa: namma alsih gide waktik yoh ucuy. Fiqma lih qaleelat meekitak bikrit anih rabu waamih rookah rookita'gidih, toh yoh ab» kaak inte.
38Usuk too waqdi, «Gex hay, yi baxáy» teetik iyye. Tohuk lakal tet kee tet fiqma woo qaleela tewqeeh wokkel rookiteenih. Woo rooka akah abeenim, is digibe'kalaay xale'kal rabelem yeexegeenimih sabbata. 39-40Namma alsak lakal isi abbal tuduureeh, too waqdi usuk Yallah nadri akah culem abeh. Tonna-leemiik is bikirit tan baxuwwah anih rabte.
Israayil marih qaadal, kulli sanatal affara ayro, qunxa baxuw Yeftac-baxáh rookah buxak bacakku gexxa 'yaanah rookitan. Too qaada akak raqtem tokke.
Currently Selected:
Makaabon 11: NKM
Highlight
Share
ਕਾਪੀ।
Want to have your highlights saved across all your devices? Sign up or sign in