Habakuki 3
3
Lilombo lya Habakuki
1Awu wo wulombe wo muwizi Habakuki,
2Gwe Muwaha Mulungu,
ane hulika zono wetuma,
nane nhuga woga wuwaha.
Ale, alu'kanyhi mu vilo vyetu,
witumaje metumo mawaha gono wagetuma lulo.
Na lono wuli mwi'kuwo lyako,
ninga weze no lusungu.
3Mulungu yakuza kanyhi ku wulawa Edomu,
Mulungu mono yelile yakuza
ku wulawa ku matunda ge Palani.
Lukumyo lwakwe lugubice wulanga,
ne yisi yamemile lukumyo lwakwe.
4Kazaga hamonga no wuzelu we limuli,
no wuzelu wubulilaga
ku wulawa mu muwoko wakwe,
baho ho vihundikwe vilungo vyakwe.
5Mwene kalongozaga wutamwa
ku mwande yakwe,
kanyhi kalilajilizaga lifwa lize mu nyuma yayo.
6Hono yakwima,
yisi yikusinjisika,
na mu wulanje wakwe,
makungugo gakucicima.
Ne matunda ge cibitilila gakubeneka.
Ne vigongo vye cibitilila vikudodomela hasi,
vigongo vyono mwene yakolaga mu vilo vye katali.
7Ane nghawona wanhu wa Kushani wali
mu magayo ne wanhu wa Midiyani wakucicima.
8Alo Muwaha Mulungu kwali
ko gali makolongo gono gakaleka agwe wukolwe 'kuwo?
Hamba kwali ko lili lilenga
lyono likukozize agwe likuwo?
Agwe wajendelaga mucanyha ye mavunde,
mavunde gali yo mituka yako yo wulugu,
lono wawaletela wanhu wako wusume.
9Ale wiwikanize wuwitumamile wupinde wako,
ho wuwe wiwikanize
ku wugumila zisonga zako.
Ne mamuli gako gakuyidemula yisi.
10Ne matunda nago,
kolo gakukuwona, gakucicima,
ne malenga nago,
gakumwajika ku wulawa ku wulanga,
ne malenga gono gali hasi ye'si,
gakukoloma hawaha.
11Na mu wung'alale
wo wugumile we zisonga zako,
no wung'alale wo wuzelu we migoha yako,
lizuwa no mwezi vyene
vyo vimile du ha wikalo wavyo.
12Na mwi'kuwo lyako wukakola mu yisi,
na mu wukali wako,
wukawapondanjiza makungugo.
13Wukabita kuwaponya wanhu wako,
no kumuponya mutemi wako
mono wamuhagula.
Wukawagwisa hasi walongola we wabi,
wukawapondanjiza i watyatyi wakwe.
14Ne zisonga zako,
zikamuguma musilikale mulongola
we wasilikale wakwe wo wulugu,
lono wakuza nhe 'wingo yiwaha
ho waciyagaze 'se,
wakucisimanga nhe wanhu
wono wakuwewonela
i waciwa mu nzila ye cinyele.
15Walikanyanjiza lilenga ne zifwalasi zako,
sunga ne malenga gakatumba.
16Nane nghuzihulika zizi zose,
kuno nghucicima,
no mulomo wangu wuleceye wukucicima so woga.
No muwili wangu wose wanyong'onyela,
sunga ne magulu gangu nhondo,
gakucicima lono nimile.
Ninga ne, nolindila du nhulile,
sunga lizuwa lize
lyono Mulungu kolowalipiciza wose
wono wakuwa kucihoma.
17Ninga hamba mikuyu yilece kubonhola maluwa,
ne zizabibu yilece kulela zabibu,
hamba mizeyituni nayo yiwe si yikujela, zeyituni,
nayo migunda yiwe si yikulavya wuhemba,
hamba ne zingholo nazo ziwe zose zafwiza,
ne mabululu ge zimitugo geza gali bwete.
18Ane nosangalala no kusecelela
vyono Muwaha Mulungu yo muponyi wangu.
19U Muwaha Mulungu yo kamhelaga 'ne vilungo.
Kayinozaga migulu yangu yiwa nhe migulu ye nzela,
kanyhi kamhelaga vilungo
vyo kukolela mu canyha ye matunda.
Currently Selected:
Habakuki 3: LLKWW
Highlight
Share
ਕਾਪੀ।
Want to have your highlights saved across all your devices? Sign up or sign in
Cigogo Bible © Bible Society of Tanzania, 2002.