San Marcos 6
6
Jesús lachhie'e yechhi Nazaret
(Mt 13.53-58; Lc 4.16-30)
1Jesús beyiaje lo yechhi kie', te ka bene lachhile'anke le' zeajke le'an le'. 2Kati bchhin dza sabdo, gzolhoe rse'adiene ka bene lo yo'o ga' rhedobike. Te tixeke bze'anagake ka' rse'adie Jesús, te rhe'akiekene banachhi na rnabe leza'ake:
—¿Noga bye'adie bene ni yogote'a ten? ¿Noga gleaje yelasinha ni, kan milagre rhonhe? 3¿Alaga' bene ni rchie yaga, xhi'in María kan nake bichi Santiago, José, Judas kan Simón? ¿Le'aksikan alaga' ni' zoa ka nigolha zanhe, le'an rho'o?
Na labi rxenlachhike le'. 4Te Jesús gochhie le'ake:
—Gatite'azi rhonke xhen to bene rtzalaje laza Diozo, te lo yechhi kie' bigslano, ni dia'adza kie' ni bene zoake lo yo'o kie'.
5Na' bigslabi milagre be'anhe na', toga tan gdanhe balaka bene rhaka xhwe'ake te beyakake. 6Na gokiene banachhi le'a ka bene na labi rheajkene kie'.
Jesús gsele bene tzachhino lachhile'anke le' zajtixaje'eke xhtidze
(Mt 10.5-15; Lc 9.1-6)
Jesús glachhie ga' diaka yechhi zingo ga'ago rse'adiene ka bene.
7Bledze bene tzachhino lachhile'anke le', na gzolhoe rsele le'ake chopa weajke, bde'e kie'ake yelarne'abe'a kinda yebeajke ka be'e malha. 8Le' gochhie le'ake bigsla bigoa'alhe ki lhaneza, toga xaga. Labi rhala goa'alhe ta gagolhe ni yexaj ni domi. 9Waka ko'olhe xelhalhe, te labi goa'alhe xhalhe yakolhe. 10Gochhie le'ake:
—Kati lén tzo'olhe lo to yo'o, leyega'an nazi kati yezate'arhele lataj na. 11Na chen to yechhi labi rhe'ankene gle'abike lén nika rhe'ankene gze'anagake kie'alhe, leyerhoaj na' te lekuibi bixhte chhia lalaba xelhalhe, kinda ye'akiebekene taxhinaj xhen be'anke.
12Na'arhe bene lachhile'anke le' guiajke yajechhike ka bene yeyakake ki Diozo. 13Le'aksikan bebeajke tixe taxiwe, kan beyonke tixe ka bene rhaka xhwe'ake rgo'oke le'ake zaa.
Yelagoti ki Juan el Bautista
(Mt 14.1-12; Lc 9.7-9)
14Herodes bene gne'abe yechhi nababaka Galilea benhene rtzalajke ki Jesús, le'a tan rtzalajke kie' gakalha yechhi. Le'a balake rne'ake: Juan el Bautista beyasabebanhe, te tanka nape balorhe ni te rhonhe milagre.
15Yebalake rne'ake: Nake bene btzalaje laza Diozo grelawe Elías.
Na yebalake rne'ake: Nake to bene btzalaje laza Diozo, ka' bene gde tina'ate.
16Nan benhe Herodes ten, na gne':
—Juan bene na. Ne'adia gsela ka bene zajchogoke ye'anhe te nan beyasabebanhe.
17Le'a, xhtola Herodías, Herodes gsele ka bene te zajxenke Juan, kan gochhie le'ake go'ogake le' gaden lo lichhiguia. Herodías nigolha ki Filipo, bichi Herodes, te Herodes btzagane' le'an nigolha ni. 18Juan gochhie Herodes: Labi rhala yezi'ilho nigolha ki bene bichilho.
19Tanka Herodías ble'ene zi' Juan, na go'onhene gotie le'; le'an labi gxhe'akiene, 20Le'a Herodes rdzebe Juan, le'a nezene tan nake to bene rhon tali, kan nake bene wen te ryoe ka' no bigonhe le'. Zakalha nan rhenhenhe ka' rtzalaj Juan kon rhega'anhe chhizirha, Herodes rdanhene gze'anague ka' rtzalaj Juan. 21Te Herodías ble'ene gzoa laze kati Herodes, guiene yiza, bde' ta gagoka bene yajlo dele'anhe le'an xanka bene rheajke lo dila kan bene za'aka dzake Galilea. 22Bin nigolha nakabi xhi'in Herodías guio'obi lo lataj ga' rhaka lani te byabi, na Herodes le'an ka bene rhe'eke rhagoke xhtze'e le'an le' yajxenkeguezene weya' na, te Herodes bene rne'abe gochhie bin nigolha na:
—Gnaba bitite'azi rhe'anlo, te gona.
23Na bkie'abe bala niaa gde bitite'azi snababi, za'akalha gde' gatzaj yechhi ga' rne'abe. 24Le'abi broajbi, na gnabebi xhnabi:
—¿Nobi snaba kie'?
Na xhnabi gochhie le'abi:
—Gnaba yikiaj Juan el Bautista.
25Bin nigolha na rheyobebi beyo'obi ga' rhe bene rne'abe, na gochhibi le':
—Nantekalaka rhe'anda gonalo yikiaj Juan el Bautista xhoa lo to yen.
26Bene rne'abe gzoa ye'achigaze; na tan chi bkie'abe lo ka bene noledze lo lani na', te labi goka sne' labi gde tan rnababi. 27Na kan gsele to bene rheaje lo dila te gochhie le' zajxie yikiaj Juan. Bene rheaje lo dila guiaje lo lichhiguia, te gchogüe ye'an Juan 28na bochhie lo to yen te beyoe. Bde' ki bin nigolha na, te le'abi beyoebi xhnabi.
29Kati bene noke Juan gnisiekene, bezike kuerpo kie' na yajkachike.
Jesús bgawe bene zengolha
(Mt 14.13-21; Lc 9.10-17; Jn 6.1-14)
30De ten, bene lachhile'anke le' bedobike le'an Jesús te gdixaje'ekene le' yogote'a tan be'anke kan bse'adiekene. 31Jesús gochhie le'ake:
—Leda', dialhe tzeajrha rho'ozi yezilachhirha tochi'i lo to lataj ga' rhe chhizi.
Le'a bene zen zeaj zeza'ake ga' ze'a Jesús, nika rhala gagoke yeta. 32Te kan Jesús kan bene lachhile'anke le' bebe'anke lo to barko na zeyiajke lo to lataj ga' binodza'a. 33Na bene zen ble'ekene ga' zeajke, te beyonbe'ake le'ake; na'arhe ka bene zake tixe yechhi guiajke, te bchhinke zia'alha ka' le'ake. 34Nan beye'azi Jesús lo barko, ble'ene dzaka bene zen, na beye'achilachhie le'ake, le'a dzake ka bekoxhilha bino zoa guio le'akaba; te gzolhoe rse'adiene le'ake bikaka. 35Nan xhoelha, bene lachhile'anke le' guiajke ga' zee te gochhike le':
—Chi rchola, na lataj ga' ze'arha ni bigslano dza'ateka. 36Gochhi ka bene ni yiajke, kinda tzeajke zajeoke ta gagoke lo laye'alha kan yechhi zingo dia gagozi ni.
37Te Jesús gochhie le'ake:
—Legde lén ta gagoke.
Le'ake bochhike:
—¿Arhe'anlo tzeajto te zajeoto yetaxhtilha non ta rhaxhajke non chopa gayoa dza, kinda gderha ta gagoke?
38Jesús gochhie le'ake:
—¿Nobala yetaxhtilha napalhe? Ledzajyokalhe.
Kati byoke, gochhike le':
—Gayo yetaxhtilha ye chopa bela.
39Na'arhe gochhie le'ake ye'ake bene koeke troa'a weajke lo guixi ya'a; 40Te gre'eke to kue' weajke balake de togayoa yebalake de chiyon weajke. 41Dena'a Jesús gxhie' gayo yetaxhtilha le'an ye chopa bela, te byoe' yeba', te be'an la'aye, te bxhoxhaje yetaxhtilha na bde' ki bene lachhile'anke le' kinda kisike kika bene. Le'aksikan gdisike chopa bela ki yogokate'. 42Yogoke gdagoke nonga belhajkene; 43botobike yetaxhtilha kan bela bega'an, te goka tzachhino ga'a. 44Ka bene gdagoke yetaxhtilha nakake gayo milhe bene.
Jesús lachhie lawe nisa
(Mt 14.22-27; Jn 6.16-21)
45De ten, Jesús gochhie bene lachhile'anke le' te yebe'anke lo barko kinda snerhoke slagake nisado', galha rhega'an yechhi Betsaida, tzalaka le' rhesele ka bene. 46Te kati beyochhi tan rhesele ka bene, guiaje lo guia' zajledze Diozo. 47Kati gchola, barko na chi zeajba gatzaj lawe lo nisado' na. Jesús, bega'anhe toze rhoa nisa na, 48ble'ene le'ake labi rhaka gsake barko na, le'a tan rheaj be'e na galha za barko na te rhochhiga le'aba xhkodzalha. Bayento', Jesús guiaje ga' ze'ake gze lawe nisa, te be'anhe ka' ta te' lawe. 49Kati ble'ekene le' lachhie lawe nisa, gokiekene bxin, te grechhiya'ake; 50le'a yogokate' ble'ekene le' te bdzebike. Na le' bledze le'ake, te rhe le'ake:
—¡Balansle! ¡Ne'adia na: bisdzebilhe!
51Bebe'anhe lo barko, na bsan birhe guiekiaj be'e; te le'ake gokiekene banachhi, 52le'a labi guiajniekene milagre be'anhe le'an yetaxhtilha, le'a nachola yikiajloke.
Jesús rheyonhe ka bene rhaka xhwe'ake lo yechhi Genesaret
(Mt 14.34-36)
53Glagake nisado' te bchhinke lo yechhi rhelawe Genesaret, na be'agake barko na rhoa nisa. 54Konka beye'azike lo barko, ka bene yechhi na beyonbe'ake Jesús. 55Te benke bene yechhi nababake Genesaret, na gzolhoke noake lo blaga ka bene rhaka xhwe'ake te rhajoake le'ake konga rhenkene rson ze'a Jesús. 56Na gatite'azi rheaje, chen yechhi zingo, yechhi xhen o laye'alha, rhajoake ka bene rhaka xhwe'ake layechhi na rhatayoke le' kinda ye'anhene ka'anke zale'atizi rhoa xhe'e; te yogoka bene rganke xhe'e, rheyakake.
Currently Selected:
San Marcos 6: XDZPY
Highlight
Share
ਕਾਪੀ।
Want to have your highlights saved across all your devices? Sign up or sign in
Porciones en Zapoteco de Yalahui, Oaxaca, México © Sociedad Bíblica de México, A.C.