MATIUS 27
27
Ruma Isa wa'a aka Pilatus
(Mrk. 15:1, Luk. 23:1-2, Yah. 18:28-32)
1Aimasid̄i-sid̄i poda, sara'ana dou-dou mana'ekai imam ro mana'ekaina Yahudi kasab̄ua menana nggahi d̄i hadekaina Ruma Isa. 2Siad̄oho ndantena Ruma Isa, ro wa'ana Sia, edempara d̄onggona Sia d̄i Pilatus, gubernu pamarenta Roma.
Madena la Yudas Iskariot
(Kis. 1:18-19)
3 #
Kis. 1:18-19
Wakatu la Yudas mad̄onggona d̄i dou-dou ma musu Ruma Isa ede edana b̄a one Ruma Isa wa'ura b̄ab̄u kai hukuma, sia sinci adena. Edempara kambali b̄a sia tolu mpuru piti salaka ede d̄i dou-dou mana'ekai imam ro dou-dou mana'ekai Yahudi. 4Nggahi sia, ”Mada kawa'ura dosa ka'ihaku dou ma wati wara ncarana, sampe dou ede d̄ib̄ab̄ukai hukuma made.
Pala cambe b̄a doud̄oho ede, ”Au b̄ade nami? Ede urusa nggomi!”
5Wura paki b̄a la Yudas piti ede ade Bait Allah, edempara sia lao pesona weki.
6Dou-dou mana'ekai imam kilina piti ede ro nggahina, ”Piti ake piti ra'a. Nggahi hukum agama, piti ake wati loa d̄i kalu'u d̄i ade hid̄i d̄onggo ra mbei kai d̄i Bait Allah.” 7Edempara sawa'u b̄a siad̄oho mafakana, siad̄oho kanina piti ede d̄i ru'u welikai dana d̄i pehe b̄a dou Dana Dou Mataki Ngod̄u Roa. Dana ede d̄ikani ru'u rade dou-dou lai rasa. 8B̄ara ndedena sampe ainaina ake dana ede tangarakai ”Dana Ra'a”.
9 #
Za. 11:12-13
Kai ndedena, ndad̄ira au ranggahi b̄a Nabi Yeremia, eded̄u, ”Siad̄oho tarimana tolumpuru piti salaka, eded̄u co'i rasamakai b̄a bangsa Israel d̄icolakai ru'u Sia. 10Ro piti ede kani b̄a siad̄oho d̄i ru'u welikai Dana Dou Mataki Ngod̄u Roa, b̄une raparentakai b̄a Ruma d̄i nahu.”
Pilatus paresana parakara Ruma Isa
(Mrk. 15:2-5, Luk. 23:3-5, Yah. 18:33-38)
11Wakatu Ruma Isa satandona Pilatus, gubernu dana ra rasa ede, sod̄i b̄a Pilatus, ”Sab̄ua Nggomi sangaji dou Yahudi?”
”Ndede nggahi b̄a ndaimu,” cambe b̄a Ruma Isa. 12Pala wakatu dou-dou mana'ekai imam ro dou-dou mana'ekai Yahudi mbotoku b̄ab̄u ra lo'o d̄i ru'u b̄a Ruma Isa, Sia wati kone cambena.
13B̄ara ndedena nggahi Pilatus d̄i Sia, ”Sab̄ua wati ringa b̄a Nggomi samenana b̄ab̄u ra lo'o b̄a siad̄oho d̄i Nggomi ede?”
14Pala Ruma Isa wati cambena kone sampu'u ndad̄ina gubernu ede nawancuku mbora akana.
Ruma Isa b̄ab̄u kai hukuma made
(Mrk. 15:6-15, Luk. 23:13-25, Yah. 18:39–19:16)
15D̄i saniki Aruraja Paskah, ranginakai b̄a gubernu nahoriku sab̄ua dou bui kai b̄era kad̄ale b̄a dou mamboto. 16Wakatu ede wara sab̄ua dou bui ma wancuku mbou ngarana la Yesus Barabas. 17Ndad̄i, wakatu wa'ura kab̄oro weki dou mamboto, Pilatus sod̄ina d̄i doud̄oho ede, ”Couku d̄i ne'e b̄a nggomid̄oho d̄i hori wea b̄a nahu d̄i ru'u b̄a nggomid̄oho? Sab̄ua Yesus Barabas atao Isa pehekai Al Masih?” 18Nggahi ndedekai Pilatus b̄ara sia nab̄adeku, dou-dou mana'ekai Yahudi wa'ana Ruma Isa d̄i sia, b̄ara siad̄oho hiana adena.
19Wakatu Pilatus wunga dohona d̄i kanto pangadila, nggadu b̄a weina nggahi ndake d̄i sia, ”Ita aina lu'ukaimu parakara dou ma wati wara ncara ede, b̄ara Dou ede, mada nifiku ma samangikai ade d̄i ainaina ake.” 20Pala dou-dou mana'ekai imam ro dou-dou mana'ekai Yahudi nasad̄u'u ncauku dou mamboto ede d̄imaraho d̄i Pilatus loakud̄u Barabas d̄i hori ro Ruma Isa d̄i hukum made. 21Edempara gubernu ede sod̄i walina d̄i siad̄oho, ”Ade weki dou d̄uana ede, couku d̄i ne'e b̄a nggomid̄oho d̄i hori wea b̄a nahu?”
”La Barabas,” cambe b̄a siad̄oho.
22”Nggara ndedesi, auku d̄ikarawi b̄a nahu d̄i Isa d̄i pehekai Al Masih?” sod̄i b̄a Pilatus d̄i siad̄oho.
”Salibpu Sia!” cambe b̄a siad̄oho sara'ana.
23”Pala auku rawina mancara?” sod̄i b̄a Pilatus.
Edempara nanaha na'e kanggica siad̄oho, ”Salibpu Sia!”
24 #
Ul. 21:6-9
Cumpukaina Pilatus kawarana weki b̄a one sia wati loana karawi au-au wali ro dou-dou ede kombi d̄imabaronta. Ndad̄ina sia wehana oi, edempara d̄itando dou mamboto ede sia wacana rimana ro nggahina, ”Nahu wati su'u ra tunduku madena dou ake! Ede rawi ndai nggomid̄oho!”
25Sara'a dou mamboto ede cambena, ”Io, co'opu madad̄oho ro ana-ana madad̄oho matangguna hukuma b̄a made Dou ake!”
26Edempara hori b̄a Pilatus la Barabas d̄i ru'u siad̄oho, ro kauna dou d̄imacambo Ruma Isa, ro d̄onggona Ruma Isa ru'u d̄isalib.
Tentara-tentara masungge-sungge Ruma Isa
(Mrk. 15:16-20, Yah. 19:2-3)
27Edempara tentara-tentara Pilatus wa'a kalu'una Ruma Isa d̄i ade asi gubernu, ro sara'a tentara kab̄oro weki hekona Ruma Isa. 28Runcu b̄a siad̄oho kani ra lombo Ruma Isa, ro kakanikaina Ruma Isa jumba keta. 29Ndawi b̄a siad̄oho sab̄ua songko sangaji kai sanga-sanga haju mpida mantau rui, ro kakanikaina ese tuta Ruma Isa. Edempara tau b̄a siad̄oho tiki d̄i rima wana-Na, sawa'u b̄a ede doho nembana d̄itandona ro kasungge-sunggena Sia, ”Io sangaji Dou Yahudi!” nggahi siad̄oho. 30Katufe b̄a siad̄oho Sia, ro wehana tiki ede, edempara b̄oe weana tuta-Na. 31Sawa'u b̄a kasungge-sunggena Sia, runcu b̄a siad̄oho jumba keta ede edempara kakani mbalikaina kani ra lombo ndai-Na. Edempara wa'a kalosara Sia d̄i lao salib.
Ruma Isa d̄isalib
(Mrk. 15:21-32, Luk. 23:26-43, Yah. 19:17-27)
32D̄iwoha ncai, siad̄oho eda angina lab̄o la Simon dou Kirene. Pakasa b̄a siad̄oho dou ede d̄imatundu salib Ruma Isa. 33Edempara siad̄oho ronggana d̄i sab̄ua hid̄i ngarana Golgota, aona ”Hid̄i rangka”. 34#Mzm. 69:22 Ta ede mbei b̄a siad̄oho Ruma Isa nono anggo ma campo lab̄o folu. Pala sawa'u b̄a tab̄ai b̄a Ruma Isa anggo ede, Sia wati ne'ena nono.
35 #
Mzm. 22:19
Edempara siad̄oho salibna Sia, ro cengga-cenggana kani ra lombo-Na kai ra'undi. 36Sawa'u b̄a ede siad̄oho doho tongguna Sia ta aka. 37Ta ese mai b̄a tuta-Na wi'ikai b̄a siad̄oho tunti mab̄oha b̄ab̄u ra lo'okai Sia, eded̄u: ”Akeku Isa Sangaji Dou Yahudi”. 38Sama-sama lab̄o Ruma Isa salib rau b̄a siad̄oho d̄ua dou maparampo; sab̄ua dou tawela wana-Na, sab̄ua dou tawela ku'i-Na.
39 #
Mzm. 22:8, 109:25 Dou-dou ma lampa sai ta ede nawiri-wiriku tutana, ro kasungge-sunggena Ruma Isa. 40#Mat. 26:61, Yah. 2:19 Nggahi siad̄oho, ”Nggomi ma ne'e d̄umba Bait Allah, ro matu'u mbalina ade tolu nai! Nggara Nggomi Ana Ruma Hatalla; londo rad̄i salib ede, ro kasalamara weki ndai-Mu!”
41Ndede rau dou-dou mana'ekai imam ro guru-guru agama ro dou-dou mana'ekai Yahudi kasungge-sunggena Ruma Isa. Nggahi siad̄oho, 42”Sia kasalamana dou makalai, palasi wati loana kasalama weki ndai-Na! Nggara Sia sangaji Israel, tahompara ake Sia londona rad̄i salib ede, ede ampo ne'e imbi b̄a nami d̄i Sia. 43#Mzm. 22:9 Sia na'imbi d̄i Ruma Hatalla, ro nanggahi b̄a one Sia Ana Ruma Hatalla. Mai tatioku b̄a ndaita sab̄ua Ruma Hatalla nane'e kasalama Sia ake.”
44Dou-dou maparampo rasalib sama-sama lab̄o Sia nakasungge-sungge rauku b̄une ede.
Madena Ruma Isa
(Mrk. 15:33-41, Luk. 23:44-49, Yah. 19:28-30)
45Wakatu aimarai, tolu jam ntoina sara'a rasa ra dana ede ndad̄i rindi. 46#Mzm. 22:2 B̄oe tolu aimambia, Ruma Isa kanggicana kai eli mana'e, ”Eli, Eli lama sabakhtani?” ede aona, ”Io Ruma Hatalla-Ku, io Ruma Hatalla-Ku, b̄ab̄auku Ita d̄i tu'u wi'ikaimu Mada?”
47Pila-pila dou mawara ta ede maringa kanggica ede, manggahi, ”Sia na'ouku la Elia!” 48#Mzm. 69:22 Sab̄ua dou ade weki siad̄oho rociku lao wehana wunta taka, ro d̄etana d̄i ade anggo mangonco. Edempara cakina d̄i sumpu haju satako, ro d̄aina d̄i wiwi Ruma Isa.
49Pala dou-dou makalai manggahi, ”Ngena, tatioku b̄a ndai sab̄ua la Elia ma mai kasalama Sia!”
50Edempara Ruma Isa kanggica walina kai eli mana'e, edempara hintina nawa cumpukaina.
51 #
Kel. 26:31-33
Satampa ratero d̄i ade Bait Allah ncipa d̄ua tampu'u ta ese malalo awa. Nakangginda dana ro doro-doro wadu nambi'a. 52Rade-radena hengga weki, ro mboto ela Ruma Hatalla ma rawa'u made rakamori mbali. 53Siad̄oho losana d̄i ade rade sawa'u b̄a mori mbali Ruma Isa rad̄i madena, ro siad̄oho lu'una aka Yerusalem. Ro ta aka mboto dou ma'eda siad̄oho.
54Mana'ekaina tentara sama-sama lab̄o tentara-tentara ma wunga tonggu Ruma Isa ndad̄i na'ipiku dahuna b̄a edana epu mana'e, ro samenana ma ndad̄i ede. Nggahi siad̄oho, ”Poda, Sia ake Ana Ruma Hatalla!”
55 #
Luk. 8:2-3
Ta ede mboto rau dou siwe ma wunga ntanda sando'o. Siad̄oho eded̄u ma wa'ura b̄atu Ruma Isa d̄imabantu Sia ratampu'u aka Galilea. 56D̄i ade wekina ede eded̄u la Maria Magdalena, la Maria ina la Yakub ro Yusuf, ro ina ana-ana la Zebedeus.
Umbukai Ruma Isa
(Mrk. 15:42-47, Luk. 23:50-56, Yah. 19:38-42)
57Aimangad̄i ede mai sab̄ua dou Arimatea mantau ra wara, ngarana la Yusuf. Sia ede rau anamori Ruma Isa. 58Sia laona aka Pilatus, narahoku timba Ruma Isa. Edempara parenta b̄a Pilatus loakud̄u timba Ruma Isa mbei d̄i dou maraho ede. 59Edempara weha b̄a la Yusuf timba Ruma Isa ede, sawa'u b̄a ede pontekaina salolo kaena linen ma b̄ou. 60Edempara sia lao karuna timba Ruma Isa ede d̄i ade rade ntau ndaina ra ndawi d̄i ade sab̄ua doro to'i wadu. Sawa'u b̄a ede sia kiruna sab̄ua wadu na'e d̄i b̄ontokai tad̄a ncai rade ede, edempara sia laona. 61La Maria Magdalena ro la Maria ma kalai nangge'empa doho satandona rada ede.
Dou-dou majaga d̄i rade
62B̄ala ai sanai, d̄i ainaina Sabat, dou-dou mana'ekai imam ro dou-dou Farisi lao sama-samana satandona Pilatus 63#Mat. 16:21, 17:23, 20:19, Mrk. 8:31, 9:31, 10:33-34, Luk. 9:22, 18:31-33 ro nggahina, ”Ruma, kawara b̄a madad̄oho wakatu aipu morina dou matipu ede, Sia parana nggahi-Na, ’sawa'u b̄a tolu nai Nahu d̄imamori mbali.’ 64B̄ara ndedena, takau to'ipu dou jaga kataho rade ede sampe tolu naikaina, b̄aib̄a dampanga b̄a anamorid̄oho-Na timba-Na ede, edempara nanggahiku d̄i dou-dou b̄a one Sia nawa'ura mori mbali rad̄i madena. Ro tipu ma cumpukai ake nawancuku ihana ntewi kaisi ma sarambana.”
65”Nggomid̄oho mantau tentara majaga,” nggahi Pilatus d̄i siad̄oho, ”Laora jaga katahopu rade ede.” 66Edempara lao siad̄oho aka rade, kab̄u hade b̄a siad̄oho wadu mab̄onto rade ro wi'ina dou majaga d̄itando rade, loakud̄u wati wara ma hako rade ede.
Currently Selected:
MATIUS 27: LAIBHP
Highlight
Share
ਕਾਪੀ।
Want to have your highlights saved across all your devices? Sign up or sign in
@LAI 2001