2 Ŋikor. 9
9
Akiŋarakin Ŋikristo ŋuluce
1Ecaryono ayoŋ akigirakin iyes abaruwa ŋina etapit ŋainakineta ŋuna iyakiyanaryo lotuŋa ŋulu ka Akuj alo Yudeya. 2Ayeni ayoŋ atemar itenito iyes akiŋarakin ka eketuror ayoŋ iyes alotuŋa a ŋulu a Makedonia. Abala ayoŋ ebe, “Ageun alokaru a ŋolo alunyar, etenito ŋikanupak ŋulu eya Akaia akiŋarakin.” Adau alelakinit kus ŋina ka akiŋaranakin akisimukekin ikes ŋulu alalak. 3Tokona, eyakuunit ayoŋ ŋikaitotoi lu, ikotere nyeruwor akituro kosi aŋuna kus akoŋinait anakiro a ŋun. Nai, ikwapei alimunitor ayoŋ, itenito iyes akiŋarakin. 4Ani nai kikipotu isua ka ŋituŋa ŋulu a Makedonia, ido ikiryamun iyes pa itenito, ikirumete isua ŋileec--nyikilimuni nai ŋuna a ŋileec kus a ŋilopeyek--anerae ikikinyomitae sek isua iyes! 5Aŋun, abu ayoŋ otamu atemar ejok akiŋitakin ŋikaitotoi ŋul aberun neni kus eriŋa ayoŋ, ikotere kitemokis ŋainakineta ŋuna iikinito iyes alemun. Kitemokino nai erae ŋainakineta ŋuna icamito iyes ŋilopeyek alemun, meere ŋuna ikitiŋakinitae.
6Toyenete nu: ituŋanan ŋini eekini ŋikinyom ŋulu ekudyoko, elemuni ŋidikudyo; ituŋanan ŋini eekini ŋikinyom ŋulu elalak, elemuni ŋulu elalak. 7Itemokino nai ŋinituŋanan inak ikwapei etubunitor iŋes elope, meere ka alejeo kori ka akitiŋakinit, anerae emina Akuj ŋini einanakini ka alakara. 8Epedori Akuj ainakin iyes alotyae a ŋolo alalan adepar etyae ŋolo iitanito iyes, ikotere nai toyakatar iyes jwi jwi ŋinibore daadaŋ iitanito ka kilapara daŋ aŋuna a etic a ŋolo ajokan a daadaŋ. 9Ikwapei ebaakar Akigiret ebe,
“Einanakini ka arimao ŋainanakineta
neni a ŋikulyak anakwapin;
erubakini akiyookino keŋ ŋikaru ka ŋikaru.”
10Akuj ŋina ekori ŋikinyom neni ke eketan ka atap ŋina kimuja, ikikorakini daŋ iŋes iyes ŋikinyom ŋulu iitanito iyes, kitopolou ikes toraa nooi ŋaraito ŋuna ka arimao kus. 11Ikitabari iŋes iyes jwi jwi, ikotere toruworos ŋulu irimaaka ŋarwa daadaŋ, ikotere nai tolakaros ŋikalalak neni ka Akuj aŋuna a ŋainakineta kus a ŋuna eryamunete ikes aneni kosi. 12Anerae etic ŋolo itiyaete iyes ŋol, nyiŋaranakinit ŋituŋa ŋulu ka Akuj bon, nai eyaunit daŋ neni ka Akuj akipuro ŋina apolon adepar. 13Itoodiuni etic kus ŋol akiyar kus a Ŋikristo ka epote ŋituŋa ŋulu alalak akipuro Akuj aŋuna ke epite a ŋolo ilimoritotor ka iwuapitotor iyes Ŋakiro ŋuna Ajokak ŋuna a Kristo, ŋuna iseraete iyes. Ipurete daŋ ikes Akuj aŋuna imoryata iyes ka ikes ta ŋikanupak ŋuluce daadaŋ ibore ŋini iyakatar iyes. 14Anamina a ŋina apolon nooi, ikilipakinete ikes iyes aŋuna ka ajokis a ŋina apolon a ŋina adau Akuj akitoodikin iyes. 15Olakaros neni ka Akuj aŋuna ka ainakinet keŋ a ŋina apolon a ŋina nyepedoryo alimun.
Currently Selected:
2 Ŋikor. 9: NIB2008
Highlight
Share
ਕਾਪੀ।
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.