2 Ŋikor. 6
6
1Ikwaŋina itiyaere iwon kaapei ka Akuj, ikilipit isua iyes nyicanican ajokis ŋina idaut iyes aryamun aneni ka Akuj. 2Anerae ebala Akuj:
“Ani ŋina adolyo apaki ŋina kitoodiunet ajokis kaŋ,
abu ekeira iyes;
ani ŋina adolyo akoloŋit ŋina akaiunia iyes,
abu ayoŋ ekeŋarak iyes.”
Kiirasi! Erae tokona na apaki ŋina ryamunet ajokis ŋina ka Akuj, erae tokona na Akoloŋit ŋina ka aiuno!
3Nyecamitae isua aruwor akigukinet aneni a idiotuŋanan, ikotere tomam ŋuna itoroniaritere etic kosi. 4Akilo, aloticisyo a daadaŋ a ŋulu ikitiyae isua, ikitoodiunit isua atemar ikirae ŋiketiyak ŋulu ka Akuj, aŋuna ikidaŋidaŋia ka atitinyu: alotooma ŋican, ŋatyokisyo ka ŋiburasinei. 5Aponi ikibuŋae isua, ikiwuakin mabus ka itosutonokin; aponi ikisitiyae isua nooi, nyejotooro kori nyimuja. 6Aŋuna ka asegis alotai kosi, anayenut, anatitinyikinit ka anarimao, ikitoodiun isua ikirae ŋiketiyak ŋulu ka Akuj alotooma Etau ŋolo Asegan, ka anamina kosi a ŋina a kire 7ka ŋakiro ŋuna a kire anapedor a ŋina ka Akuj. Ikiyakar isua akiyookino erae ibore ŋinijiet, ŋinikitijikinet ka ŋini kipakaret. 8Ikitopolooritae ka ikijamuwaritae isua; ikiyanyo ka ikipuroe. Ikitusubunitae isua ŋikalyokonok, erworos bo isua ŋuna a kire; 9ikitusubunitae ŋulu nyikiyenio, itoyenete bo daadaŋ, ikitusubunitae ŋulu ikitwakit, nai kire ikiyari isua ikwapei iteoto iyes. Tari kikisicanitae daŋ, nyikiaritae isua; 10tari kikisiyaloloŋitoe daŋ, ikilelyani isua jwi jwi; kikisibit ŋikulyak daŋ, nai ikitabarenene isua ŋituŋa ŋulu alalak, kesibit emam ibore ikiyakar daŋ, ikiyakar kire ŋiboro daadaŋ.
11Ikirworo isua neni kus Ŋikorinto analacakina; ikisunyakinit isua iyes ŋakiro daadaŋ ŋuna alotai kosi. 12Meere isua ikigol ŋitai kosi aneni kus, nai iyes igol ŋitai kus aneni kosi. 13Erworo tokona ayoŋ neni kus esibit irae iyes ŋidwe kaŋ: kisunyakinae iyes isua daŋ ŋakiro ŋuna alotai kus!
Tocoito nyikirikosi ŋituŋa ŋulu nyenupito Kristo
14Tocoito ilomarete nayokot apei ka ŋituŋa ŋulu nyenupito Kristo. Ikokinete mono ŋuna iyookino ka ŋuna nyiyookino erukete ai? Ikokinete akica ka akiryonut imorikinosi ai? 15Ikokinete Kristo ka Satan ecamunosi ai? Nyo epedori akimorikin ekanupan ka ŋini nyerae ekanupan? 16Ikokinete ŋakujo ŋace elomarete Kai ka Akuj ai? Anerae ikirae iwon Akai ka Akuj a ŋina eyari! Ikwaŋina elimunitor Akuj ebe,
“Abuni akiboi alotuŋa kaŋ, ido oruko ka ikes;
oruwor ayoŋ Akuj kec ka eruworosi ikes ŋituŋa kaŋ.”
17Nabo, ebala Ekapolon,
“Itemokino iyes toesikis ikes,
totyakaros aneni kec.
Nyitap idiobore ŋini nyeseg,
ido ekejau ayoŋ iyes.
18Abuni ayoŋ oruwor Papa kus
ka iruworosi iyes daŋ ŋidwe kaŋ ŋulusapa ka ŋulupesur,
adau Ekapolon ŋolo etiron alimun.”
Currently Selected:
2 Ŋikor. 6: NIB2008
Highlight
Share
ਕਾਪੀ।
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.