2 Ŋikor. 2
2
1Aŋun, abu ayoŋ otyaku atemar nyabu nabo neni kus eyaloloŋi. 2Ani nai kerae ekesiyaloloŋ ayoŋ iyes, kerae nai ŋae idoŋi akitalakar ayoŋ? Erae ca ŋituŋa ŋulupei abu ayoŋ esiyaloloŋ. 3Iŋes nai abunio ayoŋ egiria abaruwa ŋin neni kus. Pa acamit ayoŋ abunore neni kus, ido ekesiyaloloŋ ayoŋ ŋituŋa ŋulupei etemokino eketalakasi ayoŋ. Anerae acamunit kire ayoŋ atemar, ani alakara ayoŋ, iŋes atemar ilakara iyes daadaŋ. 4Abu ayoŋ egir neni kus iyaloloŋi ka eryeba etau kaŋ nooi ka egworo daŋ; pa arae ŋuna acamit ayoŋ ŋuna ka akisiyaloloŋ iyes, nai ikotere toyenut amina kaŋ ŋina apolon nooi neni kus daadaŋ.
Akisyon ekasecanakinan
5Ani keyai idio ŋini esiyaloloŋ ŋinice, nyekesiyaloloŋi iŋes ayoŋ, nai ikisiyaloloŋi iŋes iyes daadaŋ. 6Ituŋanan ŋini ikoni ŋin, akisican anatukot iŋes epedori.
7Nai akilo, itemokino kisyonioto ka kimaimaa iŋes, ikotere nyesuro etau keŋ nooi, ido toluŋakin jik. 8Aŋun, ekelipit ayoŋ iyes kiteyenikis iŋes atemar iminasi kire iyes iŋes nooi. 9Abu ayoŋ ekegirak iyes abaruwa ŋin, anerae acamit ayoŋ ayenun epite ŋolo kiponiata iyes topedoryata akipiyor akikatakinet ŋin, ka erae kipedorito jwi jwi akiwuap ŋakitatameta kaŋ. 10Ani kisyonioto iyes ituŋanan, esyoni ayoŋ daŋ iŋes. Ani kesyon ayoŋ idiotuŋanan--erae kire keyai ŋini itemokino esyoni--esyoni aŋuna kus alotooma Kristo, 11ikotere nai nyikilounia Satan iwon. Anerae ikiyeni iwon ŋuna etuko iŋes.
Eboyos a Paulo ŋolouriyen alo Toroas
12Ani ŋina adolunio ayoŋ Toroas alimonokin Ŋakiro ŋuna Ajokak ŋuna a Kristo, abu oryamu atemar kesir Ekapolon keŋaa aina erot ŋolo a Ŋakiro a ŋuna Ajokak. 13Nai eyaloloŋi ayoŋ nooi, anerae nyeryamuna ayoŋ lokaato kaŋ Tito aina. Aŋun, abu otema neni a ŋituŋa aina ikianyun, ido olot nai Makedonia.
Akiloun alotooma Kristo
14Olakaros neni ka Akuj! Anerae ikiŋarenikinit iŋes iwon jwi jwi anakiloun a ŋina a Yesu Kristo! Ikisitiyae iŋes iwon akielakin nakwap daadaŋ eure ŋolo akukunyon ŋolo ka ayenut keŋ. 15Kire, ikirae iwon aneni ka Akuj eure ŋolo akukunyon ŋolo a Kristo ŋolo ielakin lotuŋa ŋulu eiunitae ka ŋulu ebukoro. 16Aneni a ŋice, erae eure ŋolo ka atwanare ŋolo eyauni atwanare; aneni a ŋice, erae eure ŋolo ka akiyar, ŋolo eyauni akiyar. Ŋae epedori akitiya ŋiticisyo ŋulu ikote ŋul? 17Nyikikwaan isua ka ŋuluce ŋulu elalak, ŋulu itusubunito etic ŋolo ka Akuj ŋolo kicurutaet; nai aŋuna eraakar Akuj ikiyakit isua, ikirworo isua ŋuna a kire alokiŋaren keŋ aŋuna ikiraakar ŋiketiyak ŋulu a Kristo.
Currently Selected:
2 Ŋikor. 2: NIB2008
Highlight
Share
ਕਾਪੀ।
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.