2 Ŋikor. 13
13
Ŋakiciketa ka ŋimalasyo ŋulu esidyok
1Erae na abunet kaŋ ŋina a ŋauni ŋina abunio aanyun iyes. “Itemokino ŋinasitan kitogogoŋito ŋisuudae ŋiarei kori ŋulu edeparito ŋiarei,” ikwapei ebaakar Akigiret. 2Acamit alimokin iyes ŋulu idaut akisec ŋapakio ŋuna alunyarosi ka ŋuluce daadaŋ; alimunit ayoŋ ŋun paaran apaki ŋina abunitor ayoŋ neni kus abunet ŋina a ŋaarei, nai alimuni ayoŋ nabo ŋakiro ŋunapei ikwapei alwania aneni kus; apaki ŋina abunio ayoŋ nabo neni kus, esicani nooi ŋikasecak ŋul. 3Ipote iyes ayenun kire atemar irworo Kristo aneni kaŋ. Nyepalag Kristo ŋina itiyaa aneni kus, nai itiyae apedor keŋ alotooma kus. 4Tari kibubukinitoe iŋes lomusalaba anapalagu, eyari iŋes aŋuna ka apedor a ŋina ka Akuj. Ikipalag iwon daŋ anakimorikina ka Kristo; nai ani kikitiya isua alokidiŋ kus, ikimori apedor ŋina ka Akuj, anakiyar a ŋina a Kristo.
5Toripiripas make toanyut kirubakinito ananupit kus. Torotas iyes make. Nyeanyuna mono iyes atemar eyai Yesu Kristo tooma kus a? Ani kemam, iŋes atemar kikipiyosi iyes ŋakikatanakineta. 6Egeno ayoŋ atemar iyanyunete atemar nyipiyoro ŋakikatakineta isua. 7Ikilipi isua Akuj atemar nyitiyata iyes aronis adio. Nyelimunitoe isua ŋun akitoodiunor atemar ikilou isua ŋakikatakineta, nai erae ikotere kitiyata iyes ŋuna iyookino, tari kesibit ikipiyorito ŋakikatakineta isua. 8Anerae nyepedoryo isua akitiya idiobore ŋini itepegit ŋuna a kire, nai ikitiyae aŋuna a kire. 9Ikilakara isua ŋina igogoŋioto iyes, tari kikipalag isua. Aŋun, ikilipit isua Akuj kitogogoŋ ŋitai kus jik. 10Egiri ayoŋ nu eriŋa alwana aneni kus, ikotere ani abuni, nyadedeŋiar alopite a ŋolo esitiyaa apolou ŋina abu Ekapolon okoinak ayoŋ aŋuna ka adukunio, nai meere akielielaar iyes.
11Ŋuna isidiyete ŋikaitotoi, ikianyun! Kitogogoŋo ŋitai kus. Kitatamas make; tocamununos make; kiboiyoto a ekisil. Toyai neni kus Akuj ŋina ka amina ka ekisil.
12Kimalas itunasi make itoodiunito atemar iminin.
13Ikimalaete iyes ŋituŋa ŋulu ka Akuj daadaŋ a ne.
14Toyai neni kus daadaŋ ajokis ŋina ke Ekapolon Yesu Kristo ka amina ŋina ka Akuj ta akimorikina ŋina ke Etau a ŋolo Asegan.
Currently Selected:
2 Ŋikor. 13: NIB2008
Highlight
Share
ਕਾਪੀ।
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.