1 Ŋikor. 2
2
Akirot ŋina a Kristo a ŋolo aponi kibubukinoe
1Ŋikaitotoi, apaki ŋina abunio ayoŋ neni kus alimonokin ŋakiro ŋuna ka Akuj, ŋuna imunono pa erworo ayoŋ ebeli ŋakiro anapiiryanut kori anaosou. 2Anerae abu ayoŋ otyaku atemar nyitemokino ayoŋ eketatam iyes idiobore, mati ŋuna a Yesu Kristo bon a ŋolo aponi kibubukinoe lomusalaba. 3Apaki ŋin, ayai ayoŋ neni kus arae ituŋanan ŋini palag anakuryanu a ŋina apolon ka anamaran. 4Ipotu iyes nyicamut ŋakiro kaŋ aŋuna ka aosou a ŋina a ŋituŋa, nai arae aŋuna abunio Akuj kitoodiu atemar erae ŋuna a kire anapedor a ŋina ke Etau a ŋolo ka Akuj. 5Abu ayoŋ olimonok ikoŋina, ikotere nyeruwor anupit kus ŋina ebunit anaosou a ŋituŋa, nai anapedor a ŋina ka Akuj.
Aosou ŋina ka Akuj
6Tari kikote nen, ikitatami isua ka aosou neni a ŋituŋa a ŋulu epakito anatameta kec tari pa kerae aosou na ŋina ka akwap a na, kori ŋina a ŋikepukak a ŋulu ka akwap a na a ŋulu esaluni apolou kec. 7Nai ikitatami isua iyes aosou ŋina ka Akuj ŋina imunono ŋina iwuaitae. Eriŋa tari akwap nyesubuna, keris Akuj ketyaku atemar itemokino iwon omora ka iŋes apolou keŋ. 8Amam tari ŋikepukak ŋulu ka akwap a na ŋulu ayenete ŋun, amam tari epei daŋ; kerae toyenunito, pa kibubukinito Ekapolon ŋolo ka apolou. 9Ikwaŋina igiritere Nakigireta ebe,
“Ibore ŋini nyiŋolikina ŋakonyen,
kori nyiirara ŋaki,
kori nyetama ŋatameta a ŋituŋa,
erae ibore ŋin ŋini abu Akuj kitemok
aŋuna a ŋulu eminasi iŋes.”
10Nai adau Akuj akitoodikin isua ŋun alotooma Etau keŋ. Eripiripi Etau ŋakiro daadaŋ, tari ŋuna iwuaitae ŋuna ka Akuj. 11Ŋae alotuŋa eyeni ŋatameta a ŋuluce? Etau a ituŋanan ŋolo eyai tooma keŋ, iŋes bon eyeni. Ikwaŋinapei, emam ituŋanan eyeni ŋatameta ŋuna ka Akuj mati Etau ŋolo ka Akuj. 12Nai aryamun isua Etau ŋolo ebunit aneni ka Akuj, meere ŋolo ka akwap, ikotere oyenuniata ibore daadaŋ ŋini ikiinak isua Akuj ikoŋin.
13Aŋun nai, ikilimonokini isua ŋakiro ŋun alopite a ŋolo itatamya Etau ŋolo ka Akuj, meere alopite a ŋolo itatamyata ŋituŋa anaosou kec, nai lopite ŋolopei ikilimonokinia isua ŋakiro ŋuna ka Akuj ikwa ecamitor Etau keŋ. 14Ituŋanan ŋini emamukar Etau ŋolo ka Akuj, nyecamuni ŋakiro ŋuna ke Etau a ŋolo ka Akuj, anerae erae ŋun abaŋao aneni keŋ; ido nyepedori ayenun ikes, anerae epedorosi ŋun ayenun anakiŋarakinet a ŋina ke Etau a ŋolo ka Akuj bon. 15Ituŋanan ŋini eyakar Etau ŋolo ka Akuj, epedori ayenun aronis ka ajokis a ŋinibore a daadaŋ, nai emam ŋini epedori ayenun aronis ka ajokis keŋ. 16Igiritae Nakigireta ebe,
“Ŋae ayenu ŋatameta ŋuna ke Ekapolon Akuj,
ŋae epedori akitatam Akuj?”
Nai ikiyakar isua ŋatameta ŋuna a Kristo.
Currently Selected:
1 Ŋikor. 2: NIB2008
Highlight
Share
ਕਾਪੀ।
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.