1 Ŋikor. 15
15
Ayarun a Kristo
1Ŋikaitotoi kaŋ, acamit ayoŋ akitatamun iyes Ŋakiro ŋuna Ajokak ŋuna abu ayoŋ okolimok iyes, ŋuna ipotu iyes tocamut, ŋuna tokona icasitor anupit kus. 2Ikiunete iyes Ŋakiro ŋuna Ajokak ŋun, erae kicata iyes aneni kec lopite ŋolo akalimokinitor ayoŋ iyes--ŋaye kerae anupit kus akoŋinait!
3Abu ayoŋ mono ekobu neni kus ŋakiro ŋuna apolok, ŋuna abu ayoŋ ejau:
Abu Kristo totwan aŋuna a ŋasecisya yok,
ikwaŋina igiritere Nakigireta.
4Aponi iŋes tonukae,
kiteyarunae kelunyar ŋirwa ŋiuni,
ikwaŋina igiritere Nakigireta.
5Abu kitoodiun neni a Petero
ka neni a Ŋikiyakia a ŋulutomon ka ŋiarei.
6Ekaku nabo, abu kitoodiun apaki apei neni a ŋikewuapak keŋ a ŋulu adeparit ekimar kec ŋamiae ŋakan. Eriŋa tokona ŋice kec daŋ eyarete, erae ketwakito ŋice daŋ. 7Ekaku nai, abu kitoodikin neni a Yakobo ka neni a Ŋikiyakia a ŋuluce a daadaŋ.
8Ekaku a daadaŋ, abu eketoodikin ayoŋ daŋ, tari kekoni ayoŋ ituŋanan ŋini ikirikiriunitae akidoun. 9Anerae arae ayoŋ ecaryoit a Lokiyakia, nyitemokino akanyaritae ekiyakia, anerae abu ayoŋ esican Ŋikristo. 10Nai aŋuna ka ajokis a ŋina ka Akuj, arae ayoŋ tokona ekiyakia ka nyeruworo ajokis ŋina abu iŋes okoinak ayoŋ akoŋinait. Akilo, etiya ayoŋ nooi adepar Ŋikiyakia ŋuluce daadaŋ, tari pa kerae agogoŋu kaŋ a elope etiyae, nai ajokis ŋina ka Akuj ŋina eyai neni kaŋ. 11Aŋun, kitorunito Ŋakiro ŋuna Ajokak ŋun neni kaŋ kori neni a Ŋikiyakia a ŋuluce, ŋakiro ŋun ikes elimonokinio isua, ido ikes pei inupito iyes.
Ayarun yok
12Ŋakiro nu ikes ikilimonokini isua: adaun akiteyarun Kristo alokatwak. Kaanukiro nai ebaakatar ŋice kus nyiteyarunio ŋikatwak? 13Ani kemam ayarun a ŋikatwak, iŋes atemar nyiteyaruna Kristo; 14ani pa kiteyarunitae Kristo, iŋes atemar erae alimonokin kosi akoŋinait ka erae anupit kus daŋ akoŋinait. 15Nabo daŋ, ikitakani isua esibit ikimodyanakini ŋituŋa ikirworo ŋuna ka Akuj, anerae aponi isua tolimonokinae ebe abu Akuj kiteyaru Kristo alokatwak. Nai pa kiteyarunit Akuj Kristo, iŋes kire atemar nyiteyarunio ŋikatwak. 16Ani pa kiteyarun ŋikatwak, iŋes atemar nyiteyaruna Kristo. 17Ani pa kiteyarunitae Kristo, iŋes atemar erae anupit kus akoŋinait ka eriŋa nyisyoniyo ŋasecisya kus. 18Iŋes nabo atemar, tari ŋulu atwaka enupito Kristo daŋ abukorosi. 19Ani kerae akigeno kosi neni a Kristo ŋina ka akiyar a na bon, iŋes atemar itemokino ŋituŋa ikisyonito isua adepar tari idiotuŋanan anakwap.
20Nai kire, adaun akiteyarun Kristo alokatwak ka itoodiunito ŋun atemar iteyarunio daŋ ŋulu etwakito. 21Anerae ikwaŋinapei ayaunia ituŋanan ipei atwanare neni a ŋituŋa, ayau daŋ ituŋanan ipei ayarun alokatwak neni a ŋituŋa. 22Anerae ikwaŋinapei etwakyata ŋituŋa daadaŋ anakimorikina kec ka Adam, iteyarunio daŋ anakimorikina kec ka Kristo. 23Nai iteyarunio ŋinituŋanan ikona: eteyarun mono Kristo; ekaku iteyarunio ŋikanupak a Kristo apaki ŋina eboŋunio iŋes. 24Todolu nai asalunet ŋina ka akwap; apaki ŋin, ilouni Kristo ŋapukasinei ka ŋapolon ka ŋapedorosyo daadaŋ, ido inak Apukan neni ka Akuj a Papa. 25Anerae, itemokino Kristo kipuka akitodol ŋina ilounia Akuj ŋimoi keŋ daadaŋ, kiwuak ikes kwap ŋakejen a Kristo. 26Emoit ŋolo ilounio ekaku iŋes atwanare. 27Anerae ebasi Ŋakigireta ebe, “Adau Akuj akiwuakin ŋiboro daadaŋ kwap ŋakejen a Kristo.” Nai ileere atemar nyimarakinitae Akuj nakiro ŋuna ebasi “Ŋiboro daadaŋ”, anerae Akuj ewuakini ŋiboro daadaŋ kwap ŋakejen a Kristo. 28Nai ani iwuakinio ŋiboro daadaŋ Napukan a Kristo, ebuni nai Lokoku elope kiwuakin Napukan ka Akuj a ŋina adau akiwuakin ŋiboro daadaŋ Napukan a Kristo, ikotere nai toruwor Akuj akepukan a daadaŋ.
29Anukiro nai elosikinito ŋituŋa ŋulu ibatisao aŋuna a ŋikatwak a ŋulu nyibatisatae? Ani pa kiteyarunio ŋikatwak, ikwapei ebaakatar ŋice, kaanukiro nai ibatisaere ŋituŋa ŋul aŋuna a ŋikatwak? 30Kaanukiro ikiwuakinitor isua akiyar kosi natyokisyo ŋisaae daadaŋ? 31Ŋikaitotoi kaŋ, eyai atwanare kiŋaren kaŋ jwi jwi! Erae nu ŋuna a kire lopite ŋolo eturor ayoŋ aŋuna kus anakimorikina yok ka Yesu Kristo Ekapolon. 32Inyoni nai aryamuni ayoŋ aŋuna ca ke ekibure a ituŋanan, erae ketijiye ŋituŋa ŋulu ikote ŋityaŋ ŋulu adedeŋak alo Epeso? Ani pa kiteyarun ŋikatwak, etiyata nai ikwapei elimunitere, “Emuja ka omata, anerae ikitwaki moi taparacu.”
33Tocoito nyikimodikin! “Emunaarete ŋirukitos ŋulu aronok ŋipitesyo ŋulu ajokak.” 34Itemokino tokyenyut, tojoŋoto asecesec, anerae nyeyenete ŋice alokidiŋ kus Akuj. Alimunit ayoŋ ŋun akisirum iyes ŋileec.
Akuwan ŋina eyaruni
35Nai epedori ituŋanan ice akiŋit atemar, “Ikokinio iteyarunio ŋikatwak ai? Ŋawat mono ŋuna ikote ai eyakaunotor ikes?” 36Iyoŋ ebaŋaanot! Ŋina iekinia iyoŋ ekinyomit nalup, nyelomuni, nyeyari, mati mono ketwana. 37Ibore ŋini iekini iyoŋ erae ca ekinyomit, kerae emomwae kori ekinyomit ece daadaŋ, nai meere ekitoe ŋolo apolou ŋolo adau arupun. 38Nai einakinio ekinyomit ŋol akuwan lopite ŋolo ecamitor Akuj; einakini iŋes ŋolokinyomit akuwan ŋina itemokino.
39Nyikwaan ŋawat a ŋiboorei a ŋulu eyarete; eyakatar ŋituŋa ekuwane ŋolo egelaana, ŋityaŋ daŋ eyakatar ekuwane ece, ŋikyeny daŋ ece ka ŋikolya daŋ ekecekuwane. 40Eyai ekuwane ŋolo alokidiama ka eyai ŋolo alokwap; akibuses ŋina a ŋawat a ŋiboorei a ŋulu alokidiama nyikwaan ka akibuses ŋina a ŋiboorei a ŋulu alokwap. 41Eyakar akoloŋ akibuses keŋ ka alope, elap daŋ eyakar akibuses keŋ, ŋikacer daŋ eyakatar akibuses ŋina egelaana; nabo egelaana akibuses a ŋolokacerit.
42Ikoni nenipei ayarun a ŋikatwak daŋ. Apaki ŋina enukere akuwan, erae ŋina inyasuna; ani iteyarunio, eruwor ŋina nyinyasuna. 43Apaki ŋina enukere, eŋotor ka epalag; ani iteyarunio, ibusiar ka egogoŋior. 44Ani enukio, erae iŋes akuwan ŋina eyakar ekuwane ŋolo ka akwap a na; ani iteyarunio, eruwor akuwan ŋina eyakar ekuwane ŋolo erae etau. Ikwapei eyakar akuwan ŋina erae ekuwane ŋolo ka akwap a na, itemokino daŋ toyai akuwan ŋina eyakar ekuwane ŋolo erae etau. 45Anerae ebasi Ŋakigireta ebe, “Abu Akuj tosub ituŋanan ŋini ke ekiŋaren--Adam--erae ituŋanan ŋini eyari”; nai Adam ŋolo esidyon--Kristo--abu toruwor Etau ŋolo einanakini akiyar. 46Meere akuwan ŋina eyakar ekuwane ŋolo erae etau iŋareni mono, nai akuwan ŋina eyakar ekuwane ŋolo ka akwap a na; totupak nai ekuwane ŋolo erae etau. 47Adam ŋolo eŋarenon, ŋolo asubunio analup, erae ekaakwap. Adam ŋolo a ŋiarei ŋolo erae Kristo, erae ekanakuj. 48Ŋituŋa ŋulu ka akwap, ikote ŋolo asubunio analup; ŋituŋa ŋulu anakuj, ikote ŋolo anakuj. 49Ikwapei ikikwaanar tokona iwon ka ituŋanan ŋini asubunio analup, ikwaŋinapei, ikikwaanikin iwon ka ituŋanan ŋini anakuj.
50Ŋikaitotoi, apolou a ŋakiro a ŋun iŋes na: ibore ŋini esubunitae anakiriŋ ka anaokot, nyepedori aryamun Apukan ka Akuj; ibore ŋini inyasun, nyeryamuni ibore ŋini nyinyasun. 51-52Kiirasi ŋakiro ŋuna a kire ŋuna imunono nu: nyikitwaki iwon daadaŋ, nai ani eruuni arupepe ŋina esidyon, ikilocokinio iwon daadaŋ atipei, ikwa akirwapakinet ŋina ka akoŋu. Anerae ani eruuni arupepe, iteyarunio ŋikatwak, nyetwakete nabo jik; ka ikilocokinio iwon ŋulu ikiyari. 53Anerae ibore ŋini inyasun, itemokino kilocokinoe toruwor ŋini nyinyasun; ibore ŋini etwani, itemokino kilocokinoe toruwor ŋini nyetwani jik. 54Aŋun nai, kedau akinyasuno akilocokin toruwor ŋina nyinyasun ka ibore ŋini etwani toruwor ŋini nyetwani jik, iyookin nai Ŋakigireta ŋuna ebasi,
“Adaun atwanare akinyasun;
eloun, erikakin!
55Atwanare, ai eyai akiloun kon?
Ai atwanare eyai apedor kon ŋina wanet?”
56Eryamunit atwanare apedor ŋina wanet anasecit ka eryamunit asecit apedor keŋ a Lokisila. 57Nai ikilakara neni ka Akuj, a ŋina ikiinak iwon akiloun aŋuna ke Ekapolon yok Yesu Kristo!
58Aŋun nai, ŋikaitotoi kaŋ ŋuluminan, kicata ka nyiryaŋiryaŋasi. Kitiyata ka agogoŋu etic ŋolo ke Ekapolon ikwapei iyeniata iyes atemar emam etic ŋolo itiyaete iyes anakimorikina ke Ekapolon, ŋolo eruwor ekoŋinait.
Currently Selected:
1 Ŋikor. 15: NIB2008
Highlight
Share
ਕਾਪੀ।
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.