Ndandililo 26
26
Che Isaka akusamila ku Gelali
1Nipele patyochele sala jekulungwa mu chilambo mula, kujipunda sala jijatyochele katema ka che Ibulahimu. Che Isaka ŵajawile kwa mwenye jwa Ŵafilisi jwakuŵilanjikwa che Abimeleki jwaŵatamaga ku Gelali. 2Ambuje ŵankopochele che Isaka ni kunsalila, “Ngasinjaula chilambo cha ku Misili, nambo ntame mu chilambo mu muchinansalile. 3Ntame mu chilambo chi kwa katema, ni une chinjiŵa ni mmwe ni kumpa upile. Chimalichisye chilanga chinaapele atati ŵenu che Ibulahimu, pakuŵa chinampe mmwe ni iŵelesi yenu ilambo yose. 4Chinaatende iŵelesi yenu kuŵa ŵajinji mpela ndondwa sya mwinani ni kwapa ilambo yose yi. Kutyochela mu uŵelesi wenu, ŵandu wose pachilambo chapegwe upile, 5ligongo che Ibulahimu ŵambikanile une, ni ŵagakamulisye malajisyo gangu, ni makanyo gangu ni malamulo gangu.”
6Kwayele che Isaka ŵatemi ku Gelali ko. 7Ŵandu ŵa kwele paŵaausisye ngani jankati ŵankwawo, nombejo ŵajanjile, “Aju ali nlumbwangu.” Ŵajogwepe kusala isyene kuti che Lebeka ali ŵankwawo kwa ligongo lyakwajogopa ŵandu ŵa chilambo chila akammuleje. Pakuŵa ŵaliji ŵakusalala nnope. 8Paŵatemi kweleko kwa katema kakaleu, che Abimeleki mwenye jwa Ŵafilisiti ŵalingulile pedilisha, ŵammweni che Isaka ali ŵaakumbete che Labeka ŵankwawo. 9Che Abimeleki ŵammilasile che Isaka ni kunsalila, “Ana kumbe che Labeka ŵa ali ŵankwenu! Kwachichi mwasasile unami kuti ali alumbu ŵenu?” Che Isaka ŵajanjile, “Ligongo najogopaga kuulagwa kwa ligongo lyakwe.”
10Che Abimeleki ŵausisye, “Ana chichi chelechi chintutesile? Jumo jwa ŵandu ŵangu pangaganisya akakombwele kugona ni ŵankwenu, nomwe nkatuleŵasisye.” 11Nipele che Abimeleki ŵaajamwiche ŵandu wose achitiji, “Mundu jwalijose juchankwaye mundu ju pane ŵankwakwe, isyene chaulajikwe.”
12Chele chaka cho che Isaka ŵalimile mu chilambo mula, nipele ŵawunile yakulya yejinji nnope, pakuŵa Ambuje ŵampele upile. 13Pelepo che Isaka ŵakwete ipanje yejinji, ŵapatile indu yejinji mpaka ŵaliji jwakusichila nnope. 14Ŵakwete ngondolo, ni ng'ombe, ni ŵakutumichila achajinji, mpaka Ŵafilisiti ŵaakolele wiu. 15Nipele Ŵafilisiti ŵaliji asilile isima yose iŵasolite ŵakutumichila ŵa che Ibulahimu, atati ŵao che Isaka, iŵasolite katema che Ibulahimu ali ŵajumi. 16Che Abimeleki ŵansalile che Isaka, “Ntyoche pamangwetu pano, pakuŵa mmwejo sambano nkwete machili kutupunda uwe.”
17Nipele che Isaka ŵatyosile kweleko, ŵajawile ni kuŵika chigono pa lichemba lya Gelali ni kutama kweleko. 18Che Isaka ŵaukwile sooni isima iŵasosile che Ibulahimu atati ŵao katema ali ŵajumi, isima iŵasilile Ŵafilisiti katema paŵajasiche che Ibulahimu. Ŵaipele meena galagala giŵaipele atati ŵao. 19Ŵakutumichila ŵa che Isaka paŵasosile mu chiŵata ŵapatile chisima chana meesi gagakuilima. 20Ŵakuchinga ilango ŵa ku Gelali ni ŵakuchinga ŵa che Isaka ŵatandite kangana achitiji, “Meesi ga gali getu.” Kwayele che Isaka ŵachiŵilasile chisima cho Eseki, malumbo gakwe kukangana, pakuŵa ŵaliji nkukangana ni che Isaka. 21Ŵakutumichila ŵa che Isaka ŵasosile chisima chine, pelepo sooni ŵandu ŵala ŵatandite kangana nawo, kwayele che Isaka ŵachiŵilasile chisima cho Sitina, malumbo gakwe kuŵengana. 22Nipele che Isaka ŵatyosile kweleko ni kwaula kukusola chisima chine. Nambo pa chele chisima cho nganikupagwa kukangana kwakuli kose, kwayele che Isaka ŵachiŵilasile chisima cho Lehobosi achitiji, “Sambano Ambuje atulechele lipesa, noweji tukoonde mu chilambo muno.”
23Kutyochela kweleko che Isaka ŵajawile ku Beli Sheba. 24Chilo cha lyuŵa lilyolyo Ambuje Akunnungu ŵankopochele che Isaka ni kunsalila, “Une ndili Akunnungu jwa che Ibulahimu atati ŵenu. Nkajogopa pakuŵa une ndili pamo ni mmwe, chinampe upile ni kuichuluya iŵelesi yenu kwa ligongo lya jwakutumichila jwangu che Ibulahimu.” 25Nipele, che Isaka ŵataŵile chilisa, ni ŵaapopele Ambuje. Ŵaŵisile chigono ni kutama kweleko, ŵakutumichila ŵao ŵasolite sooni chisima chine.
Che Isaka ni che Abimeleki akwilana
26Che Abimeleki ŵatyosile ku Gelali pamo ni che Ahusati mshauli jwakwe ni che Fikoli jwankulu jwa ŵandu ŵakwe ŵangondo, ni kwajaulila che Isaka. 27Che Isaka ŵausisye, “Kwachichi nnyichenje kukwangu nli nkuumenga ni akuno mwandopwele kukwenu?” 28Nombewo ŵajanjile, “Uwe tuiweni kuti Ambuje ali pamo nomwe. Kwayele, tuganisisye kuti ili yambone chipagwe chilumbilo pasikati jetu ni mmwe ni kutenda lilangano, 29lyakuti mmwejo ngasintutenda chachili chose chakusakala nowe ŵakwe ngatutenda chakusakala kukwenu. Uweji twantendele indu yambone, nombe twakundile kuti ntyoche mu chilambo chetu kwa chitendewele pangantendela yangalumbana yaili yose. Ni sambano mmwe mpatile upile kutyochela kwa Ambuje.” 30Nipele che Isaka ŵatesile chindimba cha yakulya, nombewo ŵalile ni kung'wa. 31Malaŵi jakwe ŵajimwiche kundaŵindaŵipe ni kulumbililana ŵana ŵaŵili. Nipele che Isaka ŵapeleche ni kulanganana nawo kwa chitendelewe. 32Lyuŵa lilalila ŵakutumichila ŵa che Isaka ŵaiche ni kwasalila ngani ja chisima chiŵasosile chila, ŵatite, “Tugapatile meesi!” 33Pelepe che Isaka ŵachiŵilasile chisima cho Shiba, kwayele musi wauli chisima cho ukuŵilanjikwa Beli Sheba mpaka lelo jino.
Achiŵankwakwe che Esau
34Che Esau paŵaliji ni yaka alobaini, ŵalombele achakongwe ŵaŵili ŵa lukosyo lwa Ŵahiti, che Judisi mwali ju che Beeli ni che Basemati mwali ju che Eloni. 35Ŵele achakongwe wo ŵaatendekasisye che Isaka ni che Labeka atame mu kusongoneka.
Currently Selected:
Ndandililo 26: YBV
Highlight
Share
ਕਾਪੀ।
Want to have your highlights saved across all your devices? Sign up or sign in
Yao New Testament © The Word for the World Southern Africa and Pioneer Bible Translators, 2018.