Matiu 10
10
Jesu Sanọ Ihwivẹ na
(Mak 3.13-19a; Luk 6.12-16)
1O de se ihwivẹ na bro rhe, o da vwẹ ogangan kẹ ayen vwẹ enu rẹ irhi ri jẹfuọn, rere ayen vwọ djẹ ayen kufia, rere ayen vwo sivwi emiavwe dohwo doghẹre rọye.
2Odẹ rẹ ihwivẹ na kẹ ena, ọ rẹsosuọ Saimọn re se Pita kugbe Andru oniọvo rọye, Jems rẹ ọmọ ri Zẹbidi, kugbe Jọn oniọvo rọye. 3Filip kugbe Batalomiu; Tọmọs kugbe Matiu rẹ omiarhọghọ; Jems ọmọ rẹ Alfiọs, kugbe Tadiọs. 4Saimọn ohwo ri Kenan, kugbe Judas Iskariọt rọ shẹrẹ.
Oyan rẹ Ihwivẹ na
(Mak 6.7-13; Luk 9.1-6)
5Ihwivẹ nana eye Jesu jiri, ọ da vwẹ urhi kẹ ayen nẹ, ovwan kpo irere efa-a, eyẹ irere ri Sameria-a. 6Ẹkẹvuọvo wa yanran bru igegede mẹ, emọ Izrẹl ri ghwruru na. 7Ovwan da yanran, wa ta nẹ, Uvie rẹ odjuvwu si kẹre otọ re. 8Sivwi ihwo re mwa ọga rhọvwọ ihwo ri ghwuru, sivwi ehonvwoti, djẹ idẹbono phia, ọphẹ ovwan mrẹrẹ, ọphẹ ovwan je vwọ kẹ rhe. 9Ovwan ghwa oro-o, eyẹ idọnọ efuanfo-on, eyẹ emu ọfa vwẹ evun rẹ ekpo-o. 10Ovwan ghwa ekpo vwẹ oyan na-a, eyẹ ewun ivẹ-ẹ, ovwan ghwa isabato-o, ovwan ghwa ọkpọ-ọ, kidie ohwo rọ wian owian o vwo osa rẹ owian rọye. 11Korho korho rẹ ovwan teri, eyẹ orere, ovwan guọnọ ohwo ro fori vwọ, etiyin kọye ovwan dia bẹsiẹ rẹ ovwan vwo no. 12Ovwan de te uwevwi we yere. 13Ọ da dia uwevwi ro fori, ufuoma rẹ ovwan kọ dajo. O rhe fo-o, ufuoma rẹ ovwan ko rhivwi bru ovwan rhe. 14Ohwo kohwo rọ reyọ ovwa-an, ro nyo ota rẹ ovwa-an, we de nẹ uwevwi yena eyẹ orere na, we phorho ekpẹn re tamu awọ rẹ ovwan phihọ otọ. 15Uyota me ta kẹ ovwan, o yovwi kẹ Sodọm vi Gomora vwẹ ẹdẹ rẹ ẹdjọeguo, nọ orere yena.
Ukpokpogho rọ cha
(Mak 13.9-13; Luk 21.12-27)
16Nighere mi ji ovwan kerẹ igegede re hẹ uherevie rẹ ikpohrokpo; wa gba ghwanre kerẹ ọrọdekọ, re we ru dẹndẹn kerẹ ilekuku. 17Ẹkẹvuọvo ovwan jomaotọ; kidie e che mu ovwan kpo ẹguare, vwẹ evun ri Sinagọg, kẹ ayen che ru ovwan oja. 18Ke che mu ovwan rhe ikeferi vẹ ivie vwi fiki mẹ, kẹ ovwan dia iseri kẹ otu rẹ ikeferi na. 19Ẹkẹvuọvo e de mu ovwan, wa ro ẹnwan rẹ obo rẹ ovwan cha ta-a, kidie vwe ọke yena ke che dje obo re wọ ra kẹ wẹ. 20Kidie ọ dia owẹ re ta ota na-a, ẹkẹvuọvo Erhi rẹ Ọsẹ na ọye re ta ota vwẹ evun wẹ. 21Oniọvo che hwe oniọvo, ọsẹ che hwe ọmọ, emọ che hwe i ri vwiẹ ayen, ri de ghwu. 22Ihwo ke cha jẹ ovwan eghrẹ fiki mẹ; ẹkẹvuọvo ọ ro se chirako ri te oba, kọye re cha rhọ 23Ẹkẹvuọvo e de kpokpo uwe vwẹ orere ọvo, djẹ kpo ọrivẹ. Kidie uyota me ta kẹ ovwan, ovwan sa djẹ vrẹn irere rẹ Izrẹl na ejobi re tavwe rẹ Ọmọ rẹ ohwo ke rhe-e.
24Odibo rho nọ onini rọye-e, ọviẹn rho nọ ọrovworo-o. 25Oyoma re odibo họhọ onini rọye, re oviẹn je họhọ ọrovworo. Ayen de se o ro vwo uwevwi Bẹlzibọl, komavo e ru ikru rọye.
Ohwo ra djẹ Oshọ Rọye
(Luk 12.2-7)
26Ovwan djẹ oshọ rẹ aye-en; o vwo emu ọvuọvo rọ djahere ro jẹ phia-a, eyẹ emu ọvuovo re sinu re jẹ mrẹ-ẹ. 27Obo re me ta kẹ ovwan vwẹ odjahọ ọye ovwan ta vwẹ azagba, obo ra bẹbẹ ta kẹ ovwan, ọye we ghwoghwo vwẹ enu rẹ uwevwi. 28Ovwan djẹ oshọ rẹ ohwo ro se hwe ugboma-a, ẹkẹvuọvo wa djẹ oshọ rẹ ohwo rọ se hwe ẹnwẹn. 29Ọ dia igue ivẹ eye a shẹ anini? yẹ ọvuọvo sa va Ọghẹnẹ abọ she-e? 30Ẹkẹvuọvo ogẹto rẹ uyovwi rẹ ovwan na e kere ayen. 31Ovwan djẹ oshọ-ọ, ovwan ghare nọ igue na.
Rhọvwo Kristi vwo Obaro rẹ Ihwo
(Luk 12.8-9)
32Ohwo kohwo rọ rhọvwe ovwẹ vwẹ irharo rẹ ihwo, ọye me je rhọvwe vwẹ obaro rẹ ọsẹ rọ hẹ obo odjuvwu. 33Ẹkẹvuọvo ohwo kohwo rọ sen vwẹ vwẹ irharo rẹ ihwo, ọye me je sen vwẹ obaro rẹ ọsẹ mẹ rọ hẹ obo odjuvwu.
Ọ dia Ufuoma-a, Ẹkẹvuọvo Ọlọkọ
(Luk 12.51-53; 14.26-27)
34We roro ni mi rhi phi ufuoma phihọ akpọ-ọ, me vwẹ ufuoma rhe-e, ẹkẹvuọvo ọlọkọ. 35Me rhere rhi phi ohẹriẹ phihọ uvwre rẹ ọsẹ vẹ ọmọ, ọmọtẹ vẹ oni rọye, kugbe aye vẹ oniorọvwe rọye. 36Uwevwi rẹ ohwo ọye ọvweghrẹ rọye epha. 37Ohwo ro guọnọ ọsẹ eyẹ oni nọ vwẹ, yo fo vwe-e; ọ rọ guọnọ ọmọshare eyẹ ọmọtẹ rọye nọ vwẹ, yo ji fo vwe-e. 38Ohwo ro rhe mu agbagba rọye ro de nene uvwe-e, yẹ ohwo yena se fo vwe-e. 39Ohwo rọ guọnọ arhọ rọye ko kuofia, ọ ro rhe ku arhọ rọye fia fiki mẹ ko sivwo rhọ.
Osaẹhwa
(Mak 9.41)
40Ohwo rọ reyọ ovwan yọ reyọ ovwẹ, ọ rọ rha reyọ ovwẹ-ẹ, yọ reyọ ọ ro ji vwe rhe na-a. 41Ọ rọ reyọ ọmraro vwẹ odẹ rẹ omraro, ko vwo osa rẹ omraro. Ohwo ro reyọ ọvwata vwẹ odẹ rẹ ọvwata ko vwo osa rẹ ovwata. 42Ohwo ro reyọ uko rẹ ame djidjiro vwọ kẹ ọvo vwẹ imitete mẹ na da vwẹ odẹ rẹ odibo, uyota me ta kẹ ovwan, osa rọye se ghwru-u.
Currently Selected:
Matiu 10: UBV77
Highlight
Share
ਕਾਪੀ।
Want to have your highlights saved across all your devices? Sign up or sign in
Bible in Urhobo © United Bible Societies, 1977.