Izikiẹl 32
32
Uvwerhe kẹ Fẹro
1Vwẹ ukpe rihwivẹ, vwẹ emeranvwe rihwivẹ, vwẹ ẹdẹ rẹ ẹsosuọ rẹ emeranvwe na, ota rẹ Ọrovwohwo de bru vwe rhe. 2Ọmọ rẹ ohwo, teye ugoroviẹ kẹ Fẹro ovie rẹ Ijipt, re wọ ta kẹ.
Wo roro oma wẹn nẹ wẹ okpohrokpo vwẹ ohri rẹ ẹgborho na,
ẹkẹvuọvo wọ họhọ okpodje rode vwẹ evun rẹ abadi;
ku wo muẹ sahra vwẹ evun rẹ urhie wẹn,
wọ me vwẹ awọ wẹn vwo kpogho ame na,
wo mi vwurie urhie rayen.
3E nẹ Ọrovwohwo Ọghẹnẹ tare:
mi phi obriki mẹ rhurhu uwe
kugbe otu rẹ ihwo efa buebu;
ke me vwẹ ughugba mẹ kpono uwe rhe otọ.
4Ke me vwẹ owẹ phiotọ,
vwẹ uphephẹ ghwrọrọ, me kpare owẹ phihọ,
ke me ta kẹ emephran rẹ obenu na nẹ e bọn ẹho phihọ owẹ,
ke me vuẹ eranvwe rẹ akpọ na ejobi nẹ e re o wẹ.
5Ki mi dje we ọkpokpọ phihọ enu rẹ igbenu na,
irivwi rẹ ovwan ke cha vọn iyara na.
6Ke me kpọrhọ otọ na dẹn re te igbenu na
vẹ ọkere rẹ ọbara wẹn;
asan rẹ ame dje wan na ejobi ke vọn vẹ ọbara wẹ.
7Ọke ri mi de phoro uwe nẹ otọ na nu, ki nu rhurhu idjuvwu na
mi mi ru isio rayen bi,
ke me vwẹ egho vwo rhurhu ọnre,
emeranvwe gbi che lo-o.
8Irhukpẹ rẹ obo odjuvwu ejobi ri lo
ki che mu egho rhurhu uwe,
i mi phi ebri phihọ otọ wẹn,
eriyin Ọrovwohwo Ọghẹnẹ tare.
9Ki mi kpokpo udu rẹ ihwo buebu, vwẹ ọke ri mi de mu we ighuvwu vwẹ ohri rẹ ẹgborho na, vwo kpo evun rẹ irho ru wọ je riẹn dẹvo-o. 10Ki mi ru re ofu wẹn dje ihwo buebu, ivie rayen ki guoma fiki wẹ, ri mi de che kpogho ọlọkọ mẹ phihọ ayen ẹro, kẹ ayen che muẹ phariẹ kọke kọke, ayen ọvuọvo fiki rẹ arhọ rọye, vwẹ ẹdẹ rẹ eshe wẹn. 11Kidie enẹ Ọrovwohwo Ọghẹnẹ tare Ọlọkọ rẹ ovie ri Babilọn che bru we cha 12Ki mi ru re ihwo wẹn buebu she vwẹ oma rẹ egba na, ayen ejobi ri me muoshọ vwẹ ohri rẹ ẹgborho na.
Ayen ki hirhe eheri rẹ Ijipt phihọ emu diodi,
ihwo rọye buebu na ejobi ke ghwọrọ kufia.
13Me cha ghwọrọ eranvwe rọye ejobi
re hẹ oma rẹ ame buebu na,
owọ rẹ ohwo ọvuọvo gbi kpokpo ayen ọfa-a,
eyẹ uchukowọ rẹ eranvwe gbi kpokpo ayen ọfa-a.
14Etiyin ki mi ru ame rọye ghroghro
ki mi ru irhie rayen re da djẹ ọkẹre kerẹ evwri,
eriyin Ọrovwohwo Ọghẹnẹ tare.
15Ọke ri mi de ru otọ rẹ Ijipt kua fiotọ
ra da ghwiẹ kemu kemu rẹ otọ na vwori mie,
ọke re me da ghwiẹ ihwo ejobi re dia,
Etiyin ayen ke riẹn nẹ mẹvwẹ Ọrovwohwo na.
16Ọnana kẹ une rẹ oviẹ ra cha viẹ kẹ wẹ, emetẹ rẹ ẹgborho na ye cha suọ, Ijipt vẹ ihwo rọye buebu na, kọye ayen suọ kẹ, eriyin Ọrovwohwo Ọghẹnẹ na tare.
17Vwẹ ukpe rihwivẹ, vwẹ emeranvwe rẹsosuọ, vwẹ ẹdẹ ihwiori rẹ emeranvwe na, ota rẹ Ọrovwohwo de bru vwe rhe. 18Ọmọ rẹ ohwo, beroma kẹ urogho rẹ ihwo rẹ Ijipt, ru wọ vwẹ ayen yanran, te ọye vẹ emetẹ rẹ ẹgborho ride na, vwo kpo akpọ rivẹ, bru ayen re yanran kpo obo Ukpotọ na:
19Ono wo yovwi nọ vwẹ erhuvwu?
Yanran kpotọ, rere wọ vẹ otu rẹ upheruphe na shevwerhẹ te otọ.
20Ayen che she vwẹ uherevie rẹ ihwo rẹ ọlọkọ hweri, te ọye vẹ urogho rọye ejobi ki che she gbunie. 21Ehọvwọre ride na ke ta ota rẹ ayen, vẹ ochuko rayen, nẹ evun rẹ Erivwi rhe. Ayen te obotọ re, ayen shevwerhẹ gbiei, ihwo rẹ upheruphe na, rẹ ọlọkọ hweri na.
22Asiria ọ hẹ etiyin, vẹ otu rọye, ushi rayen riariẹ ayen phihọ, ayen ejobi re hweri, rẹ ọlọkọ hweri, 23ra tọn ushi rayen phihọ obo etan rẹ Ukpotọ na, otu rọye riariẹ ushi rọye phihọ; ayen ejobi re hweri, ra vwẹ ọlọkọ hwe, re vwẹ uguegue muẹ ihwo vwẹ otọ rẹ ihwo ekpokpọ.
24Elam hẹ etiyin vẹ otu rọye ejobi re gba riariẹ ushi rọye; ayen re hweri, ra vwẹ ọlọkọ hwe, re vẹ upheruphe gbe kpo akpọ rẹ obotọ, re vwẹ uguegue muẹ ihwo vwẹ otọ rẹ ihwo ekpokpo, ke ayen ghwa oghwa rẹ omaẹvuọ rayen kugbe ayen ihwo ri kpo obo Ukpotọ 25Ayen so ehwa kẹ vwẹ ohri rẹ
ihwo re hweri vẹ urogho rọye, ushi rayen riarierẹ phihọ. Ayen ejobi upheruphe, rẹ ọlọkọ hweri; oshọ rayen ro asa na ejobi duvwu ayen da ghwa oghwa rẹ omaẹvuọ rayen kugbe otu ri kpo obo Ushi, e de phi ayen kugbe otu ri kpo obo Ushi, e de phi ayen kugbe ohri rẹ ihwo re hweri.
26Meshẹk kugbe Tubal hẹ etiyin, kugbe usun rayen ejobi, ishi rayen riariẹ ayen phihọ, ayen ejobi upheruphe, rẹ ọlọkọ hweri, kidie uguegue rayen ruẹ otọ rẹ akpọ na duvwu. 27Ayen rhe shevwerhẹ kugbe egba ride rẹ awanre re yanran kpo obo Erivwi vẹ ekuakua rẹ ofovwi raye-en, ra vwẹ ọlọkọ rayen cha ayen uyovwi, rẹ ekpọfia rayen hẹ enu rẹ ibeku rayen, kidie uguegue rẹ egba na hẹ evun rẹ otọ rẹ akpọ na. 28Kẹ ọtiọye e che vwirhi uwe ru wo de shevwerhẹ vwẹ ohri rẹ upheruphe, kugbe otu rẹ ọlọkọ hweri.
29Idọm hẹ etiyin, ivie rọye kugbe isun rọye ejobi, e re vwi fiki rẹ ọgba rayen riẹn nene otọ kugbe otu rẹ ọlọkọ hweri; ayen de shevwerhẹ kugbe otu rẹ upheruphe, kugbe otu re yanran kpo obo Ukpotọ.
30Isun rẹ obọhwẹre ọnre hẹ etiyin, ayen ejobi, kugbe ihwo ri Sidọn, re yanran vẹ omaẹvuọ kpọ ughwu, fiki rẹ uguegue rẹ ẹgba rẹ ayen, ayen da riẹn nene otọ vẹ upheruphe kugbe ayen otu rẹ ọlọkọ hweri, ayen da ghwa oghwa rẹ omaẹvuọ rayen kugbe ayen otu re yanran kpo obo Ukpotọ na.
31Ọke ri Fẹro da mrẹ ayen, ko bru oma rọye uche fiki rẹ usun rọye, Fẹro kugbe unuofovwi rọye, rẹ ọlọkọ hweri, eriyin Ọrovwohwo Ọghẹnẹ tare. 32Kidie ọ djẹ uguegue mu ihwo rẹ otọ rẹ ihwo ekpọkpọ, fiki rẹ ọtiọye na ke che vwo shevwerhẹ vwe ohri rẹ upheruphe, vwo kugbe ihwo rẹ ọlọkọ hweri, Fẹro kugbe usun rọye, eriyin Ọrovwohwo Ọghẹnẹ tare.
Currently Selected:
Izikiẹl 32: UBV77
Highlight
Share
ਕਾਪੀ।
Want to have your highlights saved across all your devices? Sign up or sign in
Bible in Urhobo © United Bible Societies, 1977.