MALEKO 16
16
Ko te Toetu
(Mata 28.1-8; Luka 24.1-12; Ioa 20.1-10)
1Mai tua ifo o te Sapati, a Malia te Makatala, Malia te matua o Iakopo mo Salome, ne 'togi olotou sinu ma'nogi o olo o 'mili te foitino o Iesu. 2I te taeao pogipogi eiloa i te Aso Tapu o te vaiaso, i te saega o te la, ne olo latou ki te tanuga. 3I te lotou ologa, ne fai ake olotou muna penei, “Ko oi ka fakatakafili ne ia te fatu mai te gutu o te tanuga mō tatou?” 4Se fatu lasi eiloa. Ne fakapela ake olotou mata, matea atu ei ne latou i te fatu ko oti ne fakatakafili keatea mai te tanuga. 5Ulu atu ei latou ki loto i te tanuga, matea atu ei ne latou te tamataene e sagasaga mai i te feitu fakaatamai, kae pei mai ki gatu kena, ka ko oko eiloa i te ma'taku. 6Ne fai mai a te tino tena ki a latou, ana muna, “Sa ma'taku. A koutou e 'sala ki a Iesu te Nasaleta tela ne fakasataulo. E se i konei a ia, ko oti ne toetu! Kiloke, tenei te koga ne fakatakato ei ne latou tena foitino. 7#Mata 26.32; Male 14.28Olo nei o taku atu ki ona soko pela foki mo Petelu, a te fekau tenei: ‘Ko mua atu a ia i a koutou ki Kalilaia; ka fetaui koutou mo ia i kona, e pela eiloa mo ana muna ne fai atu.”’ 8Olo ei ki tua latou mai te tanuga kae 'tele keatea, i te mea ko oko eiloa i te lotou ma'taku. E seai eiloa se tino e faipati ki te sua tino ona ko te ma'taku.
Ko Fakaasi atu a Iesu ki a Malia te Makatala#16.8: I naai lomiga, pela foki mo lomiga taumua e seai se fakaotiga o te Evagelia (foaitau e 9-20).
(Mata 28.9-10; Ioa 20.11-18)
9I te tafataeao eiloa i te aso muamua o te vaiaso, i te otiga ne toetu a Iesu mai te mate, ne muamua eiloa a ia o fakaasi atu ki a Malia te Makatala, ko ia tena ne tuli ne Iesu keatea a temoni e tokofitu mai i a ia. 10Ne fanatu a ia o taku atu ki ona takaga, kola e 'tagi kae fanoa'noa; 11kae i te lotou lagonaga i a Iesu ko toe ola, ka ko oti foki ne matea ne ia, ne se tali'tonu ki a ia.
Ko Fakaasi atu a Iesu ki Soko e Tokolua
(Luka 24.13-35)
12Mai tua ifo, ne fakaasi atu a Iesu i se tulaga 'kese ki te tokolua soko, i te la auala i te vao. 13Ne 'foki mai laua kae tala atu ki nisi tino, kae ne se tali'tonu a latou ki ei.
Ko Fakaasi atu a Iesu ki te Tinoagafulu mo te Tokotasi
(Mata 28.16-20; Luka 24.36-49; Ioa 20.19-23; Galu 1.6-8)
14Fakamuli ifo, ne fakaasi atu a Iesu ki te tinoagafulu mo te tokotasi soko ka koi 'kai latou. Ne kote ne ia latou ona ko te se fakatuanaki, mo te loto make'ke o se talitonu ki tala a tino kola ne matea ne latou a ia ko toetu. 15#Galu 1.8Ana muna ki a latou: “Olo ki te lalolagi katoa, kae folafola atu te tala 'lei ki tino katoa. 16So se tino e talitonu kae papatisogina a ia, e fakaolagina; ko te tino e se talitonu e se fakaolagina. 17A tino talitonu, e tuku atu ki a latou a te fakailoga tenei o te mana: e 'tuli ne latou keatea a temoni i toku igoa; e fai'pati foki latou ki 'gana kesekese kola e se iloa ne latou; 18kafai e puke ki gata io me inu ki se mea poisini, e seai ne fakalavelave e 'tupu ki a latou; e tuku olotou lima i luga i tino masaki kae 'lei mo tino ma'saki.”
Ko Avake a Iesu ki te Lagi
(Luka 24.50-53; Galu 1.9-11)
19 #
Galu 1.9-11
I te otiga a te Aliki ko Iesu ne fai'pati mo latou, avake ei a ia ki te lagi, kae fakanofo i te feitu taua o te Atua, tela ko te feitu fakaatamai. 20Ne olo sale a soko o folafola i so se koga a te tala 'lei, kae ne ga'lue eiloa latou mo te Aliki, kae ne fakamaonia foki ne ia me tonu te lotou folafolaga, i te tuku atu ne ia ki a latou a fakailoga o te mana.)#16.20: I nisi lomiga e pela foki mo lomiga taumua e isi se fakaotiga toetoe ki te Evagelia o fakaopoopo ki te fakaotiga loa i te (foaitau e 9-20).
Currently Selected:
MALEKO 16: Tusi Tapu
Highlight
Share
ਕਾਪੀ।
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific