MALEKO 15
15
Ko Iesu i Mua o Pilato
(Mata 27.1-2,11-14; Luka 23.1-5; Ioa 18.28-38)
1I te taeao pogipogi eiloa, ne fono fakavave a faitaulaga sili mo toeaina, pela foki mo faiakoga o te Tulafono, mo te Fono katoa o fai olotou aofaga. Ne saisai ne latou a Iesu ki seni, puke kae takitaki atu ki a Pilato. 2Ne fesili mai a Pilato ki a ia: “A koe ko te Tupu o tino Iutaia?” Ne tali atu a Iesu, “E pena eiloa mo au muna.” 3Ne fai a mau e uke a faitaulaga sili e uiga ki a Iesu, 4tela, toe fesili mai ei a Pilato ki a ia: “E seai sau tali ki ei? Kiloke i te uke o mau e 'moli mai ei koe ne latou!” 5E seai eiloa se tali a Iesu ne fai ki ei, ka ko ofo masei a Pilato i ei.
Ko Fakasala a Iesu ki te Mate
(Mata 27.15-26; Luka 23.13-25; Ioa 18.39—19.16)
6I taimi katoa o te 'Kaiga o te Paseka, e masani Pilato o fakasaoloto ne ia a te pagota e ma'nako ki ei a tino. 7I te taimi tena, e isi se tino e igoa ki a Palapa e pei i loto i te fale puipui mo tino tatino kola ne tatino i te taimi ne taua ei tino o 'teke ki te malo. 8I te taimi ne maopoopo ei a te kau tena, fai atu ei latou ki a Pilato ke fai ake te lotou loto. 9Ne fai atu a Pilato ki a latou: “E ma'nako koutou ke fakasaoloto atu ne au ki a koutou a te tupu o tino Iutaia?” 10E iloa 'lei eiloa ne ia i faitaulaga sili, me ko oti ne tuku atu ne latou a Iesu ki a ia, ona ko te loto masei. 11Ka ko faitaulaga sili ne fakamakosu ne latou a te vaitino ke 'tala mai a Palapa ki a latou, kae se ko Iesu. 12Ne faipati atu a Pilato ki te vaitino: “Se a te mea e loto koutou ke fai ne au ki te tino tenei, e fakaigoa ne koutou ko te tupu o tino Iutaia?” 13Ne toe ka'laga mai, “Fakasataulogina!” 14Muna a Pilato, “Kae se a la tena sala?” Ka ko na paka'laga ei latou ki luga, “Fakasataulogina.” 15Ko manako a Pilato o fakamalie a loto o tino, tela 'tala atu ei ne ia a Palapa ki a latou. Kae tuku atu ne ia ke kini a Iesu kae tuku atu ke fakasataulo.
Ko Faifai Muna a Sotia ki a Iesu
(Mata 27.27-31; Ioa 19.2-3)
16Ne ave ne sotia a Iesu ki loto i te lotoa o te fale o te Kovana, kae fakamaopoopo fakatasi a te kau katoa. 17Ne fakapei ne latou a Iesu ki te gatu kula, ko te gatu o te tupu, kae fai ne latou a te foualiki mai lakau makai'kai, kae tuku atu ki luga i te ulu o Iesu. 18Kamata ei latou o faifai muna ki a ia, olotou muna, “Ke manuia te tupu o tino Iutaia!” 19Kae ne pagopago ne latou a tona ulu ki te lakau, puapuaki ki ei, ne totuli ifo foki o fakaalo ki a ia. 20I te otiga ne fakatauemu ki a ia, toe tapale ei ne latou te gatu kula, kae toe fakapei ona gatu. 'Taki ei ne latou ki tua o te fa'kai o fakasataulo a ia.
Ko Fakasataulo a Iesu
(Mata 27.32-44; Luka 23.26-43; Ioa 19.17-27)
21 #
Loma 16.13
I te lotou ologa, ne fetaui latou mo te tagata e igoa ki a Simona, tela e vau mai te vao o fano ki te fa'kai, fakamalosi ei ne latou ke amo ne ia te sataulo o Iesu. A Simona tenei se tino Kulene, ko te tamana o Alesana mo Lufo. 22Ne aumai ne latou a Iesu ki Kolokota, ko tona uiga “Ko te Koga o Gatiulupoko.” 23Ne taumafai latou o tuku atu ki a ia a te uaina e palu mo te vailakau e igoa ki te mulo, ka ko te mea e se inu ki ei a Iesu. 24#Sala 22.18 Ne fakasataulo ne latou a ia kae tufatufa ona gatu ia latou, kae fai te vili ke iloa me tefea tonu te vaega o te tino e 'tau o maua ne ia. 25Ko te iva i te taeao ne fakasataulo ei ne latou a Iesu. 26Ne tusi foki a muna kola ne ala ei a ia o fakasataulo, “Ko te Tupu o tino Iutaia.” 27Ne fakasataulo foki ne latou a te tokolua tino faomea. E tokotasi i tona feitu fakaatamai kae tokotasi i tona feitu fakamaui.#15.27: I nisi lomiga e fakaopoopo te foaitau e 28: I te faiga tenei ne fakataunu ei a muna a te tusi tapu penei, “A ia ka kau fakatasi ki fakasalaga o pagota” (onoono ki te Luka 22.37). 28#Isa 53.12(Ko taunu ei a muna a te Tusi penei: “Ko aofia foki a ia ki tino faomea.”)
29 #
Sala 22.7; 109.25;
Male 14.58; Ioa 2.19 A tino ne 'tipa ake i kona, ne tugakigaki olotou ulu, kae pati fakatauemu ki a Iesu: “Ko koe tela ne fai ke ofa ne koe te Fale Tapu, kae toe faite i aso e tolu! 30Fanaifo ki lalo mai te sataulo o fakasao koe!” 31Ne fakatauemu foki a faitaulaga sili mo faiakoga o te Tulafono ki a Iesu, olotou muna i a latou eiloa: “Ne fakaola ne ia a tino, kae se maua ne ia o fakaola a ia! 32Ke onoono ake tatou ki te Keliso, ko te tupu o Isalaelu, ke fanaifo nei ki lalo mai te sataulo, ko talitonu ei tatou ki a ia!” Ne faifai muna se 'tau foki ki a Iesu a te ava tokolua kola ne fakasataulo fakatasi mo ia.
Ko te Mate o Iesu
(Mata 27.45-56; Luka 23.44-49; Ioa 19.28-30)
33I te tutonu ne pouli katoa te fenua e tusa mo te tolu itula. 34#Sala 22.1 I te itula e tolu, ne tagi pakalaga a Iesu penei, “Eloi, Eloi, lama sapakatani?” Ko tona uiga, “Toku Atua, toku Atua, ai a ko tiaki mai ei au ne koe?” 35A nisi kola ne i kona ne lagona ne latou ana pati, fai ake ei latou, “Faka'logo ake, ko kalaga ki a Elia!” 36E isi se tino o latou ne tele atu ki ei mo te omomi, faka'siu ki te uaina, kae tuku ki te mata o te lakau, kae tuku atu ki laugutu o Iesu, kae fai ake, “Faka'tali, ke onoono ake tatou me e vau a Elia o aveifo a ia ki lalo mai te sataulo me ikai!” 37Ne tagi pakalaga a Iesu, ko te mea eiloa ko mate.
38 #
Eso 26.31-33
A te laugatu o te 'pui tela e tautau i te Fale Tapu, ne masaelua mai luga i ki lalo. 39A te ofisa o te kautau tela ne tu i mua o te sataulo, ne matea ne ia te tagi pakalaga o Iesu kae mate, kae fai ake ana muna,#15.39: ko mate; i naai lomiga e isi a muna konei ne tagi pakalaga ki luga ko te mea loa ko mate. “A te tagata tenei, ko te Tama eiloa a te Atua!” 40#Luka 8.2,3 E isi foki ne fafine ne i kona, ne tu'tu mao mai. E iai i a latou kona ko Salome, Malia te Makatala, mo Malia te matua o Iakopo foliki mo Iose. 41Ne tau'tali latou i a Iesu i tena nofoga i Kalilaia, kae ne fesoasoani malosi ki a ia. E tokouke ake foki a nisi fafine ne i kona, kola ne o'mai fakatasi mo ia ki Ielusalema.
Ko te Tanuga o Iesu
(Mata 27.57-61; Luka 23.50-56; Ioa 19.38-42)
42Ko fano eiloa o po kae oko mai a Iosefa te Alimataia. 43A ia se tino o te Fono kae lasi tona fakaaloalogina, kae nofo fakatalitali ki te oko mai o te Malo o te Atua. A te Aso tenei ko te Aso Fakatoka, ko te aso tena mai mua o te Sapati, fanatu ei a Iosefa ki mua o Pilato, kae fakamolemole ki te foitino o Iesu. 44Ne ofo Pilato o fakalogo i a Iesu ko leva ne mate. Ne kalaga atu a ia ki te ofisa o te kautau kae fai atu ki ei, me ko Iesu ko leva ne mate me ikai. 45I te otiga a Pilato ne fakalogo ki te lipoti, fai atu ei a ia ki a Iosefa me ko mafai ne ia o puke te foitino o Iesu. 46Ne 'togi ne Iosefa te sulukafu lino, tuku ifo ne ia te foitino, kofu ne ia ki te sulukafu, kae tuku ne ia i te tanuga ne tuki i kaupapa. Fakatakapili ei ne ia te fatu lasi ki te gutu o te tanuga. 47A Malia te Makatala mo Malia te matua o Iose ne kilo'kilo atu ki a ia, kae ne matea foki ne laua a te koga ne fakatakato ei a te foitino o Iesu.
Currently Selected:
MALEKO 15: Tusi Tapu
Highlight
Share
ਕਾਪੀ।
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific