NASEPTE 19
19
Paul Ephesa khua ah
1Tualeh hichi ahung hi a, Apollo Korin khua a aom sungin Paul in khuasak lam tuansuak jouin Ephesa khua a hungtung a, tualeh nungjui kuate hiam amu a 2aman akiang uah, “Na gintat tu`nglai un Khasiangthou natang uai?” achi a.
Amau`n akiang ah, “Khasiangthou aom chih zong ka jakha ngai mawng mawng kei uhi,” achi ua.
3Tuachi`n, aman akiang uah, “Ahihleh nou bang baptisma ahia natan uh?” achi a,
Amau`n, “Johan baptisma,” achi uhi.
4Tuachi`n Paul in, “Johan in mi kiang ah anung a hungpai ding Jesu Krist na gintat ding uh ahi, chi`n kisikna baptisma in a baptis jel hi,” achi hi. #Mat. 3.11; Mrk. 1.4,7,8; Luk. 3.4,16; Jhn. 1.26,27.
5Amau`n hih thu ajaktak un, Toupa Jesu min in baptisma atangta uhi. 6Tualeh Paul in atung uah akhut a nga a, Khasiangthou atung uah a hungtungta a, ham theihlouh in ahung hamta ua, thu a genta uhi. 7Tualeh aun un mi sawm leh nih ahi uhi.
8Tualeh Paul kikhopna inn ah alut a, khathum sung ding hangsan takin thu agen a, Pasian gam lam thu ngaihsun in, mi kun in athuzohjel hi. #19.8 Kun= utsak sawm a va houlim pih. 9Hinanleh khenkhat aphengphi ua, agingta ut kei ua, mipi mai a hua lam agensiat tak un, amauh apaisan a, nungjuite apaipih tuam a, Tairanna kichi siamsinna inn ah niteng in a houlim pihta hi. 10Tualeh hichi bangin kumnih sung a om a, tuachi`n Asia gam a om jousiah Judate leh Grikte`n zong Toupa Jesu thu ajata uhi.
Skeva tate
11Tualeh Pasian in Paul khut in sillamdang taktakte abawlsak a. 12Tuachi`n a satung a kipat in kinawtna puan hiam, puantualte hiam damloute kiang ah ahung tawi ua, a natnate uh adam jel a, tualeh asung ua dawite zong apawt jel hi. 13Tuachi`n Judami khualjin kawikawi dawithu thei kuate hiam in, “Paul in athu atang koupihjel Jesu min in kung vau uhi, chi`n dawipaite tungah Toupa Jesu min alou vial ua.” 14Tualeh Judami siampi khat Skeva in huachibang bawl tapa sagih anei hi.
15Hinanleh dawiin adawng a, “Jesu ka thei hi, Paul zong ka thei hi, hinanleh nou kuate nahi ua?” achi hi.
16Tuachi`n dawipaiin amauh ahung bawh a, ajou a, anuaisiahta a, tuachi`n hua inn a pat guaktang leh liam in a taikhiata hi. 17Tualeh hihthu Ephesa khua a teng jousiah, Judate leh Grikte kiangah zong athangta a, tualeh aun un alau ua, Toupa Jesu min alianta hi. 18Tualeh agingtate zong tamtak a hungpai ua, a silbawlte uh thupha atawi ua, aki phuangta uhi. 19Mitphial dawi tawi tampi`n zong alaibute uh ahung tawikhawm ua, mijousiah mitmuh in ahalta ua, tualeh aman atuat ua, daan dangka tang sang sawmnga bang a phasak uhi. 20Tuachi`n thupitakin Toupa thu ajaakta a, agualjou jel hi.
Ephesa khua a buaina
21Hua silte nungin Paul in a lungsim in, Mesidonia gam leh Akhaia gam a tawtsuak zoh chiang a Jerusalem khua a pai asawm a, “Huasan a ka paizoh chiangin, Rom khua zong kava mu teitei ding,” achi hi. 22Tuachi`n a sepkhawmpih minih Timothi leh Erasta pen Mesidonia gam ah asawl a, hinanleh amah Asia gam ah hun tomkhat aom tadih hi.
23Tualeh hualai velin Toupa lampi thu in mi ahahbuai mahmah ua. 24Ajiak mikhat amin Demetria, dangka sik khengtu, daan dangka sik a Diana lim bawltu in khutsiamte kiang ah kilawhna tampi apiajel hi. 25Huapa`n amauh asam khawm a, anasep bang uh semte tawh, tuachi`n akiang uah, “Pute aw hih nasepna pen ihauhna uh ahi, chih nathei uhi. 26Hih Ephesa khua guak ah hilou in, Asia gam pumpi ah zong hih Paul in khut a bawlte pen Pasian ahi kei uh chi`n mi tampi athuzoh a, aki heisak jouta hi chih noumah ngeiin na mu un na ja uhi. 27Tuachi`n, ikivaina uh bang mahlou ahung suak ding guak lauhuai hilou in, pasiannu thupi diana biak inn zong ahung ki ngaineu ding a. Tualeh Asia gam pumpi leh leitung pumpi a mi`n abiak uh amahnu ngei zong athupina suksiat in ahung om kha ding chih alauhhuai hi!” achi hi. 28Tualeh hua thute ajaktak un aheh mahmah ua. “Ephesamite diana athupi hi!” chi`n aki kou uhi. #19.28 Diana (Latin ham) Artemis (Grik ham) Ephesamite pasian khat ahi. 29Tuachi`n akhua pumpi in a buaisiangta ua, Gaia leh Aristarkha, Mesidonia gam a mi, Paul in a khualzinna a azohpih tegel aman ua, kituak takin etnop bawlna inn ah atai lutpihta uhi. 30Tuachi`n Paul in mipi lak a lut atup leh a nungjuite`n aphal kei ua. 31Tualeh Asia gam lamkai liante lak a Paul lawmte khenkhat in akiang ah mi asawl a, etnawp inn a lut mawng mawng lou dingin a ngen ngen uhi. 32Khenkhat thukhat in aki kou ua, khenkhat thudang in aki kou ua, kikhawmte abuai ua, mi tamjaw in aki khopna san uh zong athei kei uhi. 33Tualeh mipi lak a pat Aleksander akai khia ua, Judate`n amah mi mailam ah asawn ua, tualeh Aleksander in akhut in ajap a, mi jousiah kiang ah adikna thu gen asawm hi. 34Hinanleh amah Judami ahi chih atheihtak un, dakkal nih sung ding bang aw kituak takin, “Ephesamite diana thupi hi!” chi`n aki koukou uhi.
35Tualeh khuasung laigelhtu in mipi adaihsak zoh in, “Nou Ephesa khua a mite!” “Ephesate hih pasiannu diana thupi leh jupiter a pat hung kia milim bia ahi uh, chih theilou kua aom a. 36Tuachi`n hihthu nialgual ahihlouh nungin, nadaih khinkhian ding uh ahi, kinoh hehu a bangmah na bawllouh ding uh ahi. 37Ajiak hih nung mipuite uh biak inn luhmi lah ahi kei ua, na pasiante uh gensiate zong ahi kei uhi. 38Demetria leh azohpih khutsiamten mi kua tung hiam a thubuai aneih uleh, thubuai genna inn honsa in a om hi, tualeh gam uktute zong aom uhi, kihek uh hen. 39Hinanleh, sildang buaina naneih mawng uh ahihleh dan bang a kikhopna inn ah lepding ahi. 40Tunia buaina jiakin itung ua thu ahung om ding lauhuai hi, i kikhopna san pen lah hih ahi chihding lah aom ngal kei a,” achi hi. 41Tualeh aman huachi a thu agen zoh in kikhawmte atawpsakta hi.
Currently Selected:
NASEPTE 19: THKHBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Thangkhal NT - Thukhun Thak
Copyright © 2014 by The Bible Society of India
Used by permission. All rights reserved worldwide.
