Zakareya 8
8
Enyɛnpe Ebɔrɛ na ka nase kɔnɔ fanɛ e ka beeŋ naŋ nɛfa Jerusalɛm be asheŋ
1Ade kikɛ be kaman nɛ Enyɛnpetale Ebɔrɛ na naŋ ta kubɔya ere n sa ma, Zakareya. 2E yɛ: “Ŋ ka bee sha Jerusalɛm nɛ kumo to be basa alegaiso so, bumo doŋana be asheŋ bee nu ma agbo nna. 3Meeŋ naŋ bɛta m ba chena Zayɔn be kebee na so ashi Jerusalɛm to. Aloŋ nɛ ekama beeŋ pin fanɛ Jerusalɛm la ma beyirdapo be kadegboŋ nna nɛ Zayɔn malɛ la ma kebee cheembi. 4Basa belso nɛ baa keta akpabi a nite beeŋ naa gama a chena abar so ashi Jerusalɛm to 5nɛ mbinyɛnsobi nɛ bechesobi malɛ e sɔ agbembi so a pel.
6Kumo be kaman nɛ Enyɛnpe Ebɔrɛ na naŋ kaŋɛ: Basa nɛ baaŋ ka efuli na so beeŋ baa fɛ fanɛ loŋ maaŋ tiŋ n wora, ama kumo be kewora maŋ du ma so kpakpa. 7Meeŋ mɔlga ma basa ashi efuliana nɛ a wɔ epeŋilarkpa nɛ epeŋitɔrkpa na 8nseŋ bɛta bumo m ba chena Jerusalɛm to. Baaŋ ba kaa la ma basa nɛ ma alɛ e baa la bumo be Ebɔrɛ nsaa ji kuwura bumo so kashenteŋ nɛ kumo be ekpa so.”
9Kusɔ nɛ Enyɛnpetale Ebɔrɛ na naŋ kaŋɛ nde: “Mmalga nɛ ma anebiana na daŋ malga jemanɛ nɛ b daa tɔl ma bɔrɛlambu na be gbaltɔlase na nɛ menyee nu na, amoso men baa kɔ kenyɛn nsaa maa pɔ aba. 10Pɔɛŋ nɛ b pɔr bɔrɛlambu na nɛ esa kikɛ daa maa kɔ amansherbi nɛ e tiŋ m ber basa paa ŋko n haya asɔbɔya nɛ b shuŋ n sa mo. Esa kama malɛ daa maa tiŋ a kuŋ mbe kumu ashi mo doŋana be enɔ to. N daŋ shin nna nɛ basa fɛaŋ abar so a wɔtɔ nna. 11Ama naniere bre, m maaŋ naŋ gberge menyi basa gbrɛbi nɛ men ka ere kusoe fanɛ kananɛ n daŋ wora bedarapo na jemanɛ nɛ k choŋ na. 12Meeŋ shin nɛ men dɔ n duu menyi be asɔduuso kayurwushiso. Menyi be afeelebi nɛ e bee sɔr asɔrso nɛ baa tre greeps na beeŋ sɔr nɛnɛ, nɛ bɔrɛ e ba ga nɛ men be kasawule e wora adɔjibi nɛnɛ. Ma efuli so be basa nɛ baaŋ ji efute na nɛ meeŋ nɛfa le be ekpa so. 13Efuli pɔtɛana be basa bee shoduu menyi Juda nɛ Israɛl be efuliana so ebi nna, ama meeŋ mɔlga menyi nseŋ shin nɛ men ki nɛfa be basa. Men baa kɔ kenyɛn nsaa maa lɔ kufu.”
14Ade be kaman nɛ Enyɛnpetale Ebɔrɛ na naŋ kaŋɛ: “Men nanaana ka daŋ shin nɛ n nya agbo na, n daŋ kre fanɛ meeŋ shin nɛ b ji jɛrbi nna nseŋ shin nɛ loŋ wora. 15Ama naniere mee kre kenɛfa Jerusalɛm to nɛ Juda be efuli so ebi nna. Amoso men sa maa lɔ kufu. 16Asɔ nɛ a daga fanɛ men baa wora e la kebaaji abar kashenteŋ nsaa ji asheŋ nɛ amo be ekpa so ashi menyi be demujikpaana saŋɛ na so kayurwushi beeŋ baa wɔ menyi to. 17Men sa maa kre kebaawora abar kulubi. Men sa maa bɔ ntaŋ a ji efɛ be eshɛda. Ŋ kishi le be alubiana ere kikɛ nna.”
18Kumo be kaman nɛ Enyɛnpetale Ebɔrɛ na naŋ kaŋɛ ma fanɛ ŋ kaŋɛ le. 19E yɛ: “Ekishi nɛ menyee kishi kufɔl nasopo nɛ kenusopo nɛ keshunusopo nɛ kudusopo to na beeŋ ki kayurji nɛ kagbenefuli be nchɛgboŋ n sa Juda be efuli so ebi. Amoso a daga fanɛ men baa sha kashenteŋ nɛ kayurwushi.”
20Kede be kaman nɛ Enyɛnpetale Ebɔrɛ na naŋ kaŋɛ: “Jemanɛ ko bee ba nɛ basa damta e shi efuli pɔtɛana so be ndegboŋ damta to m ba Jerusalɛm to. 21Bumo nɛ b shi kadegboŋ koŋwule to beeŋ kaŋɛ abar le: ‘Anyee yɔ nna nɛ an ya bunyaŋ Enyɛnpetale Ebɔrɛ na nseŋ kule mo nɛ e nɛfa anyi. Amoso men ba nɛ an yɔ!’ 22Basa damta beeŋ shi efuligboŋana so m ba Jerusalɛm to m ba bunyaŋ Enyɛnpetale Ebɔrɛ na nseŋ kule mo fanɛ e nɛfa bumo. 23Loŋ be jemanɛ na so, eyiri pɔtɛ nɛ efuli pɔtɛana so be basa kudu beeŋ pɛ Israɛl be esa koŋwule be kale to nsaa kaŋɛ mo le: Shin nɛ an bɛ fo so a yɔ, ŋkpal manɛ so, an nu fanɛ Ebɔrɛ wɔ men kutɔ nna.”
Currently Selected:
Zakareya 8: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation
Zakareya 8
8
Enyɛnpe Ebɔrɛ na ka nase kɔnɔ fanɛ e ka beeŋ naŋ nɛfa Jerusalɛm be asheŋ
1Ade kikɛ be kaman nɛ Enyɛnpetale Ebɔrɛ na naŋ ta kubɔya ere n sa ma, Zakareya. 2E yɛ: “Ŋ ka bee sha Jerusalɛm nɛ kumo to be basa alegaiso so, bumo doŋana be asheŋ bee nu ma agbo nna. 3Meeŋ naŋ bɛta m ba chena Zayɔn be kebee na so ashi Jerusalɛm to. Aloŋ nɛ ekama beeŋ pin fanɛ Jerusalɛm la ma beyirdapo be kadegboŋ nna nɛ Zayɔn malɛ la ma kebee cheembi. 4Basa belso nɛ baa keta akpabi a nite beeŋ naa gama a chena abar so ashi Jerusalɛm to 5nɛ mbinyɛnsobi nɛ bechesobi malɛ e sɔ agbembi so a pel.
6Kumo be kaman nɛ Enyɛnpe Ebɔrɛ na naŋ kaŋɛ: Basa nɛ baaŋ ka efuli na so beeŋ baa fɛ fanɛ loŋ maaŋ tiŋ n wora, ama kumo be kewora maŋ du ma so kpakpa. 7Meeŋ mɔlga ma basa ashi efuliana nɛ a wɔ epeŋilarkpa nɛ epeŋitɔrkpa na 8nseŋ bɛta bumo m ba chena Jerusalɛm to. Baaŋ ba kaa la ma basa nɛ ma alɛ e baa la bumo be Ebɔrɛ nsaa ji kuwura bumo so kashenteŋ nɛ kumo be ekpa so.”
9Kusɔ nɛ Enyɛnpetale Ebɔrɛ na naŋ kaŋɛ nde: “Mmalga nɛ ma anebiana na daŋ malga jemanɛ nɛ b daa tɔl ma bɔrɛlambu na be gbaltɔlase na nɛ menyee nu na, amoso men baa kɔ kenyɛn nsaa maa pɔ aba. 10Pɔɛŋ nɛ b pɔr bɔrɛlambu na nɛ esa kikɛ daa maa kɔ amansherbi nɛ e tiŋ m ber basa paa ŋko n haya asɔbɔya nɛ b shuŋ n sa mo. Esa kama malɛ daa maa tiŋ a kuŋ mbe kumu ashi mo doŋana be enɔ to. N daŋ shin nna nɛ basa fɛaŋ abar so a wɔtɔ nna. 11Ama naniere bre, m maaŋ naŋ gberge menyi basa gbrɛbi nɛ men ka ere kusoe fanɛ kananɛ n daŋ wora bedarapo na jemanɛ nɛ k choŋ na. 12Meeŋ shin nɛ men dɔ n duu menyi be asɔduuso kayurwushiso. Menyi be afeelebi nɛ e bee sɔr asɔrso nɛ baa tre greeps na beeŋ sɔr nɛnɛ, nɛ bɔrɛ e ba ga nɛ men be kasawule e wora adɔjibi nɛnɛ. Ma efuli so be basa nɛ baaŋ ji efute na nɛ meeŋ nɛfa le be ekpa so. 13Efuli pɔtɛana be basa bee shoduu menyi Juda nɛ Israɛl be efuliana so ebi nna, ama meeŋ mɔlga menyi nseŋ shin nɛ men ki nɛfa be basa. Men baa kɔ kenyɛn nsaa maa lɔ kufu.”
14Ade be kaman nɛ Enyɛnpetale Ebɔrɛ na naŋ kaŋɛ: “Men nanaana ka daŋ shin nɛ n nya agbo na, n daŋ kre fanɛ meeŋ shin nɛ b ji jɛrbi nna nseŋ shin nɛ loŋ wora. 15Ama naniere mee kre kenɛfa Jerusalɛm to nɛ Juda be efuli so ebi nna. Amoso men sa maa lɔ kufu. 16Asɔ nɛ a daga fanɛ men baa wora e la kebaaji abar kashenteŋ nsaa ji asheŋ nɛ amo be ekpa so ashi menyi be demujikpaana saŋɛ na so kayurwushi beeŋ baa wɔ menyi to. 17Men sa maa kre kebaawora abar kulubi. Men sa maa bɔ ntaŋ a ji efɛ be eshɛda. Ŋ kishi le be alubiana ere kikɛ nna.”
18Kumo be kaman nɛ Enyɛnpetale Ebɔrɛ na naŋ kaŋɛ ma fanɛ ŋ kaŋɛ le. 19E yɛ: “Ekishi nɛ menyee kishi kufɔl nasopo nɛ kenusopo nɛ keshunusopo nɛ kudusopo to na beeŋ ki kayurji nɛ kagbenefuli be nchɛgboŋ n sa Juda be efuli so ebi. Amoso a daga fanɛ men baa sha kashenteŋ nɛ kayurwushi.”
20Kede be kaman nɛ Enyɛnpetale Ebɔrɛ na naŋ kaŋɛ: “Jemanɛ ko bee ba nɛ basa damta e shi efuli pɔtɛana so be ndegboŋ damta to m ba Jerusalɛm to. 21Bumo nɛ b shi kadegboŋ koŋwule to beeŋ kaŋɛ abar le: ‘Anyee yɔ nna nɛ an ya bunyaŋ Enyɛnpetale Ebɔrɛ na nseŋ kule mo nɛ e nɛfa anyi. Amoso men ba nɛ an yɔ!’ 22Basa damta beeŋ shi efuligboŋana so m ba Jerusalɛm to m ba bunyaŋ Enyɛnpetale Ebɔrɛ na nseŋ kule mo fanɛ e nɛfa bumo. 23Loŋ be jemanɛ na so, eyiri pɔtɛ nɛ efuli pɔtɛana so be basa kudu beeŋ pɛ Israɛl be esa koŋwule be kale to nsaa kaŋɛ mo le: Shin nɛ an bɛ fo so a yɔ, ŋkpal manɛ so, an nu fanɛ Ebɔrɛ wɔ men kutɔ nna.”
Currently Selected:
:
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation