Zakareya 7
7
Enyɛnpe Ebɔrɛ na ka maa sha ekishi nɛ k maŋ shi kagbene to be asheŋ
1Ewurgboŋ Dariɔs ka ji Pɛshiya be efuli so be kuwura be kafɛ nasopo to be kufɔl kpanusopo nɛ baa tre Keslɛv na be kachɛ nasopo to nɛ Enyɛnpe Ebɔrɛ na ta kubɔya n sa ma, Zakareya. 2Bɛtɛl be kade to ebi daŋ shuŋi Shareza nɛ Regɛm-Mɛlɛk nɛ bumo be benyɛn ko nna fanɛ b yɔ Enyɛnpetale Ebɔrɛ na be bɔrɛlambu to n ya kule Enyɛnpe Ebɔrɛ be nɛfa n sa bumo 3nseŋ naŋ bishi bɔrɛmatapoana na nɛ anebiana na le be kesheŋ bishiso ere: “An baa kraa shu nli nsaa kishi kufɔl nusopo na to fanɛ kananɛ an wora nfɛ damta ŋkpal b ka daŋ bure bɔrɛlambu na so a?”
4Ndoŋ nna nɛ Enyɛnpetale Ebɔrɛ na ta kubɔya ere n sa ma. 5E yɛ: “Kaŋɛ efuli na so ebi nɛ bɔrɛmatapoana na fanɛ mannɛ ma ere be kemaŋkura so nɛ b daa kishi nsaa shu nli kufɔl nusopo nɛ keshunusopo na to nfɛ adushunu nɛ a choŋ na. 6B ka daa ji a nuu na bre ma so nɛ b daa wora loŋ a?”
7Kubɔya koŋwule ere nɛ Enyɛnpe Ebɔrɛ na daŋ bɔla anebi juŋkparsoana na so m bɔ n sa basa nɛ b daa wɔ Jerusalɛm nɛ nde nɛ a kulti kumo na to saŋɛ nɛ b daŋ dii dama nsaa wɔ kayurwushi to na. Loŋ be jemanɛ na, basa damta daŋ chena kelargato be kaseto be keshishɛrsawule na nɛ abeesawule nɛ a wɔ epeŋitɔrkpa be kaba so na so nna.
Kusoe kpakpaso ka bar basa be kepɛ n yɔ efuli pɔtɛ so be asheŋ
8Ade be kaman nɛ Enyɛnpe Ebɔrɛ na naŋ sa ma le be kubɔya ere. 9E yɛ: “Dra dra na kikɛ nɛ n ta atande ere n sa ma basa ŋ kaŋɛ bumo le: ‘Men baa wora asheŋ nɛ amo be ekpa so, men baa la basa nsaa wora kelela nsaa wu abar kuwɔr. 10Men sa maa kɔrfɛ bekulpoche nɛ amunibi nɛ befɔ nɛ b chena menyi to nɛ betentaŋasepo. Menyi alɛ e sa maa fɛ nfɛra lubi a laŋɛ men braana be kaplɛa so ashi menyi be ŋgbene to.’ ”
11Ama ma basa ta ŋkpensheŋ nna m pal kaman n sa ma nseŋ ti bumo be asoe ŋ kini kenu n sa ma. B daŋ kplaŋ ma so nna 12nseŋ wora bumo be ŋgbene kpakpa fanɛ awarabi nsaa maa kaŋ asoe a nu mmalga nɛ ma, Enyɛnpetale Ebɔrɛ na be Kiyoyu bɔla anebi juŋkparsoana so n ta n sa bumo na ŋko a bɛ ma mbra so. Amoso n daŋ nya agbo nna ga n wɔtɔ bumo. 13Ŋkpal b ka daŋ kini kenu n sa ma jemanɛ nɛ n daa malga bumo kutɔ na so, nɛ ma alɛ gba maŋ nu bumo be kekule. 14N daŋ pesaŋ bumo to nna n ya lɛ efuli pɔtɛana so fanɛ kananɛ afugboŋ bee pesaŋ asɔ to n ya kaa lɛ na, nɛ bumo be kasawule lela na dese fuloŋ nɛ esa kikɛ daa maŋ naa wɔ kumo so.
Currently Selected:
Zakareya 7: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation