Obadaya 1
1
Bɔrɛdare nɛ Obadaya ku na be asheŋ
1Kusɔ nɛ Enyɛnpetale Ewurgboŋ na kaŋɛ a laŋɛ Edɔm be kaplɛa so nɛ an nu nde:
“Men koso n shin nɛ an yɔ nɛ anyi nɛ Edɔmebi
e ya kɔ abar kena.”
2Le nɛ Enyɛnpetale na kaŋɛ Edɔm:
“Meeŋ shin nɛ fo ki epɔshipo nɛ ekama nyam
e keni fo jiga.
3Fo, Edɔm be kamoowu e naa fule fo na.
Fo Edɔm nɛ fo tase kebee so nɛ fo kowu
wɔ kaboŋ jeŋgreŋ na,
e naa puchi a kaŋɛ fo kumu fanɛ
wanɛ e naaŋ tiŋ m pɔɔ fo so na, ŋko?
4Kashenteŋ nna fanɛ fo wɔ awɔlto
fanɛ kajɔnɔkoso ka bee firgi nna,
fo alɛ nseŋ ta fo kowu n ya yuu
fanɛ k kaa wɔ achɛkpabi to na,
ama ma, Enyɛnpetale na e kaŋɛ fo na
fanɛ meeŋ shin nɛ fo shi kakpa nɛ fo wɔ ere m ba kaseto.
5Nɛ beyu ŋko besugepo daŋ ba fo to kanyɛso,
ndafanɛ kusɔ nɛ k daa beeŋ nya fo gba maaŋ baa walɛ.
B daa beeŋ yuri fo kananɛ baa sha.
Beyu baŋ ba kanyɛso, asɔ nɛ baa sha nawule nɛ baa ta.
Basa baa chuge greep be asɔrso malɛ,
baa kaa yige amo be gbrɛ ko nna a chɔga so,
ama fo ere, fo doŋana beeŋ mur fo cheche.
6Menyi ere Isɔɔ be kanaŋ to ebi,
baaŋ sensaŋ menyi be asɔ kikɛ n yɔ.
7Men doŋana beeŋ tintiŋ menyi n yɔ
efuli ere so be ekarso cheche,
nɛ men teriana e fule menyi nseŋ pɔɔ menyi so.
Bumo nɛ baa tu menyi a ji menyi be ajibi naniere
beeŋ sho menyi ajigbelɛ,
ama menyi alɛ maaŋ pin.”
8Enyɛnpetale na yɛ: “Kachɛ na kaŋ fo,
meeŋ mur Edɔm be basa nyiashempo kama
nɛ b wɔ lsɔɔ be abee so a pin asheŋ to na.
Meeŋ mur bumo cheche.
9O, Teman be benakɔpo,
kufu beeŋ pɛ menyi tain,
baaŋ ku ekama nɛ e wɔ lsɔɔ be abee so na to.
10Ŋkpal menyi Edɔmebi ka diewu
n ta kumu kpakpaso n shuŋ men kurgepoana
Jeekɔb be kanaŋ to ebi kushuŋ lubi na so,
anishinyɔr beeŋ ba menyi so.
Menyi alɛ beeŋ mur kuraa.
11Kachɛ nɛ bedoŋ nɛ b la befɔ
daŋ ba bɔla Jeekɔb be kanaŋ to ebi be mbuna to
n luri Jerusalɛm to m muu bumo be asɔ kikɛ
nseŋ to beri m barga amo to n sa abar na
men daa yil jiga a keni bumo.
Amoso menyi alɛ gba daa du fanɛ bedoŋ na nna na.
12A daa maŋ daga fanɛ men baa yil
a mushe men niopibiana Jeekɔb be kanaŋ to ebi
saŋɛ nɛ tɔrɔ nɛ kachɛ lubi tu bumo
ashi bumo be kemur be saŋɛ so na.
13A daa maŋ daga fanɛ men luri ma basa be kade to
n ya kaa mushe bumo ashi bumo be etɔrɔ be kaplɛa so
nseŋ suge bumo asɔ kachɛ lubi achɛ na.
14A daa maŋ daga fanɛ men ya yili ŋkpancheriana
a pɛ bumo to be bumo nɛ b nya ekpa
n shile a yɔ nɛ b ya ŋana na.
A daa maŋ daga fanɛ men pɛ bumo
m bɔɔ bumo doŋ ana enɔ
saŋɛ nɛ b wɔ tɔrɔ na.
15Men nu nfe,
kachɛ nɛ ma ere Enyɛnpetale na beeŋ ji efuli kama
demu na taga to nna na.
Asɔ nɛ menyi Edɔmebi wora ere
beeŋ ba menyi alɛ gba so loŋ chap.
Menyeeŋ teŋi kusɔ nɛ men du ere gbagba.
16Ma basa nɛ b tase ma kebee cheembi so
ashi Jerusalɛm na ka nya kasogberge ere bre
meeŋ gberge efuli pɔtɛana kikɛ gba kusoe a chɔ loŋ.
Baaŋ nya kasoegberge a chɔ Jerusalɛm peya na,
hale nɛ k yɛr bumo kemur to cheche.
Israɛl ka beeŋ kɔ m pɔɔ so be asheŋ
17Kumɔlga beeŋ baa wɔ Zayɔn be kebee bre so,
nɛ basa ko e nya ekpa n shile ŋ ŋana.
Ndoŋ beeŋ baa la kakpa cheembi nsaa la
Jeekɔb be kanaŋ to be kasawule.
18Jeekɔb be kanaŋ to ebi beeŋ baa du
fanɛ edɛ suse so nna
nɛ Isɔɔ malɛ be kanaŋ to ebi e baa
du fanɛ afitiri wɔlso nɛ baaŋ chɔɔ.
Isɔɔ be kanaŋ to be ekama maaŋ naŋ ji efute.
Ma, Enyɛnpetale na e kaŋɛ loŋ na.
19Keshishɛrsawule so ebi na beeŋ ba sɔ menyi lsɔɔ
be kanaŋ to ebi be abeesawule a wɔtɔ,
nɛ basa nɛ b wɔ abee be kaseto na malɛ e ba
Filistiebi be nsawule ŋ ki bumo peya.
Israɛlebi beeŋ ba sɔ Efreimebi nɛ Samɛriaebi be nsawule,
nɛ Bɛnjaminebi malɛ e ta Gilead.
20Israɛl be benapo nɛ b pɛ n yɔ Keenan na beeŋ bɛta
m ba kɔ n sɔ nsawule loŋ hale n ya fo Zarefat.
Jerusalɛm be benapo nɛ b wɔ Sefarad naniere malɛ
beeŋ ba kɔ n sɔ keshishɛrsawule be ndeana.
21Zayɔn to be bekɔmpɔɔsopoana beeŋ ya kɔ
Edɔm m pɔɔ kumo so nsaa ji kuwura kumo so.
Enyɛnpetale malɛ gbagba e naaŋ ki bumo be ewura.”
Currently Selected:
Obadaya 1: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation