Jona 1
1
Jona ka shile Ebɔrɛ be asheŋ
1Kachako nɛ Enyɛnpe Ebɔrɛ kaŋɛ Amitai pibinyɛn Jona le: 2“Yɔ kadegboŋ nɛ baa tre Ninɛve na to n ya fiɛ ndoŋebi so ŋ kaŋɛ bumo fanɛ n wu bumo be asheŋ lubi nɛ baa wora na kikɛ. Amoso asheŋ maaŋ nyalɛ n sa bumo kikɛ.”
3Nɛ Jona kini nseŋ shile Enyɛnpe Ebɔrɛ na. E daŋ yɔ kade ko nɛ baa tre Jɔpa nna n ya luri nchu so be kuloŋgboŋ ko nɛ k bee yɔ kadegboŋ ko nɛ baa tre Tashish ashi Speen be efuli so na to.
4Ndoŋ nna nɛ Enyɛnpe Ebɔrɛ shin nɛ afugboŋ ko koso teku na so. Nɛ bɔrɛchu nɛ afu wea abar to m ber kuloŋgboŋ nɛ Jona daa wɔ kumo to na so, nɛ k bee shin nɛ k baŋɛ to m mur nchu na to. 5Nɛ kufu pɛ kuloŋgboŋ na be befarpo na kikɛ ga nɛ b fara a shu a tre bumo be agbirana. Ndoŋ nna nɛ b lara kuloŋgboŋ na to be esulɔ n lɛ teku na to saŋɛ na so kumo be egbɛ beeŋ duga so ŋ ka ŋ kukwe.
Jemanɛ ere so kikɛ nɛ Jona bre wɔ kuloŋgboŋ na be kaseto be ebu ko to a di kenishipereso. 6Ndoŋ nna nɛ kuloŋgboŋ na be befarpo na be enimu yɔ Jona kutɔ n ya kaŋɛ mo le: “Fo ere dese a di nna a? Koso a shu a tre fo Ebɔrɛ. Ashere e beeŋ mɔlga anyi, nɛ an sa maŋ mur.”
7Kumo be kaman nɛ befarpo na kikɛ kaŋɛ a bar le: “Men shin nɛ an to beri n fin esa nɛ tɔrɔ ere shi mbe kumu so m ba anyi so ere.” B ka to beri na nɛ k tɔr Jona so.
8Nɛ b bishi mo le: “Kaŋɛ anyi, fo e shin nɛ le be tɔrɔ ere ba anyi so a? Manɛ be kushuŋ nɛ fee shuŋ? Nnɛ nɛ fo shi? Efuli mo so nɛ fo shi? Kanaŋ mo to be esa e la fo?”
9Ndoŋ nna nɛ Jona kaŋɛ le: “N la Hibruw be esa nna. Enyɛnpe Ebɔrɛ nɛ e wɔ ebɔrɛso nseŋ to teku nɛ kasawule kikɛ na nɛ mee shuŋ.”
10B ka nu loŋ nɛ kufu pɛ bumo ga, ŋkpal manɛ so, Jona teŋ kaŋɛ bumo fanɛ e bee shile Enyɛnpe Ebɔrɛ na nna.
11Teku na so be afu na daŋ baa wora eleŋ nna a ti so. Ndoŋ nna nɛ b bishi Jona le: “Nuso nɛ anyeeŋ wora fo nɛ teku ere e wora shruum n sa anyi?”
12Nɛ Jona kaŋɛ: “Men ta ma n lɛ teku na to, aloŋ beeŋ shin nɛ k wora shruum. M baa nyi geeŋ fanɛ ŋ ka wora n jija so nɛ le be afugboŋ lubi ere tu anyi na.”
13Ama ŋkpal befarpo na ka daa maa sha kelara mo n lɛ teku na to so, b daŋ pere kenishi nna a far nɛ b ya gbuŋ kedeŋi so. Bumo alɛ daa maŋ tiŋ, ŋkpal manɛ so, afu na be eleŋ daŋ baa wora keshi nna a ti so. 14Ndoŋ nna nɛ b kule Enyɛnpe Ebɔrɛ na ŋ kaŋɛ le: “O, Enyɛnpe Ebɔrɛ, jande, sa maŋ shin nɛ an wu ŋkpal anyi ka bee shin nɛ an lara kanyɛn ere be ŋkpa so. Sa maŋ kaŋ ji anyi demu ŋkpal an ka mɔ esa nɛ e maŋ kɔ kulubi so. Ŋkpal manɛ so, fo Enyɛnpe Ebɔrɛ na e naa wora kusɔ kikɛ fo keparso.” 15Kumo be kaman nɛ b lara Jona n lɛ teku na to, nɛ k wora shruum epul na to. 16Le be kesheŋ ere daŋ shin nɛ befarpo na ŋana Enyɛnpe Ebɔrɛ na alegaiso nna. Kumo be kaman nɛ b lara sarga nseŋ nase nnɔ n sa Enyɛnpe Ebɔrɛ na.
17Ndoŋ nna nɛ Enyɛnpe Ebɔrɛ shin nɛ kɔrɔtɔgboŋ ko ba ta Jona m min, nɛ e ji nchɛ asa nɛ nnyɛ asa ashi kɔrɔtɔgboŋ na be epunto.
Currently Selected:
Jona 1: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation