Hoziya 8
8
Enyɛnpe Ebɔrɛ ka malga ŋ gbiti Israɛl be asheŋ
1Enyɛnpe Ebɔrɛ yɛ: “Foŋ kabel!
Ŋkpal ma basa ka kini kebɛ kɔnɔkoŋwule be ŋkre nɛ ma
nɛ bumo wora na, nɛ ma keŋini so so, bedoŋ chala a gbelge
ma kasawule so nna fanɛ njɔnɔkoso na.
2Kashenteŋ nna fanɛ baa tre ma bumo be Ebɔrɛ nsaa kaŋɛ
fanɛ ma basa e la bumo, nɛ b nyi ma,
3ama b kini kusɔ nɛ k walɛ. Ŋkpal loŋ so,
bumo doŋana beeŋ ju m buu bumo so.
4Ma basa maŋ kaŋɛ ma pɔɛŋ nseŋ lara bumo be bewura. B lara bejuŋkparpo nɛ m maŋ nyi bumo be asheŋ. Bumo be egbiti nɛ eshuwa nɛ b ta n lɔŋɛ agbirana na n yɛr bumo be amu kemur to. 5M maa sha gbolu nɛ Samɛria be kade to ebi ta shuwa n lɔŋɛ a shuŋ fanɛ kegbir na be asheŋ. N nya agbo alegaiso n wɔtɔ bumo. Saŋɛ mo gba nɛ baaŋ yige kebaa shuŋ agbir ere? 6Israɛl be esa nɛ e nyi enɔ to be kushuŋ e daŋ lɔŋɛ kegbir na, ama kumo alɛ maŋ la ma Enyɛnpe Ebɔrɛ na! Amoso k beeŋ buri to le kpachɛrkpachɛrbi. 7Men baŋ maŋ du ayu nseŋ du afu, kawuliwuli nɛ menyeeŋ teŋi. Ayu baaŋ maŋ bel a maaŋ tiŋ n wul kude. Nɛ men baŋ teŋi ayu gba, bedoŋ beeŋ ba sɔ amo ŋ ka menyi. 8Israɛlebi gba ki fanɛ efuli pɔtɛana so ebi nna a shuŋ agbir. Amoso b maŋ kɔ tɔnɔ n sa ma fanɛ kapuliya bureso na. 9Men ki fanɛ kupuŋ to be kurma nɛ kumo gbagba wɔtɔ a kilgi to nna. Men shile n yɔ Asiriyaebi kutɔ nna n ya haya bumo fanɛ b baa kuŋ menyi. 10Ama meeŋ bar menyi abar so m ba gberge menyi kusoe. Kumo alɛ maaŋ chɛr nɛ Asiriya be efuli so be ewurgboŋ na e mɛaŋ menyi ga nɛ men luri ebesa to.
11Menyi Israɛlebi pɔr ebɔrɛsure damta nna a lara alubi be esarga amo so, ama amo e ki kakpa nɛ menyee wora alubi ga. 12Mbra damta nɛ n sibɛ n sa menyi, ama men kini amo kikɛ nseŋ kaŋɛ fanɛ a la keŋini pɔtɛ nna. 13Men gbagba e naa we esarga nɛ menyeeŋ lara a sa ma na be eblaŋ. Ma Enyɛnpe Ebɔrɛ na be kagbene maŋ fuli menyi so ŋkpal loŋ so. Amoso meeŋ gberge menyi kusoe ŋkpal men be alubi so nseŋ naŋ bɛta menyi n yɔ Ijipt be kasawule so.
14Israɛlebi pɔr bewura be elaŋ damta nna nseŋ kplaŋ bumo be etopo na so. Nɛ Judaebi malɛ pɔr nde nseŋ pɔr egbal ŋ kulti amo. Meeŋ shin nɛ edɛ e ba chɔɔ bewura be elaŋ na nɛ nde nɛ b pɔr egbal ŋ kulti na kikɛ nyam.”
Currently Selected:
Hoziya 8: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation