Hoziya 7
7
1Saŋkama nɛ m baa sha keta ma basa nɛ b wɔ Israɛl be efuli so nɛ Samɛria be kade to be alubi m paŋ bumo nseŋ nɛfa bumo, kusɔ nɛ mee wu bumo to e la asheŋ lubi. B wɔtɔ nna a puni abar, nsaa bure elaŋana a luri to a yuri nsaa suge basa be asɔ ashi ekpaana to. 2B maŋ nyi fanɛ meeŋ nyiŋi bumo be alubi nɛ baa wora na. Ma alɛ bee wu alubi nɛ a kulti bumo n wɔtɔ na kikɛ.
B ka kre ŋkre lubi ashi bɔrɛlambu to be asheŋ
3Enyɛnpe Ebɔrɛ yɛ: “Basa na bee bɔla bumo be ŋkre lubi so nna a fule ewura na nɛ mbe benimuana. 4B la basa nɛ esa maaŋ tiŋ n yirda nna nɛ bumo be yurkishi du fanɛ ebu nɛ baa tɔ bodobodo kumo to na be edɛ nɛ b baga amo to nɛ a suse yeŋyeŋyeŋ na. 5Kachɛ nɛ bumo be ewura bee ji eyur na nɛ b shin nɛ mo nɛ mbe benimuana na nuu nsa m boo a wora kawulisheŋ. 6Bumo be ŋgbene daa kaa nna a tushi fanɛ ebu nɛ baa tɔ bodobodo kumo to na nɛ bumo be agbo malɛ du fanɛ edɛ nɛ a du nyɛɛbi kanyɛso nsaa nyarga a suse kachipurso.
7B du fanɛ edɛ be adondulombi nna a chɔɔ bumo be bejuŋkparpoana a mɔ. Kukoko to nɛ baa mɔ bumo be bewura, ama bumo alɛ be ekama daa maa kule ma a fin kechɛto.”
Israɛl nɛ efuli pɔtɛana na be asheŋ
8Enyɛnpe Ebɔrɛ yɛ: “Israɛl be basa du nna fanɛ bodobodo nɛ k maŋ bel nna. Efuli pɔtɛana be basa kutɔ nɛ baa yɔ n ya kaa fin kechɛto. 9Bumo alɛ maŋ nyi fanɛ bumo be egbɛ nɛ b ta n deŋi efuli pɔtɛana so ere so nɛ b maŋ naa kɔ eleŋ na. Baaŋ bel n fuli amu nɛ efuli pɔtɛana so ebi e baa kraa ji bumo so eleŋ nɛ bumo alɛ maŋ nyi. 10Israɛl be basa be kamoowu e naa ji bumo na. Ama amo nɛ amo kikɛ, b maŋ bɛta m ba ma Enyɛnpe, bumo be Ebɔrɛ na kutɔ. 11Israɛlebi bee kilgi to nna fanɛ keli nɛ k maŋ nyi asheŋ nna. Baa shile nna a yɔ Ijiptebi nɛ Asiriyaebi kutɔ n ya kaa fin kechɛto naniere! 12Meeŋ sho bumo keshewu m pɛ bumo fanɛ mbuibi. Meeŋ gberge bumo kusoe ŋkpal alubi nɛ baa wora na so.
13Ŋkpal b ka pal kaman n sa ma so bumo be lalaloge fo nna na. Bumo kikɛ beeŋ mur. N daa sha fanɛ m mɔlga bumo nna ama bumo be kananɛ baa bunyaŋ ma na, maŋ la kashenteŋ be bunyaŋ. 14B maa bugi ŋgbene a kule ma. Baa tɔr nna a gbelti a shu fanɛ kananɛ nnyamase bee wora na. B baa kule ma adɔjibi nɛ asɔnuuso gba; baa ta asɔ nna a chaŋɛ a chaŋɛ bumo be eyur fanɛ kananɛ nnyamase bee wora na. Kashenteŋto b la basa nɛ b kini ma nna. 15Ma e bela bumo n shin nɛ b nya eleŋ, ama baa wu ma kulubi nna. 16B shile ma, Enyɛnpetale Ebɔrɛ na kutɔ nna n ya buu kegbir nɛ k maŋ kɔ eleŋ kikɛ na. B du fanɛ keta nɛ esa maaŋ tiŋ n ta mbe yirda n deŋi so na nna. Ŋkpal bumo be bejuŋkparpo ka bee malga ŋkpensheŋ so so, baaŋ wu luwu nyaŋnyaŋso nɛ Ijiptebi e mushe bumo.”
Currently Selected:
Hoziya 7: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation