Eemɔs 6
6
Israɛl be kemur be asheŋ
1Asheŋ maaŋ nyalɛ n sa menyi nɛ shɛŋ shɛŋ maŋ tir menyi ashi Jerusalɛm, nɛ menyee fɛ fanɛ men nya kekuŋ ashi Samɛria be kade to ere. Asheŋ maaŋ nyalɛ n sa menyi Israɛl be efuli lempo be bunyaŋwuraana, nɛ basa bee kaa ba menyi kutɔ m ba kaa fin kechɛto na! 2Men yɔ Kalnee be kade to n ya keni. Kumo be kaman nɛ men naŋ yɔ kadegboŋ nɛ baa tre Hamaf na nseŋ yili ndoŋ n yɔ Filisti be efuli so be kade nɛ baa tre Gaaf na. Amo be amo e bɔ Juda nɛ Israɛl be efuliana? Ŋko loŋ be efuliana na e shishibi a chɔ menyeya a? 3Men kini keshuli fanɛ demuji be kachɛ na beeŋ ba, ama menyi be asheŋ woraso e naa ŋini fanɛ kachɛ na gba tiŋ n taga to. 4Asheŋ maaŋ nyalɛ n sa menyi nɛ menyee dese asɔchenaso tenteŋ nɛ b ta asɔlnyii m mata m mata so n ji amo kebita na to a we mbolpɔ nɛ ana fɔlbi be eblaŋ na. 5Kananɛ ewura Deevid ashi Jerusalɛm daa ta jaŋjilaŋ a laŋ a boŋ a wora nshɛ popɔr dra dra na, nɛ menyi alɛ gba bee sha kebaa wora. 6Menyee nuu nsa kananɛ k par menyi nna, nsaa gbiti yawu kpakpaso be etulale, ama men kplaŋ men be efuli Israɛl nɛ k bure n loge na bre so. 7Amoso menyi nɛ men doŋana beeŋ juŋkpar n tintiŋ n yɛr efuli pɔtɛ so kufɔ kufɔ nɛ men be ajigboŋ nɛ menyee wora nɛ kedese a wushi ere kikɛ e ba ekar.
8Le nɛ Enyɛnpetale Ewurgboŋ na kaŋɛ kenishipereso: “Israɛl be basa be kamoowu nɛ b kɔ na be asheŋ bee nu ma agbo alegaiso. Ŋ kishi bumo be nwu gboŋgboŋi nɛ b pɔr na ga. Ma alɛ beeŋ ta bumo be kadegboŋ na nɛ kusɔ kama nɛ k wɔ kumo to n sa bumo doŋana.”
9Hale basa kudu gba ka kanaŋ na to, bumo alɛ gba beeŋ wu. 10Esa nɛ e wu na mo kurgepo nɛ e la keeliwura na e naŋ ya lara kebuni na kowu. Kumo be kaman nɛ e bishi esa kama nɛ e ka laŋ na to le: “Fo nɛ esa ko e wɔtɔ a?
Ndoŋ nna nɛ esa na e kaŋɛ le: ‘M-m!’ ”
Kumo be kaman nɛ ekurgepo na e kaŋɛ le: “Men loto! Men shin nɛ an baa de kananɛ anyee ti an Nyɛnpe Ebɔrɛ na be ketre so.”
11Enyɛnpe Ebɔrɛ na baŋ malga, elaŋgboŋana nɛ afimbiana kikɛ bee bure to nna kpachɛrkpachɛrbi. 12Egbaŋɛ beeŋ tiŋ n shile afalta so manaŋ manaŋ a? Ŋko anafɛlso beeŋ tiŋ n dɔ teku to a? Ama menyi ere ta keji asheŋ nɛ amo be ekpa so ŋ kilgi kɔrtɔ nseŋ ta ekpa niŋiso malɛ ŋ ki ekpa kɔnto.
13Menyee ji njɔŋ nna ŋkpal men ka kɔ m pɔɔ Lodiba be kade so so. Nsaa wu menyi be amu ŋkpal men ka kɔ n sɔ Karnayim so.
14Le nɛ Enyɛnpetale na gbagba bee kaŋɛ: “Meeŋ shin nɛ efuli pɔtɛ ko so ebi e ba kɔ menyi Israɛlebi nseŋ sɔ menyi be efuli kikɛ n chena so. Baaŋ yili Hamaf nɛ k wɔ kebeemase ashi kelargato be esoso be kaba so ŋ kɔ sɔ n ya fo kepa nɛ baa tre Araba na be kelargato be kaseto be kaba so kikɛ.”
Currently Selected:
Eemɔs 6: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation