Yauhas 18
18
Yexus Raug Ntes
(Mathais 26:47-56; Malakaus 14:43-52; Lukas 22:47-53)
1Thaum Yexus thov Vajtswv tas lawm, Nws nrog Nws cov thwjtim hla lub kwjha Kiloos mus rau sab tid. Nyob rau ntawd muaj ib lub vaj, Yexus thiab Nws cov thwjtim txawm mus rau hauv lub vaj ntawd. 2Yudas tus uas ntxeevsiab rau Yexus kuj paub qhov chaw ntawd thiab, rauqhov Yexus twb tuaj ntsib cov thwjtim ntau zaug hauv lub vaj ntawd lawm. 3Yogli ntawd, Yudas thiaj mus ntawm lub vaj thiab coj ib pab tubrog Loos thiab cov uas zov lub Tuamtsev qeeleej uas cov thawj povthawj hlob thiab cov Falixais tso tuaj nrog nws mus rau hauv lub vaj; lawv nqa ntaj, taws teeb, thiab taws tsau cig lamlug tuaj. 4Yexus yeej paub txhua yam uas yuav los raug Nws, Nws txav zog mus nug lawv hais tias, “Nej tuaj nrhiav leejtwg?”
5Lawv teb tias, “Peb tuaj nrhiav Yexus uas yog neeg Naxalev.”
Yexus teb lawv hais tias, “Kuv yog tus ntawd ntag.”
Yudas tus uas ntxeevsiab, tabtom nrog lawv sawv uake ntawd thiab. 6Thaum Yexus hais rau lawv tias, “Kuv yog tus ntawd ntag,” lawv thaub ncho rovqab thiab ntog zomzaws rau hauv av. 7Yexus rovqab nug lawv hais tias, “Nej tuaj nrhiav leejtwg?”
Lawv teb tias, “Peb tuaj nrhiav Yexus uas yog neeg Naxalev.”
8Yexus teb tias, “Kuv twb qhia rau nej lawm hais tias, Kuv yog tus ntawd ntag no ne. Yog nej tuaj nrhiav Kuv tiag, nej ciali tso cov neeg no mus.” ( 9Yexus hais li no kom tiav rawsli tej lus uas Yexus hais tias, “Txiv, cov neeg uas Koj muab rau Kuv lawm, tsis muaj ib tug ploj li.”)
10Ximoos Petus muaj ib rab ntaj, nws txawm rho hlo nws rab ntaj los tib ntag rau tus Tuam Povthawj Hlob tus tubqhe sab nploojntseg xis tunrho. Tus tubqhe ntawd hu ua Malekhus. 11Yexus hais rau Petus tias, “Ciali muab koj rab ntaj ntxig rov rau hauv lub hnab! Koj xav tias Kuv yuav tsis haus lub khob iab khob daw uas Kuv Txiv muab rau Kuv haus no lov?” #Math 26:39; Malak 14:36; Lukas 22:42
Coj Yexus Mus Cuag Anas
12Cov neeg Loos tus thawj tubrog nrog rau nws cov tubrog thiab Yudais cov tub ceevxwm txawm ntes Yexus, muab Nws khi, 13thiab xub coj Nws mus cuag Anas uas yog Kaiyafas yawmtxiv; xyoo ntawd Kaiyafas yog tus Tuam Povthawj Hlob. 14Kaiyafas yog tus uas tau hais rau cov Yudais tej nomtswv hais tias, cia ib tug tuag theej sawvdaws xwb yuav zoo dua. #Yauh 11:49-50
Petus Tsis Lees Paub Yexus
(Mathais 26:69-70; Malakaus 14:66-68; Lukas 22:55-57)
15Ximoos Petus thiab ib tug thwjtim raws Yexus qab mus. Tus thwjtim ntawd yog ib tug uas tus Tuam Povthawj Hlob paub nws zoo, yogli ntawd, nws thiaj nrog Yexus mus rau hauv lub tshavloog ntawm tus Tuam Povthawj Hlob lub tsev, 16tiamsis Petus sawv sabnraum roojvag. Tus thwjtim uas tus Tuam Povthawj Hlob paub ntawd txawm tawm los hais rau tus ntxhais qhev uas zov roojvag thiab coj Petus mus rau hauv tsev. 17Tus ntxhais qhev uas zov roojvag txawm hais rau Petus hais tias, “Koj yog tus txivneej uas raug ntes ntawd ib tug thwjtim thiab los sav?”
Petus teb tias, “Kuv tsis yog.”
18Hmo ntawd no heev, cov tubtxib thiab cov tub ceevxwm txawm rauv ib cub thee, thiab sawvdaws sawv puagncig nte taws. Ces Petus txawm mus nrog lawv sawv uake nte taws thiab.
Tus Tuam Povthawj Hlob Nug Yexus
(Mathais 26:59-66; Malakaus 14:55-64; Lukas 22:66-71)
19Tus Tuam Povthawj Hlob nug Yexus txog Yexus cov thwjtim thiab Yexus tej lus qhuabqhia. 20Yexus teb tias, “Kuv yeej txeev tabmeeg qhia rau neeg sawvdaws; txhua yam uas Kuv qhia yeej yog qhia hauv tej tsev sablaj thiab hauv lub Tuamtsev, qhov chaw uas sawvdaws tuaj txoos uake. Kuv yeej tsis tau hais ib zaj zais nkoos rau qhovtwg li. 21Koj tseem yuav nug Kuv ua dabtsi? Kuj nug cov neeg uas hnov Kuv qhia. Nug seb kuv hais licas rau lawv; lawv twb paub tej uas Kuv qhia huv tibsi ne.”
22Thaum Yexus hais li ntawd, muaj ib tug fajxwm nyob ze ntawd, txawm ciali tib tawgncuav rau Yexus ntsejmuag thiab hais tias, “Uacas Koj yuav lam teb tus Tuam Povthawj Hlob zooli ko?”
23Yexus teb nws hais tias, “Yog Kuv tau hais ib qho twg txhaum lawm, koj kuj qhia qhov txhaum ntawd rau sawvdaws paub. Tiamsis yog Kuv hais yog lawm, koj lam ntaus Kuv ua dabtsi?”
24Ces Anas thiaj xa Yexus uas tseem khi nrees mus rau Kaiyafas uas yog tus Tuam Povthawj Hlob.
Petus Rovqab Tsis Lees Paub Yexus
(Mathais 26:71-75; Malakaus 14:69-72; Lukas 22:58-62)
25Thaum Ximoos Petus tseem sawv nte taws, cov neeg uas nyob ntawd hais rau Petus tias, “Koj yog tus txivneej uas raug ntes ntawd ib tug thwjtim thiab los sav?”
Tiamsis Petus tsis lees li, nws hais tias, “Kuv tsis yog.”
26Tus Tuam Povthawj Hlob ib tug qhev uas yog tus txivneej uas Petus txiav ib sab nploojntseg tu ntawd ib tug kwvtij txawm hais tias, “Kuv pom koj nrog tus txivneej ntawd nyob hauv lub vaj, tsis yog lov?”
27Petus rov tsis lees dua hais tias, “Tsis yog kuv.” Ces tamsim ntawd qaib txawm qua.
Coj Yexus Mus Cuag Philaj
(Mathais 27:1-2, 11-14; Malakaus 15:1-5; Lukas 23:1-5)
28Thaum kajntug txoog, lawv coj Yexus tawm hauv Kaiyafas tsev mus rau ntawm tus tswvxeev lub vajloog. Cov Yudais tej nomtswv tsis kam mus hauv lub loog, rauqhov lawv xav ceev lawv tuskheej kom huv, kom lawv thiaj noj tau rooj mov uas ua kevcai Hla Dhau. 29Yogli ntawd, Philaj thiaj tawm mus cuag lawv sabnraud thiab nug hais tias, “Nej komtxim rau tus txivneej no txog zaj dabtsi?”
30Lawv teb tias, “Yog Nws tsis tau ua txhaum, ces peb yeej yuav tsis coj Nws tuaj cuag koj.”
31Philaj hais rau lawv tias, “Nej coj Nws mus thiab txiavtxim rawsli nej txoj kevcai.”
Cov Yudais teb tias, “Tiamsis nomtswv Loos twb tsis tsocai rau peb muab leejtwg tua ne!” ( 32Qhov no muaj rawsli tej lus uas Yexus twb qhia uantej lawm hais tias Nws yuav tuag licas.) #Yauh 3:14; 12:32
33Philaj rovqab mus rau hauv lub loog thiab hu Yexus los cuag nws. Nws nug Yexus hais tias, “Koj puas yog cov Yudais tus vajntxwv?”
34Yexus teb tias, “Lolus nug no yog tawm ntawm koj los, los yog twb muaj lwmtus qhia txog Kuv rau koj lawm?”
35Philaj teb tias, “Koj xav tias kuv yog neeg Yudais no lov? Twb yog Koj haivneeg thiab cov thawj povthawj hlob yog cov uas ntes Koj tuaj rau kuv ntag. Koj tau ua txhaum dabtsi?”
36Yexus hais tias, “Kuv lub tebchaws tsis yog lub ntiajteb no. Yog Kuv lub tebchaws yog lub ntiajteb no, Kuv cov thwjtim yeej yuav tivthaiv Kuv, tsis pub kom cov Yudais tej nomtswv ntes tau Kuv. Tiamsis Kuv lub tebchaws tsis yog lub ntiajteb no!”
37Philaj nug Yexus hais tias, “Yogli ntawd, Koj yog ib tug vajntxwv lov?”
Yexus teb tias, “Koj yog tus uas hais tias Kuv yog vajntxwv. Qhov uas Kuv los yug rau hauv lub ntiajteb no yog muaj tiblub homphiaj xwb, qhov ntawd yog los qhia qhov tseeb. Txhua tus uas nyob rau hauv qhov tseeb yeej mloog Kuv lus.”
38Philaj nug Yexus hais tias, “Qhov tseeb ntawd yog dabtsi?”
Txiavtxim Muab Yexus Tua
(Mathais 27:15-31; Malakaus 15:6-20; Lukas 23:13-25)
Ces Philaj txawm tawm rov mus cuag cov Yudais rau sabnraud thiab hais rau lawv tias, “Kuv tsis pom Nws tau ua ib qhov txhaum uas yuav txaus rautxim li. 39Tiamsis rawsli nej txoj kevcai, txhua zaus uas nej ua kevcai Hla Dhau, kuv yeej ibtxwm tso ib tug neeg raug txim rau nej. Nej puas xav kom kuv tso cov Yudais tus vajntxwv rau nej?”
40Lawv txawm qw nrov-nrov rau Philaj tias, “Tsis txhob tso tus txivneej no! Peb xav tau Npalanpas xwb!” (Npalanpas yog ib tug neeg tubsab.)
Currently Selected:
Yauhas 18: MWW2022
Highlight
Share
ਕਾਪੀ।
Want to have your highlights saved across all your devices? Sign up or sign in
© 2022 United Bible Societies. All rights reserved.