Tes Haujlwm Lus Tawqhia
Lus Tawqhia
Phau Cov Timthawj Tes Haujlwm yog saum txuas los ntawm phau Lukas. Lub homphiaj loj yog hais txog Yexus thawj pab thwjtim, uas muaj Vaj Ntsujplig ua tus coj lawv mus qhia Txoj Moo Zoo uas hais txog Yexus, “nyob rau hauv nroog Yeluxalees, thoobplaws txhua qhov hauv lub xeev Yudas, xeev Xamalis, thiab mus txog qabntuj kawg” (1:8). Qhov no yog zaj keebkwm uas hais txog cov ntseeg Yexus txoj kev lojhlob uas yog pib ntawm cov neeg Yudais thiab dhau mus ua txoj kev ntseeg rau txhua haivneeg thoob ntiajteb. Tus sau phau ntawv no txhawj txog cov nyeem, nws xav kom lawv paub tias cov ntseeg Yexus tsis yog cov uas yuav tawmtsam thiab ntxeev lub tebchaws Loos tej nomtswv, tiamsis cov ntseeg Yexus txoj kev ntseeg yog qhov uas ua rau cov Yudais txoj kev ntseeg tiav.
Phau Tes Haujlwm no muab faib ua peb ntus, ua rau pom txog Txoj Moo Zoo qhia txog Yexus uas tau nthuav mus dav heev thiab kev tsimtsa pawg ntseeg: (1) cov ntseeg Yexus kev lojhlob uas pib hauv nroog Yeluxalees, tomqab uas Yexus rov mus saum ntuj lawm; (2) nthuav mus rau lwmqhov hauv tebchaws Palexatees; thiab (3) nthuav ntxiv mus rau sab Hiavtxwv Meditelanees uas yog mus txog rau tebchaws Loos.
Ib yam uas tseemceeb nyob rau hauv phau ntawv Tes Haujlwm no yog hais txog Vaj Ntsujplig tes haujlwm. Hnub Pheetekhos ntawd, Vaj Ntsujplig uas muaj hwjchim tau los rau saum cov ntseeg uas nyob hauv lub nroog Yeluxalees; Nws niajhnub coj, txhawb pawg ntseeg thiab cov thawjcoj lub zog txhua zaus rawsli tej uas teev rau hauv phau ntawv no. Cov ntseeg Yexus thaum ub tej lus qhia tau muab sau ua ntau zaj lus qhuabqhia, thiab tej xwmtxheej uas muab teev tseg rau hauv phau Tes Haujlwm no yog ua povthawj txog txojlus qhia uas tau muaj nyob rau hauv cov ntseeg lub neej thiab nyob rau hauv pawg ntseeg txoj kev tuaj txoos uake.
Txheejtxheem
Npaj rau kev ua timkhawv (1:1-26)
a. Yexus lolus hais thiab coglus thaum kawg (1:1-14)
b. Tus uas hloov Yudas chaw (1:15-25)
Kev ua timkhawv hauv lub nroog Yeluxalees (2:1—8:3)
Kev ua timkhawv hauv lub xeev Yudas thiab xeev Xamalis (8:4—12:25)
Paulus tes haujlwm (13:1—28:31)
a. Mus qhia Txoj Moo Zoo zaum thib ib (13:1—14:28)
b. Rooj sablaj hauv lub nroog Yeluxalees (15:1-35)
c. Mus qhia Txoj Moo Zoo zaum thib ob (15:36—18:22)
d. Mus qhia Txoj Moo Zoo zaum thib peb (18:23—21:16)
e. Paulus raug kaw hauv Yeluxalees, Xixaleyas, thiab Loos (21:17—28:31)
Currently Selected:
Tes Haujlwm Lus Tawqhia: MWW2022
Highlight
Share
ਕਾਪੀ।
Want to have your highlights saved across all your devices? Sign up or sign in
© 2022 United Bible Societies. All rights reserved.